Tehk Kanahieng Pakair Sarawi kan

¹ Kaidehn soahng koaros me aramas kin koasoia kin kesempwal pwehn anahne tehk kanahieng. Ahpw ahnsou me Koht kin mahmahsen, kitail anahne rong kanahieng. (Deud. 28:​1, 2) Kitail kak kalahngankihong Siohwa “sapwellime mahsen” me ohl kan me mwekidki ngehn sarawi oh ntingihdi sapwellimen Koht mahsen pwehn sewese kitail. (Rom 3:2) Kapokon en District me pahn wiawi ni ahnsou keren pahn kihong kitail ahnsou mwahu en rong sapwellimen Koht mahsen. Iaduwen ke kak rong kanahieng?

² Mwadang Lellahng Wasahn Kapokon Ni Menseng Koaros: Medewehla uwen peren en mehn Israel kan ahnsou me re rong me re pahn tuhwong Siohwa ni Nahna Sainai pwehn rong Sapwellime Kosonned! (Eksodus 19:10, 11, 16-​19) Ma ke pahn pil ahneki soangen perenohte ahnsou me ke pahn rong sapwellimen Siohwa kaweid ni Kapokon en District, ke pahn koasoanehdi ahmw koasoandi kan pwehn mwadang lellahng wasahn kapokon ni menseng koaros. Kitail sohte kak rong prokramo pwon ma kitail pahn pwand en lellahng wasahn kapokon oh kitail pahn kauwehla ahn mehteikan arail rongorong ni atail pahn rapahki dewetail. Wehnimw en wasahn kapokon pahn ritida kuloak 8 ni menseng oh prokram pahn tepida kuloak 9 elep ni menseng koaros.

³ Ekei me kin mwadang lel wasahn kapokon pil sohte kin mihmi nan dewerail ni ahnsou me prokram kin tepida. Dahme kahrehda? Pwehki re kin awih lao lel brother me wia “chairman” kin nda me koul pahn tepida oh ih ahnsou me re kin kanekehla arail koasoi rehn mehteikan oh tepida alulahng dewerail. Ahpw, tamataman me minit kei mwohn prokram pahn tepikihda koul, brothero me wia “chairman” kin mwohndi pohn stage ni ahnsou me keseng kin wiawi. Met pahn wia kilel ong kitail me kitail anahne rapahki dewetail ahnsowo! Eri, ni ahnsou me koul pahn tepida, kitail kaunopadahr en iang koaros koulki kaping kan ong Siohwa.

⁴ Rong Nin Duwen Peneinei Minimin ehu: Ni ahnsou me re kin wadek sapwellimen Koht mahsen ong mehn Israel kan me pokonpene, tohnpeneinei koaros, iangahki “seri kan,” anahne rong oh sukuhl. (Deud. 31:12) Ni kapokon kan, pahpa oh nohno kan sohte pahn “mweidohng seri kan en wia nsenarail.” (Lepin Padahk 29:15) Pahpa oh nohno kan anahne wiahda koasoandi ehu pwe arail peneinei en mwohndipene​—⁠iangahki neirail mwahnakapw oh peinakapw kan (teenagers). Ekei pahpa oh nohno kan kin awih lao lel koul kin tepida pwehn kahre neirail seri kan en kohla imwen kainen. Ahpw, met sohte pahn sewese neirail seri kan en wehwehki ia uwen kesempwal en koul oh kapakap nan atail kaudok. E pahn keieu mwahu en doadoahngki imwen kainen mwohn prokram pahn tepida (ma kak)!

⁵ E pahn sewese kitail en rong ma kitail pahn meir mwadang ni pwong kan oh dehr mwenge laud rahn en kapokon kan. Rong kanahieng dahme brother me wia padahk kin koasoia. Ke dehr mweidohng ahmw madamadau en medemedewe soahng teikan. Ahnsou me e pahn wadek iren Paipel kan, idawehn ah wadawad ni ahmw doadoahngki pein noumw Pwuhk Sarawi. Ntingihdi ire kesempwal kan. Ahnsou me ehu ehu padahk wiawi, kousapahlih nan ahmw madamadau dahme brother me wia padahko koasoia oh medemedewe iaduwen ke kak doadoahngki dahme e koasoia nan ahmw mour. Ni imwin rahno, kumwail koaros koasoiapene ire kan me kumwail sukuhliki nin duwen peneinei ehu. Mehnia ire kan emen emen perenki? Iaduwen ahmw peneinei kak doadoahngki ire kan nan amwail mour?

⁶ Wauneki Mahsen en Koht: Ahnsoun kapokon kan kin kihong kitail ahnsou mwahu en koasoiong kompoakpatail kan oh werekiong riatail kan me kin koasoia soahng mwahu kan. Ma kitail mwadang lellahng wasahn kapokon, kitail kak koasoiong mehteikan mwohn prokram pahn tepida. Ahpw, ekei kin pil koasoi ahnsou me prokramo wiawi, pwe re lemeleme me re sohte pahn kauwehla ahn mehteikan rongorong pwe wasahn kapokono kin wia wasakis me inenen laud. Ahpw, mendahki kapokon kin wiawi nan wasa laud kan, ahnsoun kapokon kin wia ahnsoun rongorong, duwehte ahnsoun mihding nan Kingdom Hall. E sohte konehng en doadoahngki cellular phone kan, pager kan, camcorder kan, oh camera kan ahnsoun kapokon pwe soahng pwukat pahn kak kauwehla ahn mehteikan arail rongorong prokram en kapokon.

⁷ Ahnsou me Moses ale Kosonned sang Siohwa, e “sohte kin tungoale mehkot de sohte kin nimpil.” (Eksodus 34:28) Ni ahlohte, e sohte pahn konehng en mwenge de nimpil ahnsou me kapokon wiawi. Ahpw, ma soumwahu laud de kahrepe kesempwal, ke pahn kak mwenge de nimpil. Ahpw, ma soh, e pahn mwahu en awih lao “ahnsou konehng” pwehn mwenge oh nimpil.​—Ekl. 3:1.

⁸ Nan ekei kapokon kan, kahpwal wet kin wiwiawihte: brother oh sister kan iangahki seri kan kin mihmihseli likin Kingdom Hall ahnsou me prokram wiwiawi. Kaweid pahn kohwong attendant kan pwehn padahkiong irail pwukat en pedolong nan Kingdom Hall de wasahn kapokon. E pahn mwahu ma irail me kin tohnmeteiki arail ahnsou pwehn doadoahk nan kapokon pahn mwadang mwohndi nan wasahn kapokon ahnsou me arail doadoahk nekier. Ma emen me pwukoah laud padahkiong uhk en wia pwukoah ieu ahnsoun prokram wiawi, eri ke pahn anahne wia doadoahk ahnsoun prokram. Ahpw, likin met, e pahn mwahu ma irail me tohnmeteiki arail ahnsou pwehn doadoahk ong kapokon pahn mwohndi nan dewerail ahnsoun prokram wiawi oh rongorong prokramo. E sohte pahn konehng ren mihmihseli nan wasa kan me re kin doadoahk oh wie koasoakoasoi ahnsou me prokram wiawi.

⁹ Kitail sohte men ahneki ‘kapehd kekeluwak ong en dehdehkihla’ oh rong sapwellimen Koht Mahsen. (Ipru 5:​11) Kitail en nantihong kasalehda me kitail kin wauneki Siohwa ni atail pahn rong kanahieng sapwellimen Siohwa mahsen me pahn sansalda ni atail Kapokon en District me pahn wiawi ni ahnsou keren.