Ken Loalokong—Lemmwiki Koht!

“Lemmwiki Siohwa iei tepin erpit.”—LEPIN PADAHK 9:⁠10.

1. Dahme kahrehda e kin apwal ohng aramas tohto en wehwehki dahkot lemmwiki Koht?

IE AHNSOU ieu me e wia mehn kaping en koasoia me aramas emen kin lemmwiki Koht. Rahnwet, aramas tohto diarada me madamadau en lemmwiki Koht wia tiahk en mahs ehu, oh sohte aramas kak wehwehki mourih. Irail kak wia peidek wet, ‘Ma Koht me limpoak ah dahme kahrehda ien lemmwiki Ih?’ Ong irail, irair en lemmwiki kin wia mehkot suwed, oh kin e kin kapwunod. Lemmwiki Koht ni mehlel, kin ahneki wehwe tehlap, oh pil nin duwen atail pahn kilang, e sohte ihte wia pepehm en masepwehk.

2, 3. Dahme pil kin pidada en lemmwiki Koht ni mehlel?

² Ni Paipel ah kin mahsanih duwen lemmwiki Koht, e kin mih ni wehwe mwahu. (Aiseia 11:3) Met e kin wiawi ni irair en wauneki mehlel Koht, ineng kehlail ieu en dehr kansensuwedih Ih. (Melkahka 115:11) E kin pil wehwehki pwungki en peipeian teng sapwellimen Koht irair en tiahk mwakelekel akan ah inengieng momourki dahme Koht mahsanih me pwung. Ehu kawehwe kasalehda me soangen lemmwiki pwung wet kin kasalehda “poahsoanpen madamadau lemmwiki Koht me kin imwikihla mwekid erpit oh irehwei sang uhk soahng suwed akan koaros.” E sansal, Mahsen en Koht mahsanihong kitail: “Lemmwiki Siohwa iei tepin erpit.”—Lepin Padahk 9:10.

³ Ni mehlel, lemmwiki Koht kin oarepene soangen mwekid en aramas tohto. E sohte kin ihte sewese kitail en ahneki loalokong oh erpit ahpw e pil kin sewese kitail en ahneki peren, meleilei, pweida mwahu, mour werei, koapworopwor, likilik oh lamalam kehlail. (Melkahka 2:11; Lepin Padahk 1:7; 10:27; 14:26; 22:4; 23:17, 18; Wiewia 9:31) E kin pidada pwoson oh limpoak. Ni mehlel, e kin pidada atail ehuiong Koht oh mehn mpatail akan. (Deuderonomi 10:12; Sohp 6:14; Ipru 11:7) Lemmwiki Koht kin poahsoankihda atail kamehlele me Samatail nanleng kin pein nsenohkin kitail oh kin men ketin mahkohng atail sapwung kan. (Melkahka 130:4) Aramas me sohte kin koluhkihla dipe kelehpw me ahneki kahrepe irail en masak Koht.a—Ipru 10:26-31.

Sukuhliki en Lemmwiki Siohwa

4. Dahme kak sewese kitail en kak “padahngki duwen lemmwiki Siohwa”?

⁴ Pwehki lemmwiki Koht kin kesempwal pwe emen en kak wiahda pilipil erpit oh en alehdi sapwellimen Koht kapai kan, iaduwen atail kak “padahngki duwen lemmwiki Siohwa” ni pwung? (Deuderonomi 17:19) Mehn karasepen tohto en ohl oh lih kan me kin lemmwiki Koht kin kileldi nan Pwuhk Sarawi kin wia “atail mehn kasukuhl.” (Rom 15:4) Pwehn sewese kitail en wehwehkihla ia uhdahn wehwehn lemmwiki Koht, kitail en kousapahlih duwen mour en emen irail akan me wia mehn kahlemeng mwahu, iei Nanmwarki Depit en Israel en kawao.

5. Iaduwen doadoahk en silepen sihpw ah sewese Depit en ese lemmwiki Koht?

⁵ Siohwa sohte kupwurki tepin nanmwarki en Israel, Sohl, pwe e kin masak aramas akan oh sohte lemmwiki Koht. (1 Samuel 15:24-26) Ni pali teio, mour en Depit oh ah kin karanih mehlel Siohwa kin kasalehda me ih aramas lemmwiki Koht emen. Sangete ni ah pwulopwul, Depit kin kalapw apwahpwalih nein seme sihpw akan nan mohs akan. (1 Samuel 16:11) Depit kin pweidi pwohng tohto oh apwahpwalih sihpw akan wasa kan me saladahng pahn usu kan oh kahrehong Depit ah kin wehwehkihla duwen lemmwiki Siohwa. Edetehn Depit kak esehte ekis duwen kapwuriamwei en pahnlahng, e kin kak wehwehki me Koht ketin konehng ale wahu oh kaping. Depit mwuhr ntingihdi, “Ni ei kin kilengdawohng pahnlahng, iei wiepen nin limomwi, maram oh usu kan me komw ketin koasoanedier nan dewerail—dahkot aramas, me komwi kin ketin kupwukupwure; aramas mwahl, me komwi kin ketin apwahpwalih?”—Melkahka 8:3, 4.

