Kaiahnehda Mohngiongomw En Lahn Siohwa
“Iamen re en kin kaiahnehda mohngiongirail kan en lahn ie oh kapwaiada ei kosonned akan ahnsou koaros.”—DEUDERONOMI 5:29, New World Translation.
1. Iaduwen kitail kak kamehlele me, ehu rahn, aramas akan solahr pahn masak de perki mehkot?
MASAPWEHK kin kalemwih aramas ni erein sounpahr epwiki kei. Masak duhpekla, soumwahu, irail me kin kauwehla kosonned, oh mahwen kin wia mehn kapwunod ahnsou koaros rehn aramas rar rar kei. Ihme kahrehda tepin koasoi en “Universal Declaration of Human Rights” kin kasalehda duwen arail mehn akadei en wiahda sampah ieu me aramas koaros solahr pahn masak de perki mehkot.a Koht kin kamehlele ong kitail me ehu rahn sampah wet pahn audaudki aramas me solahr pahn masak de perki mehkot—ahpw, E kin kasalehda me aramas akan sohte pahn kak wia met. Siohwa ketin doadoahngki sapwellime soukohp Maika pwehn kasalehda duwen sapwellime inou ong aramas akan me nan sampah kapw pwung me pahn wiawi ni ahnsou kohkohdo, aramas akan ‘sohte pahn perki mehkot.’—Maika 4:4.
2. (a) Iaduwen Pwuhk Sarawi kin kangoange kitail en lahn Koht? (b) Peidek dah kei pahn kak pwarada ni ahnsou me kitail kin medemedewe duwen atail pwukoa en lahn Koht?
2 Ni pali teio, pepehm en masak kak wia irair katepe ieu. Nan Pwuhk Sarawi, sapwellimen Koht ladu kan kin kalapw ale kangoang en lahn (lemmwiki) Siohwa. Moses padahkiong mehn Israel akan: “Kumwail lemmwiki Kauno [“Siohwa,” NW], amwail Koht; kaudokiong ihete oh kahukihla mware kelehpw.” (Deuderonomi 6:13) Sounpar epwiki kei mwuri, Solomon ntingihdi: “Mwurin mepwukat koaros, meteieu me I pahn nda: lemmwiki Koht, oh kapwaiada sapwellime mahsen, pwehki ih kahrepe wet me aramas kepikipikihda.” (Eklesiasdes 12:13) Ni atail kin wia doadoahk en kalohk me irail tohnleng kan kin apwapwalih, kitail pil kin kangoange aramas koaros en “lemmwiki Koht oh kapinga sapwellime roson lapalahpie.” (Kaudiahl 14:6, 7) Eri, Kristian akan anahne lahn Siohwa oh pil poakohng Ih ni mongiongarail unsek. (Madiu 22:37, 38) Iaduwen kitail pahn kak poakohng Koht oh, ni ahnsowohte, lemmwiki (lahn) Ih? Dahme kahrehda e kesempwal en lahn Koht limpoak menet? Kamwahu dah kan kitail kak ale ma kitail pahn lahn Koht? Mwohn kitail pahn kak sapeng peidek pwukat, keieu, kitail anahne sukuhliki ia wehwehn lahn Koht oh iaduwen soangen masak wet kin wiahkihla poahsoan kesempwal ehu ong karanih Siohwa.
Pwuriamweiki, Wauneki, oh Lahn Koht
3. Ia wehwehn lahn Koht?
3 Lahn Koht kin wia pepehm me konehng Kristian akan en ahneki ong Sounkapikparail. Ehu kawehwehn lahn Koht iei met: “pwuriamweiki oh wauneki Sounkapikpatail iangahki pepehm me kitail sohte men wia mehkot me pahn kansensuwedih Ih.” Eri, lahn Koht kin kamwekidada atail madamadau kesempwal riau: atail madamadau ong Koht oh atail madamadau ong tiahk kan me Koht kin kalahdeki. E sansal me madamadau riau pwukat inenen kesempwal kitail en tehk kanahieng. Nin duwen Vine’s Expository Dictionary of New Testament Words kasansalehda, ong Kristian akan, irairen lahn Koht iei ‘irair ehu me kin kahre atail mour ong ni mehkan me kin pid atail pali ngehn oh tiahk.’
