Prokram Kapw en Kapokon Tohrohr en Rahn Ehu
Oaralap en Kapokon Tohrohr en Rahn Ehu ong pahr en kalohk kapw wet kin poahsoanehda pohn iren Paipel ehu: “Kumwail Peikiong Koht—Pelianda Tepil.” (Seims 4:7) Met kin wia kaweid mwahu ong kitail nan ahnsou apwal pwukat! Atail peikiong sapwellimen Koht kosonned akan kin kahrehda Sehdan men uhwong kitail. Prokram wet pahn padahkiong kitail iaduwen kitail kak kesihnenda teng mendahki Sehdan kin doadoahngki widing suwed kan pwehn kaluwetala atail pwoson. Ia ekei “takai kesempwal kan” en pali ngehn me kitail pahn paiekihda ni atail pahn iang towehda oh rong kanahieng prokram en kapokon wet?
Sounapwalih en Circuit pahn kasalehda iaduwen “Kasalehda Atail Wauneki Koasoandi en Tapwi Nin Duwen Tohnpeneinei” pahn kak sewese peneinei kan en powehdi kasongosong kan me kin kohsang sampah wet. Keieun padahk me brothero me mwemweitdo rehn ahmw mwomwohdiso pahn wia rahno oaralap koasoia “Ia Wehwehn Pelian Tepil” oh e pahn kawehwe dahme kahrehda oh iaduwen kitail kak kasalehda, ni sansal, me kitail men pelianda Sehdan ni e kin doadoahngki widing suwed kan pwehn song kauwehla atail pali ngehn. Padahk riau kin pid duwen me pwulopwul kan, pwehki re anahne kanahieng pwe ren dehr lohdi pahn widing kan en Tepil. Tohto en irail me sohte lohdi pahn kasongosong tohto ahnsou me re pwulopwul, met re lalaudla oh nsenamwahu pwe re sohte lohdi pahn widing kan en Sehdan. Kitail pahn perenki rong dahme wiawi nan arail mour oh iaduwen re kasalehda me re lelepek ong Siohwa mahs leledo ahnsou wet.
Aramas koaros anahne uhpahiong kaun akan. Ihme kahrehda, brother me mwemweitdo rehn ahmw mwomwohdiso pahn wia padahk me pahn kasalehda koasoandi pahieu me e konehng kitail en kasalehda uhpah me pwung mwohn silangin Koht: (1) ong kaun en wehi kan, (2) ong irail me apwalih mwomwohdiso, (3) ong kaun en doadoahk kan, oh (4) ong tapwin peneinei kan. Prokram wet pahn kihda kaweid me pahn sewese kitail laud nan atail mour!
Irail akan me men papidaisla nan kapokon wet kak padahkiong Presiding Overseer mwadang. Kitail koaros kak kilelehdi rahno nan neitail calendar oh koasoanehdi atail koasoandi kan pwehn iang towehda prokram pwon en rahno. Kapai kan me kitail pahn ale pahn mihmi rehtail ong ahnsou kohkohlahte ma kitail pahn uhpahiong Siohwa ong ahnsou kohkohlahte.