6. Iaduwen pepehm en Depit ni ah kilang sapwellimen Siohwa kehl?

⁶ Ni konehng, Depit pwuriamwei ni ah karasapene uwen ah tikitik ong tehlap en lahng wasa me audaudki usu kan. Met sohte kin kamasakada ih, ahpw loalokong wet kin kamwekid ih en kapinga Siohwa ni ah mahsanih: “Ia uwen sansal en pahnlahng eh kasalehda sapwellimen Koht lingan! Ia uwen eh kasalehda mwahu mehkan me eh ketin wiahda!” (Melkahka 19:1) Madamadau wet en wauneki Koht kin kahrehong Depit en karanihala Siohwa oh wiahiong Depit en men sukuhliki oh idawehn sapwellime ahl unsek kan. Nna, medewehla pepehm en Depit ni ahnsou me e koulikihong Siohwa melkahka wet: “Komwi me manaman oh kin ketin wiahda soahng kapwuriamwei kan; komwihte me Koht. Maing Siohwa, komw ketin padahkihong ie audepen kupwuromwien, I ahpw pahn kin loalopwoat peikiong komwi; komw ketin padahkihong ie pwe I en kin papah komwi ni kapehdi unsek.”—Melkahka 86:10, 11.

7. Iaduwen lemmwiki Koht a sewese Depit en peiong Kolaiad?

⁷ Ahnsou me mehn Pilisdia kan kalowehdi sapwen Israel, neirail ohl keieu kommwad Kolaiad me reireiki piht duwau elep kin kapailoke mehn Israel akan oh mwomwen eh koasoi, likamwete e nda: ‘Pilada emen ohl en peiong ie! Ma e kana, se pahn liduwihkumwailla.’ (1  Samuel 17:4-10) Sohl oh nah karis en sounpei ko masepwehkada kowahlap—ahpw Depit sohte masepwehkada. E ese me Siohwa ieite me aramas en masak, a kaidehn aramas, sohte lipilipil ia wen ahn aramaso kehlail. Depit ndaiong Kolaiad, “I pahn peikihong uhk mwaren Siohwa oh aramas koaros wasaht pahn kilang me e sohte ketin anahne kedlahs de ketieu pwe en kapitala sapwellime aramas akan. E kin ketin powehdi nan mahwen, oh e pahn ketikihong kumwail koaros pahn at manaman.” Depit doadoahngki nah pahi oh takai ehu—oh sang ni sapwellimen Siohwa sawas—e katehdi kodono.—1 Samuel 17:45-47.

8. Dahme karasepen irail kan nan Paipel kin padahkiong kitail duwen lemmwiki Koht?

⁸ Kitail ele kin lelohng kahpwal de ahneki imwintihti kan me duwehte ahn Depit. Dahme kitail kak wia? Kitail kak powehdi atail kahpwal kan duwehte me Depit oh aramas lelepek teikan kin wia mahso—lemmwiki Koht. Lemmwiki Koht kak powehdi masak aramas. Sapwellimen Koht ladu lelepek, Nehmaia, kangoangehki ienge mehn Israel akan me kin lelohng kahpwal sang aramas kan me kin uhwong irail mahsanih: “Kumwail dehpa masak atail imwintihti kan. Kumwail tamanda duwen roson oh lemmwiki Siohwa.” (Nehmaia 4:14) Sang sapwellimen Siohwa utuht, Depit, Nehmaia, oh ladu en Koht lelepek teikan kin kana nan arail pwukoa kan me Koht ketikihong irail. Ma kitail kin lemmwiki Koht, kitail pil kak wia duwehte.