4. Iaduwen kitail kak kakairada nan loalatail kan pepehm en kapwuriamwei oh wauneki Sounkapikpatail?
4 Iaduwen kitail kak kakairada nan loalatail irairen kapwuriamwei oh wahu ong Sounkapikpatail? Ni ahnsou me kitail kin kilang wasa kaselel ieu, tehnihr kaselel, de kihrlahn ketipin lingan, kitail kin pwuriamweiki mehlel. Pepehm wet nan loalatail kin kehlailda ni ahnsou me kitail kin wehwehki, ni atail doadoahngki mesatail en pwoson, duwen sapwellimen Koht kapikapikda kan. Duwehte Nanmwarki Depit, kitail kin dehdehki uwen tikitik oh luwet kitail oh uwen kaselel soahng kan me Siohwa ketin kapikada. “Ni ei kilengdawohng pahnlahng, iei wiepen nin limomwi, maram oh usu kan me komw ketin koasoanedier nan dewerail—dahkot aramas, me komwi kin ketin kupwukupwure; aramas mwahl, me komwi kin ketin apwahpwalih?” (Melkahka 8:3, 4) Kapwuriamwei laud kin kahrehong emen en kasalehda wahu, oh met pahn kamwekidada kitail en kalahnganki oh kapingahki Siohwa ong mehkan koaros me E ketin wiahda ong kitail. Depit pil ntingihdi: “I kin patohwan kapingahkin komwi omwi lemmwin kowahlap; wiepen nin limomwi kan me kapwuriamwei oh inenen mwahu mehlel. I kin wehwehki duwen met.”—Melkahka 139:14.
5. Dahme kahrehda kitail anahne lahn Siohwa, oh ihs me kin wia mehn kahlemeng mwahu ong kitail?
5 Pepehm kapwuriamwei oh wahu kin kahrehong emen en lahn Koht oh sapwellime manaman nin duwen Sounkapikadao oh sapwellime pwuhng nin duwen Kaunen audepen lahng oh sampah. Nan kasansal ehu me wahnpoaron Sohn kilangada, “irail ko me kalowedier mahno oh dikedikeo”—me wehwehki irail me keidi kan me iang Krais ketiket nanleng—mahsanih: “Maing at Kaun, Koht, Wasa Lapalahpie, ia uwen lapalap oh kapwuriamwei en wiewia kan en nin limomwi! Komwi me nanmwarkien wehi koaros, meid pwung oh inen alomwi kan! Ihs me sohte pahn lemmwikin komwi, Maing? Ihs me sohte pahn men kapinga omwi roson?” (Kaudiahl 15:2-4) Lemmwiki Koht, kin kohsang wahu laud ong sapwellime kaunda, oh met kin kahrehong iengen Krais kaun akan nan Wehin nanleng en kawahuwih Koht nin duwen Kaun keieu lapalap. Ni ahnsou me kitail kin medemedewe duwen dahme Siohwa ketin wiahda oh ni ahl pwung me E kin kaunda audepen lahng oh sampah, kitail soh ahneki kahrepe mwahu ehu en lahn Ih?—Melkahka 2:11; Seremaia 10:7.
