Mahsen en Koht Manaman
1. Ia oaralap en mihting tohrohr en rahn ehu ong pahr en kalohk en 2014?
1 Weksang soahng koaros me kohsang aramas soh unsek, Paipel ahneki manaman en wekidala kitail, kapwungala atail madamadau oh elen mour pwehn pahrekiong kupwuren Siohwa. Ia uwen kehlail en Mahsen en Koht? Ia duwen atail uhdahn kak doadoahngki manaman en Mahsen en Koht nan atail mour? Ia duwen atail kak doadoahngki mwahu met pwehn sewese meteikan? Kitail kamehlele me koaros pahn kakehlakahda arail nanpwungmwahu rehn Koht ni atail pahn tehk ire pwukat erein prokram en mihting tohrohr en rahn ehu me kaunopadahr ong pahr en kalohk en 2014. Oaralape iei “Mahsen en Koht Manaman,” me kohsang Ipru 4:12.
2. Pasapengpen peidek dah kan me kitail anahne tehk?
2 Diarada Pasapengpen Peidek Pwukat: Ni omw rong prokramo, ntingihdi pasapengpen peidek pwukat me kileldi pah.
• Dahme kahrehda kitail en likih sapwellimen Siohwa Mahsen? (Mel. 29:4)
• Ia duwen atail kak kilang oh kehn manaman en Mahsen en Koht nan atail mour? (Mel. 34:8)
• Ia duwen omw kak mweidohng manaman en Mahsen en Koht en doadoahk ni omw kin kalohk? (2 Tim. 3:16, 17)
• Ia duwen atail kak sohte lohdi pahn manaman en widing en ahn Sehdan sampah? (1 Sohn 5:19)
• Ia duwen kowe, me pwulopwul men, kak lelohng mehn akadei kan me pid papah Koht? (Ser. 17:7)
• Ia duwen atail kak kehlail mehnda ma kitail luwet? (2 Kor. 12:10)
• Dahme anahn pwe kitail en pousehlahte wiahda wekidekla kan nan atail mour mehnda ma ahnsou werei kitail ahneki tiahk oh madamadau suwed? (Ep. 4:23)
3. Likin rongorong prokramo, dahme kitail pil kak paiekihda sang mihting tohrohr en rahn ehu?
3 Kitail uhdahn pahn paiekihda atail kin rong ire kesempwal pwukat! Patehng met, mihting tohrohr en rahn ehu pahn kihong kitail ahnsou mwahu en esehla oh karanihala riatail kan me kohsang mwomwohdiso teikan, me duwehte mihting tohrohr en rahn riau oh mihting tohrohr (district convention) kin wia. (Mel. 133:1-3; 2 Kor. 6:11-13) Eri mweidohng ahnsou en werekiong kompoakpatail kan oh wiahda kompoakpatail kapw kan. Ma emen soun kapahrek me duwehte sounapwalih me kin mwemweit de brother men me kohsang Pedel koasoandi en iang amwail mihting tohrohr en rahn ehu, ke soh kasamwo ih oh eh pwoud? Kitail uhdahn ahneki kahrepe tohto ong kasikasik mihting tohrohr en rahn ehu me pahn wiawi!