Prokram Kapw en Kapokon Tohrohr en Rahn Ehu
“En Koahiekla Nin Duwen Ahmw Wehwehki Soahng Ngehnin kan” kin wia oaralap en prokram en Kapokon Tohrohr en Rahn Ehu me pahn tepida ni tepin September 2000. (1 Kor. 14:20) Dahme kahrehda e kesempwal kitail koaros en iang towehda Kapokono? Kitail kin mihmi nan sampah me direkihla suwed. Pwehn sohte lohdi pahn kasongosong kan, kitail anahne kekeirada ni atail kin wehwehkihla soahng ngehnin kan pwe kitail en powehkihdi me suwed me mwahu. Ihme prokram en Kapokon Tohrohr en Rahn Ehu pahn sewese kitail en wia.
Nan tepin prokramo, Sounapwalih en Circuit pahn koasoia “Sawas kan Pwehn Koahiekla Nin Duwen Ahmw Wehwehki Pwuhk Sarawi.” E pahn kasalehda iaduwen kitail kak ahneki pwoson me teng oh kehlail. Brothero me mwemweitdo pahn kasalehda iaduwen kitail kak doadoahngki kaweid en Pwuhk Sarawi ong wehwehki soahng ngehnin kan ahnsou me e pahn wia padahk me oaralap koasoia: “Pere Ahmw Pali Ngehn Ni Ahmw Pahn Kaiahne Ahmw Koahiek en Kasawihada Dahme Mwahu oh Dahme Suwed.”
Me pwulopwul kan pil kak koahiekla nin duwen arail wehwehki soahng ngehnin kan. Brother kan me pahn wia padahk pwukat: “Dahme Kahrehda Kitail en Rasehng Seri Pwelel kan ong Mehkan me Pidada me Suwed” oh “Irail me Pwulopwul kan me Kin Wehwehki Soahng Ngehnin kan Ahnsouwet.” Ke kak rong ekei pwulopwul kan koasoia dahme re kin wia pwehn kakehlailih pein irail ni pali ngehn pwe ren kak powehdi kasongosong kan me pid tiahk en sampah oh soahng kan me kin kahrehong irail en lelohng kahpwal.
Iaduwen kitail kak diarada peren mehlel nan mour? Brothero me mwemweitdo pahn koasoia met nan kaimwiseklahn padahko me oaralap koasoia: “Paiekihda Doadoahngki Kaweid Sang Pwuhk Sarawi Ni Elen Wehwe Mwahu.” E pahn kihda karasepe kan me pahn kasalehda me ma kitail pahn doadoahngki Mahsen en Koht, e pahn sewese kitail en powehdi kahpwal kan, wia pilipil mwahu kan oh paiekihda mehlel sang dahme Koht kin ketin padahkiong kitail.
Irail me men kasalehda me re inoukihong Siohwa arail mour oh papidaisla nan kapokon wet kak ndaiong Presiding Overseer mwadang. Kileledi nan noumw kalendar mwadang ahnsou me re pahn pakairki iahd Kapokon Tohrohr en Rahn Ehu pahn wiawi, oh koasoanehdi ahmw koasoandi kan pwe ken kak paiekihda prokram kesempwal wet. Ke dehr katiasang kapokon wet! E pahn kakehlailih uhk en dadaurete oh lelepek ong Siohwa mendahki koasoandi wet me kitail mihmi loale me inenen suwed.