6. Dahme kahrehda kitail sohte men kansensuwedihala Siohwa?
6 Ma kitail kin lahn Koht, irairen kapwuriamwei oh wahu sohte itar, kitail pil anahne kasalehda atail sohte men kansensuwedihala Ih de sapeikiong Ih. Dahme kahrehda? Pwe mendahki ma Siohwa “sohte kin mwadang lingeringerda oh me diren limpoak lapalap,” kitail anahne tamanda me e “uhdahn pahn kalokehki aramas suwed akan.” (Eksodus 34:6, 7) Edetehn Siohwa kin limpoak oh mahk kalahngan, e sohte kin kupwurki sapwung kan oh aramas akan me kin nseneki wia dahme sapwung de suwed. (Melkahka 5:4, 5; Apakuk 1:13) Koht uhdahn pahn kadeikada irail akan me kin nseneki wia dahme E kin kalahdeki oh sohte koluhla. Wahnpoaron Pohl mahsanih, “Meid kamasepwehk kowahlap, lohdiong pahn limen Koht ieias.” Ma kitail ahneki soangen masak me konehng, e pahn sewese kitail en dehr lohdiong pahn soangen irair keper oh pahn kak wia mehn perepe ehu ong kitail.—Ipru 10:31.
“Kumwail Loalopwoatohng Ih”
7. Ia ekei kahrepe kan kitail kak likih sapwellimen Siohwa manaman en doarekitailla?
7 Kitail anahne lahn Koht oh dehdehki mwahu duwen sapwellime manaman kehlail mwohn kitail pahn kak uhdahn likih Ih. Duwehte seri pwulopwul men me kin nsenamwahu ni ahnsou me eh papah kin karanih ih, eri, kitail pil kin nsenamwahu ni ahnsou me kitail kin mih pahn sapwellime Koht epwel. Menlau tehk iaduwen mehn Israel akan mwekidki sapwellimen Siohwa epwel mwahu mwurin E kahrehirailsang sapwen Isip: “Re pil kadehdeier manaman lapalap me Kauno [“Siohwa,” NW] ketin kasalehiong mehn Isip ko; irail eri lemmwikihda Kauno [“Siohwa,” NW] oh pwosonla Ih.” (Eksodus 14:31) Dahme Elisa kilang pil kin kadehde me “sapwellime tohnleng kin sinsile irail kan me kin wauneki Kauno [“Siohwa,” NW], oh kin kapitirailsang soahng keper kan.” (Melkahka 34:7; 2 Nanmwarki 6:15-17) Poadopoad en sapwellimen Siohwa aramas akan en nan rahnpwukat oh sang pil dahme kitail kin kilang nan pein atail mour kin wia mehn kadehde me Koht kin ketin doadoahngki sapwellime manaman ong aramas akan me kin papah Ih. (2 Kronikel 16:9) Kitail eri, tepida dehdehki me “lemmwiki Kauno [“Siohwa,” NW] kin kahrehiong aramas emen oh eh peneinei ar pahn koapworopwor oh saledek sang apwal.”—Lepin Padahk 14:26.
8. (a) Dahme kahrehda lahn Koht kin kamwekid kitail en idawehn Ih? (b) Kawehwehda iaduwen kitail anahne “loalopwoatong” Siohwa.
8 Lahn Koht sohte kin ihte kakehlahda nan loalatail kan en likih Ih, ahpw e pil kin kamwekidada kitail en kapwaiada sapwellime kupwur kan. Ni ahnsou me Solomon kasarawihla Tehnpas Sarawio, e kapakap ong Siohwa oh mahsanih: “Pwe sapwellimomwi aramas akan en waunekin komwi oh peikiong komwi ahnsou koaros nindokon ar pahn koukousoan nan sahpw me komwi ketikihongehr arail pahpa kahlap ako.” (2 Kronikel 6:31) Mwowe sang met, Moses kangoange mehn Israel akan: “Kumwail idawehn Kauno [“Siohwa,” NW] oh lemmwiki Ih. Kumwail peikiong oh kapwaiada sapwellime mahsen kan. Kumwail pwongih oh loalopwoatohng Ih [koledi Ih teng].” (Deuderonomi 13:4) Nin duwen iretikitik pwukat kin kasalehda ni sansal, atail ineng en idawehn sapwellimen Siohwa mahsen kan oh “loalopwoatohng” Ih [koledi Ih teng] kin poahsoankihda atail kin likih Koht. Ei, lahn Koht kin kahrehong kitail en peikiong Siohwa, papah Ih, oh loalopwoatohng Ih [koledi Ih teng], duwehte seri pwulopwul men pahn koledi teng eh pahpa me e kin likih ni unsek.—Melkahka 63:8; Aiseia 41:13.
