“Rong Kanahieng oh Ale Kaweid”

¹ Pwuhken Lepin Padahk kin kihda karasaras ehu me erpit kin likwer oh ndinda: “Rong ei koasoi kaselel kan, pwe mehkoaros me I kin ndawei me pwung. I kin kak kaweid oh kin kasalehda erpit me kin mwahu ong mour. . . . Kapwaiada ei lokaia kan, kumwail ahpw pahn perenkihda. Mehmen me diariehda, e diarada mour, oh Siohwa pahn kupwur­perenki.” (Lepin Padahk 8:​6, 14, 32, 35, New World Trans­la­tion) Lepin lokaia pwu­kat kin kawehwe mwahu duwen kaweid me pahn kohwong kitail nan Kapokon en District me oaralap koasoia “Soun­padahk kan en Mahsen en Koht.”

² Society kasawihada duwen anahn akan en kitail koaros, pi­rien en pali ngehn, oh prokram en kapokono pahn kasalehda duwen anahn pwukat oh dahme pahn anahne wiawi pwehn kaitarala anahn pwu­kat. Ma kitail pahn doadoahngki kaweid oh iren sawas kan me pahn kohwong kitail, e pahn sewese kitail en ahneki peren, kolokol atail nanpwung mwahu rehn Siohwa, oh pil kekeidte pohn ahl me pahn kah­luwa kitail ong mour soutuk. Ni mehlel, mie kahrepe mwahu kan en “rong kanahieng oh ale kaweid.”​—Lepin Padahk 1:5.

³ Mwohn Prokram Pahn Tepida: Pwehn paiekihda prokram en ka­po­kon, kitail anahne mihmi nan dewetail oh kaunopada atail lamalam mwohn prokram pahn tepida. Pwehn wia met, kitail anahne koasoanehdi mwahu atail koasoandi kan. Tepida mwadang pahn wia mehkot kesem­pwal. Meir mwadang pwong mwohn rahn en kapokon. Pirida mwadang pwe koaros nan ahmw peneinei oh irail me pahn iang uhk kohla wasahn kapokon pahn kak kaunopada oh mwenge mwohn kumwail pahn kohla wa­sahn kapokon. Kitail anahne mwadang lel wasahn kapokon pwe kitail kak rapahki dewetail oh koasoanehdi soahng kesempwal kan mwohn prokram pahn tepida. Wenihmw en wasahn kapokon pahn ritida kuloak 8:00 ni menseng, oh prokram pahn tepida kuloak 9:30 ni menseng rahn kan koaros me kapokon pahn wiawi.

⁴ Pwehki kahrepen kapokon wet kin wiawi iei en kapinga Siohwa “nan mwomwohdiso,” ihme kahrehda prokram en rahn koaros pahn tepi­kih­da ni ahl me pahn kapinga Koht. (Mel. 26:12) Pwehki met, e pahn mwahu ma koaros pahn mwohndi mwohn pakair en tepin koul pahn wiawi. Met kin pahrekiong kaweid wet me kohsang Pwuhk Sarawi: “Kumwail wiahda mehkoaros nin duwen me konehng oh koasoandi pwung.” (1 Kor. 14:40) Iaduwen kaweid wet pahn kamwekid kitail? Ni ahnsou me ke pahn kilang brother me wia “chairman” mwohndi mwowe​—⁠pohn stage​—⁠ni ahnsou me keseng kin wiawi mwohn kapokon, ken mwadang mwohndi. Met pahn sewese iuk en iang tepin koul sang mohngiongomw, oh met kin kihda kaping laud ong Siohwa.​—Mel. 149:1.