Powehdi Kahpwal akan ki Lemmwiki Koht

9. Nan soangen irair dah kan me Depit kin kasalehda lemmwiki Koht?

⁹ Mwurin Depit ah katehdi Kolaiad, Siohwa ketikihong ih kana tohto. Ahpw, ohl peirin Sohl nantihong kemehla Depit—keieu, e inengihada en kemehla Depit, ah mwuri, e kin medemedewehier duwen elen mwersuwed kan en kemehla ih, oh ni imwila, e kihpene karis en sounpei ehu pwe irail en kemehla ih. Mendahkihte Siohwa ah ketin kamehlelehiong Depit me e pahn wiahla nanmwarki men, sounpar tohto Depit kin tangatangseli, pepeiseli, oh awiawih ahnsou me Siohwa pahn ketikihong ih mwoalen nanmwarki. Sang nan irair pwukat koaros, Depit kin kasalehda me e lemmwiki Koht mehlelo.—1 Samuel 18:9, 11, 17; 24:2.

10. Iaduwen Depit a kin kasalehda lemmwiki Koht nan ahnsou apwal?

¹⁰ Ehu pak, Depit rapahkihla ah wasahn ruk rehn Akis, nanmwarki en mehn Pilisdia nan kahnimw en Kad, wasa me Kolaiad kohsang ie. (1 Samuel 21:10-15) Sapwellimen nanmwarkio ladu kan kasawihada me Depit wia imwintihti men en arail wehio. Dahme Depit wia nan irair apwal wet? E wehkohng audepen mohngiongi ni ah kapakap ohng Siohwa. (Melkahka 56:1-4, 11-13) Edetehn e mwomwehda me e sahliella pwe en kak pitila, Depit wehwehki me uhdahn Siohwa me kapitala ih ni ah ketin kapaiada ah wiewia kan. Ahn Depit likih Siohwa ki mohngiong unsek oh koapworopworki ih kasalehda me Depit ni mehlel kin lemmwiki Koht.—Melkahka 34:4-6, 9-11.

11. Iaduwen atail kak kasalehda lemmwiki Koht nan ahnsoun apwal, duwehte me Depit wia?

¹¹ Duwehte Depit, kitail kak kasalehda lemmwiki Koht sang ni atail pahn likih sapwellime inou me e pahn ketin sewesei kitail en powehdi kahpwal kan. Depit mahsanih: “Mweidohng Siohwa pein kowe; likih, e ahpw pahn seweseiuk.” (Melkahka 37:5) Met sohte wehwehki me kitail pahn kesehiong Siohwa atail kahpwal koaros oh sohte wia uwen me kitail kakohng oh kasik me Siohwa en ketin kelehpwiki ah kamwahuwihala atail kahpwal kan. Depit sohte kapakap ohng Koht oh ih eri kesehla mehkoaros oh sohte wia mehkot. E doadoahngki ah koahiek en paliwar oh loalokong me Siohwa ketikihong ih pwehn kamwahuwihala kahpwal me mie ahnsowo. Ahpw, Depit mwahngih me kitail sohte kak koapworopworkihte doadoahk en aramas kelehpw. Kitail anahne pil ahneki soangen pepehm de madamadauohte. Ni atail wiahier soahng koaros me kitail kak wia, kitail kihong luhwe koaros rehn Siohwa. Ni mehlel, pak tohto sohte mehkot kitail kak wia ihte kitail en likih Siohwa. Met iei ahnsou me lemmwiki Koht kin sansalda. Kitail kak ale kamweit sang sapwellimen Depit mahsen en kangoang me mahsanih: “Siohwa kin ketin kompoakepahnki irail kan me kin lemmwiki Ih.”—Melkahka 25:14.

12. Dahme kahrehda kitail anahne kesempwaliki atail kapakap akan, oh soangen madamadau dah me kitail dehr ahnekihda?

¹² Kahrehda, kitail kak mehleliong atail kapakap oh atail nanpwung mwahu rehn Koht. Ni atail pahn kohdo rehn Siohwa ni kapakap, kitail en “kamehlele me Koht ketin mie, oh me Koht kin ketin katingih irail kan me kin raparapahki.” (Ipru 11:6; Seims 1:5-8) Oh ni ah pahn sewese kitail, kitail en ‘kasalehiong ih kalahngan,’ nin duwen me wahnpoaron Pohl kaweidkin kitail. (Kolose 3:15, 17) Emen Kristian me keidi kasalehda me kitail en dehr ahneki soangen pepehm me ekei aramas kin ahneki me duwehte met: “Irail kin wiahki Koht ladu men en nanleng. Ni arail kin mwahuki mehkot, irail pahn kin kaposehte sendin pehrail kan ah e pahn ketido oh wia dahme irail mwahuki. Ni arail kin alehier dahme irail kin mwahuki, irail kin men Koht en kohkohla.” Soangen madamadau wet kin kasalehda me re sohte lemmwiki Koht.