Poakong Koht kin Wehwehki Lahn Ih
9. Iaduwen limpoak ong Koht oh lahn Koht kin doadoahkpene?
9 Nan Pwuhk Sarawi kan, lahn Koht sohte kin wehwehki me kitail pahn kesehla atail pepehm me kitail poakohng Ih. Met sansal sang kaweid me kohwong mehn Israel akan: “lahn Siohwa . . . oh kapwaiada sapwellime mahsen koaros oh poakohng Ih.” (Deuderonomi 10:12, NW) Eri, irair en lahn Koht oh pil limpoak ong Ih kin doadoahkpene. Atail lahn Koht kin kamwekid kitail en kapwaiada sapwellime mahsen kan, oh met kin kadehdehda atail limpoak ong Ih. (1 Sohn 5:3) Met inenen pwung, pwe ni ahnsou me kitail kin poakpoake emen, kitail sohte men kansensuwedihala ih. Mehn Israel akan kansensuwedihala Siohwa ni arail pelianda Ih nan sapwtehn. Eri, kitail sohte men wia mehkot me pahn kansensuwedihala Samatail nanleng. (Melkahka 78:40, 41) Ahpw, pwehki “Siohwa kin kupwurperenki irail akan me kin lemmwiki Ih,” atail kin peik oh lelepek kin kaperenda Ih. (Melkahka 147:11; Lepin Padahk 27:11) Limpoak ong Koht kin kamwekid kitail en kaperenda Ih, oh lahn Koht kin irehdi kitail sang wia soahng kan me pahn kansensuwedihala Ih. Irair riau pwukat kin doadoahkpene, kaidehn uhpene.
10. Iaduwen Sises kasalehda me e kin perenki lahn Siohwa?
10 Mouren Sises Krais kin ni sansal kawehwehda iaduwen kitail pahn kak poakong oh pil lahn Koht ahnsowohte. Soukohp Aiseia ntingihdi duwen Sises: “E pahn ketin kupwurokongki ngenen Kauno [“Siohwa,” NW]. E pahn ketin kaunkihda sapwellime aramas akan kupwurokong oh erpit. E pahn ketin mwahngih kupwuren Kauno [“Siohwa,” NW] oh lemmwiki, pwe e pahn ketin perenki kapwaiada kupwure. E sohte pahn ketin kadeikada sang ni me e kin mahsanihete de ketin karongehte.” (Aiseia 11:2, 3) Kokohp wet kin kasalehda me sapwellimen Koht ngehn sarawi kamwekid Sises en lahn Semeo me kin ketiket nanleng. Oh pil, kitail pil sukuhliki me irair en lahn Koht sohte kin wia mehkot suwed ong aramas emen, ahpw, e kin inenen kansenamwahu. Sises perenki kapwaiada kupwuren Koht oh kaperenda Ih mendahki kahpwal laud kan me lelohng ih. Ni ahnsou me e pahn kereniong kamakamala nin tuhkehn kalokoloko, e mahsanihong Siohwa: “Kaidehkin nseneiet, pwe kupwuromwihte en pweida.” (Madiu 26:39) Pwehki Sises kin lahn Koht, Siohwa ketin karonge eh pekipek kan, oh E kakehlada ih, oh kaiasada ih mwurin eh pwoula.—Ipru 5:7.
Sukuhliki en Lahn Siohwa
11, 12. (a) Dahme kahrehda kitail anahne sukuhliki en lahn Koht? (b) Iaduwen Sises kin padahkiong kitail duwen lahn Siohwa?
