Mwenge ni Ahnsou me Konehng
1. Ia duwen mihting tohrohr me ahpwtehn wiawi eh sewese iuk oh meteikan?
1 Mwurin atail iang ehu mihting tohrohr, kitail kin kalapw nda, “Ih me kitail anahne en mwo!” Emen sounapwalih me kin seiloak koasoia me mwurin ekei ar iang ehu mihting tohrohr, re kasalehda me re men kalaudehla ar doadoahk en kalohk. Pil emen sounapwalih me wia seiloak nda, “E kin sewesei kiht en kak medewe mwahu ahnsou dah me kitail mi loale ni at kin kasawih at pilipil kan.” Oh pil emen nda, “Tohto sounkalohk kasalehda me e wia mehn kataman mwahu ong irail pwe ren tehk kanahieng dahme keieu kesempwal me iei doadoahk en kalohk.” Ia duwen rahnen mihting tohrohr eh kin sewese iuk?
2. Dahme kitail pahn sukuhlki nan mihting tohrohr en pahr en kalohk me kohkohdo?
2 Mihting tohrohr me pahn wiawi nan pahr en kalohk me kohkohdo pil pahn wia soahngohte. Oaralap iei “Wiahki Siohwa Omw Wasahn Ruk,” me kohsang nan Melkahka 118:8, 9. Iet ekei oaralap kan me pahn kohda: “Ia Duwen Siohwa Eh Ketin Wia Wasahn Ruk ni Ahnsoun Apwal,” “Sewese Meteikan en Diar Wasahn Ruk Rehn Siohwa,” “Kahlemengih en Siohwa Eh kin Ketikihda Wasahn Ruk,” “Me Pwulopwul kan, Likih Siohwa!” oh “Atail Irair Mwahu Iei Wasahn Ruk Sang Siohwa.”
3. Ia duwen atail kak paiekihda laud atail iang towehda mihting tohrohr?
3 Ia Duwen Omw kak Paiekihda Prokramo: Ni rahn en mihting tohrohro eh pahn pakairda, koasoanehdi ken iang towehda oh luke noumw tohnsukuhl en Paipel kan en iang uhk. Kitail anahne kolokol dahme kitail kin rong pwe kitail en “wa mwahu” ni kanengamah. (Luk 8:15) Eri rong kanahieng padahk kan oh ntingihdi ire kan me ke men doadoahngki nan omw mour oh nan kalohk. Wiahda ahnsou mwurin mihting tohrohro pwehn koasoia ire kan nin duwen peneinei ehu oh medewe ekei ahl akan me kowe oh omw peneinei kak doadoahngki.
4. Dahme kahrehda kitail en kasikasik mihting tohrohr me pahn wiawi?
4 Duwehte mwenge me iou oh mwahuwong paliwar, doadoahk laud wiawi ni limpoak pwehn kaunopada mihting tohrohr me pahn wiawi nan pahr wet. Siohwa en ketin kapaiahda omw nannanti pwehn towehda oh paieki ‘mwenge ni ahnsou me konehng’ pwehn kakehla pwoson en sounkalohk kan.—Mad. 24:45.