⁵ Ahnsou me Prokram Wiwiawi: Esra “kaunopada eh mohngiong pwehn tehk kanahieng sapwellimen Siohwa kosonned oh peikiong.” (Esra 7:​10, NW) Iaduwen kitail kak kaunopada mohngiongatail pwehn ale kaweid me Siohwa kin ketikihda? Ni ahmw kin kousapahlih oara­lap en padahk kan, idek pein rehmw, ‘Dahme Siohwa men padahkiong ie nan prokram en kapokon wet? Iaduwen I kak doadoahngki kaweid wet pwehn sewese pein ngehi oh ahi peneinei?’ (Aiseia 30:21; Episos 5:​17) Erein kapokon, nantihong wia peidek pwukat ong pein kowe. E pahn mwahu ma ke pahn ntingihdi ire kan me ke men doadoahngki nan ahmw mour. Koasoanehdi ahnsou mwurin kapokon en koasoiong meteikan duwen dahme ke sukuhliki nan kapokon. Met pahn sewese iuk en tamataman dahme ke sukuhliki oh doadoahngki dahme ke sukuhliki nan ahmw mour.

⁶ E kin apwal en rong kanahieng erein awa tohto. Dahme kak sewese iuk en dehr mweidohng ahmw madamadau en medemedewe ehu soahng tohrohr likin prokram? Tamataman me wasao me kitail kin kilikilang ahnsou me prokram wiawi kin sewese de kauwehla atail rong kanahieng. Wasao me kitail pahn kilang, ih wasao me kitail pahn rong kanahieng. (Madiu 6:​22) Ihme kahrehda, e pahn mwahu ma ke soh­te pahn kilangseli oh ke sohte pahn kilang wasa kan me ngihl de mwe­kid kapw pahn wiawi. Ken nantihong kilangte brother me wia pad­ahko. Ahnsou me e pahn nda iren Paipel ehu, ken mwadang pahkpeseng noumw Pwuhk Sarawi oh idawehn ahnsou me e pahn wadek, oh ahnsou me brothero pahn koasoia ireo​—⁠mwurin e wadek​—⁠ken pahkpeseng noumw Pwuhk Sarawi ni ahnsou me koasoipen iren Pwuhk Sarawio wiwiawi.

⁷ Limpoak en Kristian pahn kamwekid kitail en ieremen kau­weh­la en meteikan arail rong kanahieng prokram ahnsou me prokram wi­wia­wi. (1 Kor. 13:5) Ahnsou me prokram wiwiawi kin wia “ahnsoun nen­nenla” oh rong kanahieng. (Ekl. 3:7) Ihme kahrehda, e pahn mwahu en ieremen kohkohseli oh pil ieremen koasoi (ihte ma soahng pwukat uhdahn anahne wiawi) ahnsou me prokram wi­wia­wi. Oh pil, ma ke kaunopada mwahu ke sohte pahn anahne kohla imwen kainen ahnsou me prokram wiwiawi. E pahn mwahu ma ke sohte pahn mwenge de nim pihl likin ahnsou kan me kilelehdi ong soahng pwukat (ihte ma toahkte padahkiong uhk me mie kuloak me ke anahne mwenge de nim pihl). E pahn mwahu ma irail me wahdo neirail cellular phone kan, pager kan, cam­corder kan, oh camera kan​—⁠ren dehr doadoahngki soahng pwukat ni ahl me pahn kauwehla en meteikan arail rongorong. Pahpa oh nohno kan pahn koasoanehdi me irail koaros​—⁠pahpa, nohno, seri kan iang­ahki irail teenage kan​—⁠en mwohndipene oh met pahn sewese pahpa oh nohno kan en tehk ma neirail kan nennenla oh rong kanahieng audepen prokram en kapokon.​—Lepin Padahk 29:15.

⁸ Pahr me ahpwtehn nek, emen elder me kin iang towehda ka­po­kon kan erein sounpahr tohto koasoia: “Mie kahrepe ehu me I pehm me kapokon wet inenen pweida. Kereniong koaros me iang towehda kapokon ntingihdi ire kesempwal kan, iangahki seri tikitik kan. E inenen ka­peren en kilang. Oh pil, ahnsou me brother kan kin wadek iren Paipel kan, kereniong koaros kin idawehn ahnsou me e kin wadek iren Paipel kan.” Se men kapinga irail me kin rong kanahieng. E kin wah­do kapai kan ong pein kitail oh pil iengetail me kin iang toweh­da kapokono oh pil, keieu kesempwal, e kin kapinga atail Sounpadahk Lapalap, Siohwa Koht.​—Aiseia 30:20.