11 Ni ahnsou me kitail kin kilang uwen kehlail oh kaselel kapikapikda kan, e mengei ong kitail en pwuriamweikihla soahng pwukat, ahpw lahn Koht sohte kin wiawi ni ahl wet. Ihme kahrehda, Sises Krais [me wehwehki Depit Lapalap] kin luhke kitail oh mahsanih: “Kohdo, kumwail kompoakepahi pwulopwul kan, oh rong ie, pwe I pahn padahkihong kumwail duwen wauneki Kauno.” (Melkahka 34:11) Iaduwen kitail kak sukuhliki sang Sises en lahn Siohwa?
12 Sises kin padahkiong kitail en lahn Siohwa ni e kin sewese kitail en wehwehki duwen sapwellimen Samatail nanleng irair kaselel kan. (Sohn 1:18) Mehn kahlemeng mwahu en Sises kin kasansalehda duwen kupwuren Koht oh ia mwomwen e kin wiaiong mehteikan, pwehki Sises kin kahlemengih irair akan en Semeo ni unsek. (Sohn 14:9, 10) Oh pil, sang meirong en Sises, kitail kak karanih Siohwa ni ahnsou me kitail kin kapakapki mahkpen dipatail kan. Sapwellimen Koht mahk kalahngan wet me inenen laud mehlel, oh e kin kihong kitail kahrepe kehlail ehu en lahn Siohwa. Sounmelkahkao ntinighdi: “A komw kin ketin mahkohng kiht, pwe se en kin lemmwikin komwi.”—Melkahka 130:4.
13. Ewen kahk dah kan me mih nan pwuhken Lepin Padahk kin sewese kitail en lahn Siohwa?
13 Pwuhken en Lepin Padahk kin kawehwehda duwen ekei ewen kahk kan me pahn kak sewese kitail en kakairada nan loalatail en lahn Koht. “Samwa, padahngki dahme I padahkihwei, oh dehr manokehla dahme I ndaiong uhk ke en wia. Rong kanahieng ngilen me kupwurokong kan oh nantihong dehdehkihla mehlel. Ei, peki loalokong oh peki erpit ni ngidingid. Rapahki uwen omw kak, rasehng me kin rapahki silper de takai kesempwal me rir kan. Ma ke pahn kapwaiada met, eri, ke pahn esehla dahkot masak Kauno oh ke pahn pweida ni omw pahn padahngki duwen Koht.” (Lepin Padahk 2:1-5) Pwehn lahn Koht, kitail anahne onop sapwellime Mahsen, nantihong dehdehkihla sapwellime kaweid kan, oh rong kanahieng sapwellimen mahsen.
14. Iaduwen kitail kak kapwaiada kaweid kan me kin kohwong irail nanmwarki kan en Israel?
14 Nanmwarki kan koaros nan Israel en mahs kin ale kaweid en wiahda ehu pwuhken pelien kosonned akan en Koht oh ‘wadewadek erein eh mour, pwe en kin padahngki duwen lemmwin Kauno [“Siohwa,” NW] oh kapwaiada ni loalopwoat mehkoaros me audedahr pwuhk wet.’ (Deuderonomi 17:18, 19) E kesempwal kitail en wadek oh onop Paipel ma kitail men sukuhliki en lahn Siohwa. Ni atail kin kapwaiada mouren kaweid en Paipel, kitail kin ekis ekis esehla erpit oh loalokong me kohsang rehn Koht. Kitail kin “padahngki duwen lemmwin Kauno” pwehki kitail kin kilang atail mour kin pweida mwahu, oh kitail kin kesempwaliki atail nanpwungmwahu rehn Koht. Oh pil, sang ni atail kin kaukaule iang iengatail pwoson akan pokonpene, me pwulopwul oh me mah pahn kak rong duwen sapwellimen Koht padahk kan, sukuhliki duwen lahn Koht, oh kapwaiada sapwellime kosonned akan.—Deuderonomi 31:12.
