Prokram en Kapokon en Circuit Kapw

Sounpwong wet kitail pahn paiekihda atail Kapokon en District, ahpw kitail kak kilangwohng kapai kan en pali ngehn nan sounpwong kan me kohkohdo.

“Kapwaiada Sapwellimen Koht Kosonned Kan oh Mour” pahn wia oaralap en prokram en Kapokon en Circuit en rahn riau ong pahr en kalohk wet. (Lepin Padahk 4:4) E pahn kasansalehda kesempwalpen dahme kahrehda peikiong kosonned kan en Koht sohte kin wia mehkot katoutou. Pil ehu, e pahn kasalehda iaduwen wia kupwuren Koht pahn wahdo kommoalpatail oh nsenamwahu mehlel iangahki koapworopwor ong ahnsou kohkohdo.​—⁠Madiu 11:28-​30; Sohn 13:17.

Komwi iei emen nanpwungen irail ko me, pwehki ahmw peikiong kehkehlik en Krais, men papidaisla? Ma ke saikinte warohng papidaisla ni Kapokon en District, ele ke kak wiahkihla ahmw mehn akadei en papidaisla nan Kapokon en Circuit me kohkohdo. Koasoiong Presiding Overseer oh e pahn koasoanehdi dahme konehng.​—⁠Madiu 28:19, 20.

Ehu symposium pahn kawehwehda ni ahl katapan kan me kitail kak kasalehda limpoak ong Koht oh ong riatail Kristian kan. (Sohn 13:34, 35; 1 Sohn 5:3) Patohngete nan prokramo iei kaweid me kin kamwekid mongiong me kohsang nan Melkahka 19 oh 119. Mendahki peneu sarawi pwukat nan Melkahka kin ntingdi sounpahr kid samwalahro, kitail pahn kilang iaduwen e pahn kapaiada pein kitail rahnwet.

Oaralap en Kapahrek en Wehipokon (Public Talk) me Sounapwalih en District pahn wia iei “Lemmwiki Koht oh Kapwaiada Sapwellime Kosonned Kan.” (Eklesiasdes 12:13) Kaimwseklahn padahk me Sounapwalih en Circuit pahn wia pahn kasalehda duwen iaduwen me pwulopwul kan kak alehda dahme keieu mwahu nan mour ahnsouwet oh dahme kahrehda re kak koapworopworki mour soutuk nan ahnsou kohkohdo. Sounapwalih en District pahn kaimwsekla prokram ni ah pahn wadekada kapai tohto kan me kin kohsang momourki “kosonned en Wehio” en kasalehda limpoak. (Seims 2:8) Mehlel, met iei prokram en kapokon ehu me sohte emen pahn men katiasang!