Kapokonpene Pwehn Kapinga Siohwa
1. Ia oaralap en kapokon en pahret, oh dahme kahrehda Siohwa kin ketin warohng atail kaping?
1 Siohwa wia Koht emen me sapwellimaniki manaman laud, oh diren erpit, kopwungpwung, oh limpoak. Nin duwen Sounkapikpatail oh Kaunepen Lahng oh Sampah, Ih kelepw me warohng atail kaudok. (Melkahka 36:9; Kaudiahl 4:11; 15:3, 4) Atail Kapokon en District nan September me oaralap koasoia “Kalinganahda Koht” pahn kakehlailih atail inou en kapinga Ih nin duwen Koht mehlel.—Mel. 86:8-10.
2. Iaduwen kaunopada mwahu e kak sewese kitail en paiekihda kapokon wet?
2 Anahne Koasoanehdi Mwahu Ahmw Koasoandi kan: Wia uwen ahmw kak koaros en mwadang lel wasahn kapokon rahno. Met pahn sewese iuk en rapahkihda deuomw oh soandi mwahu mwohn tepin koul e pahn tepida oh met pahn pil sewese iuk en ahneki madamadau pwung oh meleilei pwehn kak rong mwahu kaweid kan me pahn kohda. Wenihmwen wasahn kapokon pahn ritida sang kuloak 8 kohla rahno. Menlau dehr kihdi noumw pwuhk kan pohn sehr kan likin sehr kan me ahmw peneinei de irail me iang waromw sidohsa pahn mwohndi loale.
3. Dahme kahrehda pekipek kohda kitail en wahda kenatail mwenge ni atail pahn iang towehda kapokono?
3 E pahn mwahu en wahda kenomwail mwenge—met pahn mwahu sang kohla wasakis likin wasahn kapokon pwehn mwenge ahnsoun mwengehn souwas. Ma ke kin wia uwen ahmw kak en idawehn koasoandi pwukat, soahng koaros pahn soandi mwahu oh meleilei oh koasoandi pwukat pahn kahrehong koaros en kak miniminiong riarail brother oh sister kan.—Mel. 133:1-3.
4. (a) Iaduwen kitail kak kaunopada mohngiongatail ong kapokon wet? (b) Dahme pahn sewese kitail en rong kanahieng kapokon wet? (Kilang koakon.)
4 Rong Kanahieng oh Sukuhliki Mehkot: Esra kin kapakap pwehn kaunopada mohngiongi en rong kanahieng oh ale mahsen en Koht. (Esra 7:10) E mweidohng mohngiongi en sukuhliki sapwellimen Siohwa padahk kan. (Lepin Padahk 2:2) Kitail kak tepida kaunopada mohngiongatail kan ong kapokon mwohn atail pahn mweselsang imwatail ni atail pahn doudouloale duwen oaralap en kapokon oh koasoiong atail peneinei duwen met. Ahnsoun kapokon, mehn sawas kan me kileledi nan koakon kak sewese kitail en kamwahuwihala atail rong kanahieng.
5. Dahme kahrehda e kesempwal en doadoahngki likou oh kapwat me mwakelekel oh pil soandi?
5 Mwakelekel oh Soandi: Atail likou oh kapwat pahn kasalehda me kitail kin kesempwaliki koasoandi kan en Koht me kin mwakelekel oh soandi. (1 Kor. 14:33; 2 Kor. 7:1) Pein paliwaratail, piten moangatail, oh kikin pehtail/nehtail pahn anahne mwakelekel, oh kitail anahne doadoahngki likou oh kapwat me mwakelekel oh konehng Kristian. Kitail kin kalap kilang aramas kin doadoahngki likou oh kapwat me sohte soandi oh sohte mwakelekel. Ahpw, mendahki aramas ndand en kasdo de mwadong kan kin perenki doadoahngki likou oh kapwat me sohte soandi oh sohte mwakelekel, met sohte wehwehki me Kristian emen pahn kak wia duwehte. Ma kitail pahn alasang sidail en sampah kan, aramas sohte pahn kak kilang duwen wekpeseng en irail me papah Koht mehlel oh irail me sohte.—Malakai 3:18.
6. Iaduwen kitail kak tehk ma atail likou oh kapwat kin kasalehda me kitail kapwaiada kaweid nan 1 Timoty 2:9, 10?
6 Likou me Konehng Kristian Sounkalohk kan: Ni ahnsou me wahnpoaron Pohl nting ong Kristian elder Timoty, e kangoange “lih kan en tiahk mwahu oh kanahieng arail likou kan, . . . oh wiewia mwahu nin duwen me konehng lih poadidi kan.” (1 Tim. 2:9, 10) Pwehn tehk mwahu me atail likou oh kapwat kin konehng Kristian kin wehwehki me kitail anahne medemedewe mwahu duwen met. Likou kan anahne soandi, mwakelekel oh konehng Kristian—e sohte pahn kala de kasalehda paliwar.—1 Piter 3:3.
7-8. Iaduwen atail likou oh kapwat mwakelekel oh konehng Kristian e kak kamwekid meteikan?
7 Duwehte ni ahnsou me emen kin pohkomwokomw oh kadek e kin kahrehong mesen aramaso en mwomwen masamwahu, e pil duwehte likou oh kapwat me konehng Kristian kin kahrehong padahk me kitail kin weuwa en linganla oh pil atail pelien lamalam en waunla mwohn aramas akan. Ekei aramas me kin kilang kitail mwohn, de erein, de mwurin Kapokon en District nan pahret me oaralap koasoia “Kalinganahda Koht”—mwein irail pahn idek rehtail dahme kahrehda kitail kin weksang meteikan oh pil mwuhr kak nda: “Se pahn ianguhkala nan omw pelien lamalam en, pwe se rong [oh pil dehdehkidahr] me Koht kin ketin ieiang uhk.” (Sekaraia 8:23) E kesempwal emenemen kitail en kasalehda atail wauneki Siohwa ni atail kin doadoahngki likou oh kapwat me konehng oh kasalehda wahu ong Ih.
8 Kitail inenen kasikasik en kapokonpene pwehn kapinga Siohwa! Kitail en wia uwen atail kak en kapinga Ih ni atail pahn iang towehda kapokon rahno pwon, rong kanahieng, oh doadoahngki dahme kitail sukuhliki.—Deud. 31:12.
[Kaokon nan Pali 5]
Rong Kanahieng Ni Kapokon kan
▪ Doudouloale duwen oaralap en padahk kan
▪ Idawehn ni ahnsou me irail wadek iren Paipel kan
▪ Ntingihdi ire kesempwal kan
▪ Kileledi ire kesempwal kan me ke men doadoahngki
▪ Kousapahlih dahme ke sukuhliki