Ahnsou me Lemmwiki Koht kin Tikitikla

13. Ahnsou dah me Depit sohte kasalehda wauneki Kosonned en Koht?

¹³ Sang ni Depit ah kin alehdi sapwellimen Siohwa sawas ni ahnsou en apwal, met kin kaloalehla ah lemmwiki Koht oh kakehlailihala ah likih ih. (Melkahka 31:22-24) Ahpw, nan irair dehde siluh, ahn Depit lemmwiki Koht kin tikitikla, oh met kin kahrehdo apwal laud. Me keieu kin pidada ah koasoanehdi Sapwellimen Siohwa Kohpwahn Inouo en wisiksang Serusalem pohn kuruma ah kaidehn pohn pwopwen ohlen Lipai kan nin duwen me Kosonned en Koht kin kaweidki. Ni ahnsou me Ussa, ohl me kahluwa kuruma, parok Kohpwahn Inouo pwe en dehr pwupwudi, e mehlahte wasao, pwehki eh “sohte wauneki kohpwao.” Ei, Ussa wiahda dihp laud, ahpw ni mehlel ahn Depit sohte wauneki sapwellimen Koht Kosonned me kahrehda kahpwal laud wet. Lemmwiki Koht kin wehwehki en wia duwehte dahme e ketin koasoanehdi.—2 Samuel 6:2-9; Nempe 4:15; 7:9.

14. Dahme imwikihla ahn Depit eh wia wadawad en sounpei kan nan Israel?

¹⁴ Mwuri, Sehdan kamwekid Depit en wia wadawad en sounpei kan nan Israel. (1 Kronikel 21:1) Ni ah wia met, Depit kin kasalehda me ah lemmwiki Koht kin tikitikla, met kin kahrehda mehn Israel 70,000 mehla. Edetehn Depit koluhla mwohn Siohwa, ih oh irail kan me iang ih kin alehdi lokolok laud.—2 Samuel 24:1-16.

15. Dahme elehda Depit en pwupwudiong nan dipen kamwahl?

¹⁵ Ehu irair en tikitiklahn lemmwiki Koht en lepin ahnsou me Depit wia iei me kahrehiong ih en wia dihp ohng Padsipa, ahn Uraia pwoud. Depit mwahngih me kamwahl de pil inangihada ahn emen pwoud sapwung. (Eksodus 20:14, 17) Kahpwalo tepidahr ni ahnsou me Depit kilangada Padsipa ni a wie duhdu. Ma Depit lemmwiki Koht ni mehlel, e pahn mwadangete kilengsang oh kasau ah madamadau ohng ekis wasa tohrohr. Ahpw soh, e sansal me Depit ‘kilikilang’ Padsipa lao ineng suwed powehdi ah lemmwiki Koht. (Madiu 5:28; 2 Samuel 11:1-4) Depit manokehla me Siohwa kin ketin pid wiewia koaros en ah mour.—Melkahka 139:1-7.

16. Soangen kahpwal dah kan me Depit pwehki sapwung me e wiahda?

¹⁶ Ahn Depit tiahk samin rehn Padsipa kahrehda ipwidi en seri pwutak emen. Mwurinte mwo, Siohwa poaronehdo sapwellime soukohp Nadan en kasalehda dipen Depit. Mwurin eh kapwurehdo madamadau en Depit, e pwurehng alehda irair en lemmwiki Koht oh koluhla. E ngidingid peki rehn Siohwa en dehr kesehla ih de ketikihsang ih sa pwe llime ngehn sarawi. (Melkahka 51:7, 11) Siohwa mahkohng Depit oh katikala ah kalokolok, ahpw e sohte ketin perehsang Depit soangen suwed koa ros me kohsang ah wiewia kan. Sapwellimen Depit pwutako mehla, oh sangehr ahnsowo kohla ah peneinei lelohng kamedek oh apwal tohto. Met inenen wia luhs laud ohng ih pwehki tikitiklahn ah lemmwiki Koht!—2 Samuel 12:10-14; 13:10-14; 15:14.

17. Karasahda uwen mohngiong medek me dihp kin kahrehdo?

¹⁷ Rahnwet, sohte lemmwiki Koht kin pid atail tiahk mwakelekel oh pil kak kahrehda imwila suwed me laud oh kak mihmi ahnsou werei. Medewehla medek me lih pwulopwul men ahneki ni ah esehda me ah pwoud ohl Kristian emen kin salelepek ohng ih ni ah seiloakla oh doadoahk ni ehu sahpw tohrohr. E kospenehki ah pwuriamwei oh nsensuwedla, ih kolpene mese oh mwahiei laud. Ia uwen werei en ah pahn kak pwurehng likih oh wauneki ah pwoudo? Soangen imwila suwed pwukat kak irairdi ma aramas kin lemmwiki Koht ni mehlel.—1 Korint 6:18.