Meid Pai Aramas akan me kin Lahn Siohwa
15. Ni ahl dah kei me lahn Koht kin pid ong atail kaudokiong Ih?
15 Sang parakrap en mwowe kan, kitail sukuhliki me lahn Koht kin wia madamadau pwung me kitail koaros anahne ahneki, pwe met kin kisehn atail kaudok ong Siohwa. E kin sewese kitail en likih Ih ni unsek, kapwaiada sapwellime kosonned akan, oh loalopwoatong Ih. Nin duwen Sises Krais kin wia, lahn Koht pil kak kamwekid kitail en kapwaiada atail inou ong Siohwa ahnsouwet oh pil ahnsou kohkohlahte.
16. Dahme kahrehda Siohwa kin kangoange kitail en lahn Ih?
16 Eri, lahn Koht sohte kin wia soangen masak me suwed de nohn apwal. Paipel mahsanih: “Meid pai irail kan me kin peikiong Kauno [“Siohwa,” NW], oh kin momourki sapwellime kosonned akan.” (Melkahka 128:1) Siohwa kin kangoange kitail en lahn Ih, pwe E mwahngih me met pahn wia mehn perepe mwahu ong kitail. Dahme Siohwa Koht mahsanih ong Moses kin kasalehda me E kin nsenohki kitail: “Iamen re [mehn Israel kan] kin kaiahnehda mohngiongirail kan en lahn ie oh kapwaiada ei kosonned akan ahnsou koaros, pwe irail oh kadaudokarail kan en kin nsenamwahu kohkohlahte!”—Deuderonomi 5:29, NW.
17. (a) Kapai dah kei kitail kin paiekihda sang atail kin lahn Koht? (b) Nan artikel en mwuhr, dahme kitail pahn sukuhliki me pid duwen lahn Koht?
17 Ma kitail pil pahn kaiahneda mohngiongitail en lahn Koht, atail mour pahn pweida. Ni ahl dah e pahn kak pweida? Keieu, ma kitail ahneki soangen madamadau en lahn Koht, e pahn kaperenda Ih oh sewese kitail en karanih Ih. Sang dahme e kilang sang pein eh mour, Depit wehwehki me “Koht kin ketikihong anahn en irail me kin wauneki; e kin ketin karonge ar likwer, oh kin ketin komourirailla.” (Melkahka 145:19) Keriau, kitail pahn paiekihda sang atail kin lahn Koht pwehki irair wet pahn sewese kitail en tateki dahme suwed. (Lepin Padahk 3:7) Artikel en mwuhr pahn kawehwehda iaduwen lahn Koht kak pere kitail sang keper kan ni pali ngehn, oh e pil pahn kasalehda duwen ekei aramas nan Paipel me wia mehn kahlemeng mwahu en lahn Koht oh sohpeisang wiewia suwed akan.
[Nting tikitik me mi pahs]
a General Assembly en United Nations pwungkipene en doadoahngki Universal Declaration of Human Rights nan December 10, 1948.
Ke Kak Sapeng Peidek Pwukat?
• Ia wehwehn lahn Koht, oh iaduwen atail lahn Koht pahn kak kamwekid kitail?
• Iaduwen atail pahn kak kapahrekihpene wehwehn lahn Koht oh iang Koht weweidwei?
• Iaduwen mehn kahlemeng mwahu en Sises kin kasalehda me lahn Koht kin pid limpoak en Koht?
• Ni ahl dah kei kitail kak kaiahnehda mohngiongitail kan en lahn Siohwa?
[Kilel nan Pali 23]
Nanmwarki en Israel koaros kin ale kaweid en pein ntingihdi nan neirail pwuhk kosonned en Koht oh wadek rahn koaros
[Kilel nan Pali 24]
Siohwa kin kahrehong kitail en likih Ih duwehte pwutak men me kin likih eh pahpa
[Kilel Credit Line nan Pali 21]
Usu kan: Photo by Malin, © IAC/RGO 1991