Prokram Kapw en Kapokon en Circuit
Ehu kawehwehn lepin lokaia “lemmw” iei “wauneki Koht.” Pwuhk Sarawi kin kasalehda me “lemmwiki Koht” kin wia “elen erpit.” (Mel. 111:10) Ni pali teio, mie pil ehu soangen masak kin laud nan sampah en Sehdan me kin kapilkitailpene. Iaduwen kitail kak liksang masak me suwed oh pil kekeirada atail lemmwiki Siohwa? Prokram kapw en Kapokon en Circuit me pahn wiawi nan pahr en kalohk en 2002 pahn kihda pasapeng en peidek wet. Oaralap en kapokono iei “Lemmwiki Koht oh Kapinga Sapwellime Roson Lapalahpie.” (Kaud. 14:7) Kitail pahn sukuhliki iaduwen atail lemmwiki Siohwa pahn wia kamwahu kan ong pein kitail oh nin duwen pwihn en sapwellimen Siohwa ladu kan.
Mendahki aramas tohto kin lemeleme me “lemmw” kin wehwehki pwunod de sohla eimah oh kehl en kak ong kahpwal laud kan, Pwuhk Sarawi mahsanih: “Meid pai irail akan me lemmwiki Siohwa.” (Mel. 128:1) Prokram en kapokon wet pahn kasalehda iaduwen kitail kak powehdi kahpwal kan me kitail lelohng nin duwen tohnkaudok mehlel kan. Kitail pahn sukuhliki iaduwen kitail kak sewese irail me kapw kan en pil lemmwiki Koht, oh met pahn kamwekid irail en papah Ih sang mohngiongarail unsek, kapehdomw unsek, omw lamalam koaros unsek, oh omw kehl unsek. (Mark 12:30) Oaralap en kaimwiseklahn padahk me pahn wiawi nan keieun rahn en kapokon pahn koasoia “Karanih Irail akan me Ke Kin Poakohng” oh Sounapwalih en District pahn wia padahk wet. E pahn kawehwe iaduwen kitail pahn pepehd oh tehk kanahieng duwen dahme Sehdan kin wia pwehn kahrehong kitail en sohpeisang Siohwa, atail peneinei oh riatail brother oh sister kan ni pali ngehn.
Oaralap en padahk pahieu me pahn wiawi ni keriaun rahn en kapokon iei “Lemmwiki Siohwa, Kaidehn Aramas.” Brother kan me pahn wia padahk pwukat pahn kawehwehda dahme kahrehda oh iaduwen kitail kak powehdi pepehm en masak kan me pahn kak kahrehong kitail en perki kalohk oh pahn kahrehong kitail en apwalki kolokolete atail lelepek ong Siohwa oh nsen mwakelekel nan sukuhl de doadoahk. Oaralap en Kapahrek ong Wehi Pokon koasoia: “Lemmwiki Koht oh Peikiong Sapwellime Kosonned akan” oh brother me pahn wia padahk wet pahn koasoia duwen soahng kan me kileledi nan Kaudiahl irelaud 14. Kapokon en Circuit wet pahn imwisekihla kaweid kan me kin kangoange kitail en “Nantihong Kekeid Ni Atail Kin Lemmwiki Siohwa.”
Kitail pil sohte men katiasang Theocratic Ministry Sukuhl, Service Mihding, padahko me pid papidais, oh kousapahl en Kahn Iroir me pahn pil wiawi. Luhke irail me ke kin onop Paipel rehtail en iang towehda kapokono. Irail me men papidais en menlau mwadang ndaiong Presiding Overseer me re men papidais ni kapokon wet. Kitail koaros kak kasalehda atail lemmwiki Siohwa oh kapinga sapwellime roson lapalahpie ni atail sohte pahn katiasang mehkot me pahn wiawi nan prokram en kapokon wet!