Lemmwiki Koht Pahn Koledi Kitail Sang Wiahda Dihp

18. Ia ahn Sehdan mehn akadei oh ah wiepen doadoahk?

¹⁸ Sehdan kin nantihong kauwehla tiahk mwahu en tohnsampah, oh e kin inenen men kauwehla en Kristian mehlel kan arail pali ngehn. Ni ahl wet, e pahn kin doadoahngki ahl me kin inenlahngete atail mohngiong oh madamadau—sang ni ah doadoahngki atail wasahn kilang oh wasahn rongorong. (Episos 4:17-19) Dahme ke pahn wia ma ke sohte kasik ah kilel suwed de lokaia samin ahpw kohda de ke tuhwong aramas me kin mour suwed?

19. Iaduwen lemmwiki Koht ah kin sewese Kristian emen en powehdi ah kasongosong?

¹⁹ Medewe duwen dahme wiawihong André,b me wia Kristian elder men, pahpa men, oh toahkte men nan Iurop. Ni ahnsou me André kin doadoahk en pwong nan imwen winio, toahkte lih akan kin kalap ntingihada kisinlikou, oh mahlenihedi mohngiong oh kihong ni ah uluhl, oh kin peki reh en wendihong irail. André sohte kin dukiong irail. Eri, pwehn kihsang ih nan wasahn doadoahk suwed wet, e rapahkihda ah doadoahk ekis wasa tohrohr. E sansal me lemmwiki Koht kin wia ahl me keieu loalokong oh kin imwikihla kapai kan, pwe rahnwet André kin papah lepin ahnsou nan Branch Ohpis en Sounkadehdehn Siohwa kan nan ah wehio.

20, 21. (a) Iaduwen lemmwiki Koht a kak sewese kitail en dehr wiahda dihp? (b) Dahme kitail pahn sukuhliki nan artikel en mwuhr?

²⁰ Medemedewe duwen mehkan me suwed kak imwikihla irair en madamadau ieu me aramas emen pahn men kesehkihla eh nanpwung mwahu rehn Siohwa pwe en alehdi mehkot me sohte ah pwung en ahneki. (Seims 1:14, 15) Weksang met, ma kitail lemmwiki Siohwa, kitail pahn kadohwaneweisang kitail—de pil aluhweisang—aramas kan, wasa kan, wiewia kan, oh mehn kamweit kan me kak wiahiong kitail en sohla nsenohki atail tiahk mwakelekel. (Lepin Padahk 22:3) Sohte lipilipil soangen kanamenek me kitail lelohng de tounmetei me kitail wia, e sohte pahrekiong atail pahn katihasang kupwur mwahu en Koht. (Madiu 5:29, 30) Lemmwiki Koht kin pidada kitail en dehr karanih soangen tiahk samin soh lipilipil kan, iangahki kilang kilel suwed ni soangen mwohmw koaros, ahpw kitail en kanahieng masatail kan “en dehr kilang soahng soh katepe kan.” Ma kitail pahn wia met, kitail kak likih me Siohwa pahn ketin ‘kolokol atail mour’ oh ketikihong kitail mehkan me kitail uhdahn anahne.—Melkahka 84:11; 119:37.

²¹ Ni mehlel, mwekidiki lemmwiki Koht ni mehlel kin ahnsou koaros wia elen erpit. E pil kin wia utupen peren mehlel. (Melkahka 34:9) Artikel en mwurin met pahn kawehwehda mwahu duwen met.

[Nting tikitik me mi pahs]

Ke Kak Kawehwehda?

• Soangen irair en Kristian dah kan me kin pidada lemmwiki Koht?

• Iaduwen lemmwiki Koht ah kin powehdi masak aramas?

• Iaduwen atail kak kasalehda me kitail ahneki madamadau pwung ong kapakap?

• Iaduwen lemmwiki Koht ah pahn pere kitail sang wiahda dihp?

[Kawehwehpen kilel kan nan ehu ehu pali 9]

Depit sukuhliki duwen lemmwiki Koht ni ahnsou me e kin kilikilang sapwellimen Siohwa doadoahk en kapikada kan

[Kawehwehpen kilel kan nan ehu ehu pali 10]

Dahme ke pahn wia ni ahnsou me ke pahn lelohng kasongosong ieu?