Lemmwiki Siohwa—Wie Pereperen!

“Meid pai aramas me kin lemmwiki Siohwa.”—MELKAHKA 112:1.

1, 2. Dahme lemmwiki Siohwa kak kahrehdo?

EREN sohte kin mengei en diar. Peren mehlel kin kohsang ahn emen a kin wia pilipil pwung, wia dahme mwahu, oh sohpeiweisang dahme suwed. Sounwiapatail, Siohwa, ketikihong kitail sapwellime Mahsen, Paipel, pwehn sukuhlikin kitail iaduwen atail kak perenki mour me keieu kaselel. Sang ni atail kin rapahki oh idawehn sapwellimen Siohwa kaweid, oh eri kasalehda lemmwiki Koht, kitail kak ahneki nsenamwahu mehlel oh peren.—Melkahka 23:1; Lepin Padahk 14:26.

² Nan artikel wet, kitail pahn tehkpene mehn karasepen Paipel oh ohng atail ahnsou kan me kin kasalehda iaduwen lemmwiki Koht ni mehlel ah kin kihong aramas kehl en powehdi kahpwal en wia me sapwung oh ahneki madamadau en eimah en wia me pwung. Kitail pahn diarada me lemmwiki Koht kak kahrehong kitail peren pwe e kin kamwakid kitail en kapwungala wiewia sapwung, duwehte me Nanmwarki Depit wiahier. Kitail pil pahn diarada me lemmwiki Siohwa kin wia sohso kesempwal ieu me pahpa oh nohno kak kihong neirail seri kan. Ni mehlel, Mahsen en Koht kin kamehlelehiong kitail oh mahsanih: “Meid pai aramas me kin lemmwiki Siohwa.”—Melkahka 112:1.

Kapwurehdo Peren Me Salongalahro

3. Dahme sewese Depit en maiauda sang dipe kan?

³ Duwen me sansal nan artikel en mwohn met, nan irair dehde siluh Depit sohte kasalehda lemmwiki Koht ni pwung oh ih eri wiahda dihp. Ahpw, ah mwekidiki sapwellimen Siohwa kaweid kin kasalehda me ni mehlel e wia aramas emen me kin lemmwiki Koht. Ah lemmwiki oh wauneki Koht kin kahrehiong en wehkada ah sapwung, kapwungala ah wiewia, oh pwurehng kamwahuwihala ah ehuiong Siohwa. Mendahte ah sapwung kan kin wahdohng ih oh meteikan apwal, ahpw ah koluhla mehlel kin kahrehiong Siohwa ah ketiketkihdahte utuht oh kapai. En Depit mehn kahlemeng mwahu kak ni mehlel kihong lamalam kehlail ohng Kristian akan nan rahnwet me kin kak wiahda dihp toutou ieu.

4. Iaduwen lemmwiki Koht ah pahn kak sewese aramas emen en pwurehng alehda peren?

⁴ Kitail pahn kasawih dahme wiawiong emen sister adaneki Sonja.a Mendahte a kin wia sounkalohk kaukaule men, Sonja tepida werek suwed, oh wiahda tiahk me sohte konehng Kristian, oh pisikensang nan mwomwohdiso en Kristian. Ni ah diaradahr ah sapwung, Sonja wia soahng koaros me anahn pwehn onehda sapahl nanpwungen ih oh Siohwa. Mwuri, e kapwurpwurdo nan mwomwohdiso. Nan erein ahnsowo, Sonja sohte tokedihsang ahneki ineng en papah Siohwa. Mwurin ahnsoukis, e pwurehng wiahla sounkalohk kaukaule men. Mwuhr, e pwoudikihda elder Kristian emen, oh met e kin peren oh iang ah pwoud papah nan mwomwohdiso. Edetehn Sonja nsensuwedkihla ah pwupwusang nan elen Kristian lepin ahnsou, e kin peren pwe ah lemmwiki Koht kin sewese ih pwurodohng rehn Siohwa.

E Mwahu en Lokolok Sang Wiahda Dihp

5, 6. Kawehwehda iaduwen oh dahme kahrehda Depit pak riau sohte kemehla Sohl.

⁵ E kin wia kamwahu ieu ni lemmwiki Koht ah kin sewese aramas emen en irehweisang ih wia dihp laud ehu. Met iei me wiawi ohng Depit. Ahnsou ieu mahs, Sohl wahda sapwellime sounpei silikid oh raparapahki Depit, ih ketilohng nan pwoahr ehu—wasa me Depit oh nah ohl akan pil wie rukuruk loale. Nein Depit ohl akan padahkihong ih en kemehla Sohl. Siohwa soh ketikihong nan pehn Depit ah imwintihtio? Depit waila limwahn Sohl oh lupukasang imwin ah likou reirei. Pwehki Depit lemmwiki Koht, wiewia wet me likamwete sohte katepe kin inenen lidere ah nsen mwakelekel. Depit dorehdi nah ohl akan me lingeringerdahr oh mahsanih: “Kauno en ketin irehdi sang ie pwe I en dehr wiahiong mehkot suwed ong ei kaun, me Kauno ketin pilada pwe en nanmwarki.”b—1 Samuel 24:1-7.

⁶ Ehu pak mwuhr, Sohl kommoaldi wasakis ni pwong, oh “Kauno ketin kameirkelikih” ih oh sapwellime ohl akan koaros. Depit oh me e pahn naineki me ede Apisai eri wailong nanpwungarail oh kesihnenda pohn Sohl ni ah meir kelik. Apisai men kemehla ih oh kaimwisekala soahng koaros. Depit irehdi ahn Apisai lamalam oh eri mahsanih ong ih: “Siohwa pahn uhdahn ketin kaloke mehmen me pahn wiahiong sapwellime nanmwarki pilipil mehkot suwed.”—1 Samuel 26:9, 12.

7. Dahme kapweiek Depit sang wiahda dihp?

⁷ Dahme kahrehda Depit sohte kemehla Sohl ni pak riau mie ah ahnsou mwahu en wia met? Pwehki e lemmwiki Siohwa laudsang ah masak Sohl. Pwehki e ahneki wehwe pwung ong lemmwiki Koht, Depit mwahuki mih nan apwal sang e pahn wiahda dihp. (Ipru 11:25) E kin likih Siohwa ni unsek me e pahn ketin apwalih sapwellime kan oh pil apwalih Depit. Depit ese me peikiong oh likih Koht pahn wahdo peren oh kapai tohto, ahpw pohnsehse Koht pahn kahrehda engieng en Koht. (Melkahka 65:4) E pil ese me Koht ketin kapwaiada sapwellime inou en wiahkihla Depit nanmwarki oh pahn ketikihsang Sohl ni pein sapwellime ahnsou oh sapwellime ahl.—1 Samuel 26:10.

Lemmwiki Koht Kin Wahdo Peren

8. Iaduwen wiewiahn Depit pahn apwal wia mehn kahlemeng ehu ohng kitail?

⁸ Nin duwen atail wia Kristian kei, kitail en kasik kapailok, kalokolok, oh kasongosong kan. (Madiu 24:9; 2 Piter 3:3) Ekei pak, kitail kak lelohng irair apwal akan sang rehn iengetail tohnkaudok kan. Ahpw kitail ese me Siohwa mwahngih mehkoaros, kin karonge atail kapakap akan oh, ni ahnsou me konehng, pahn kapwungala soahng kan en pahrekiong kupwure. (Rom 12:17-21; Ipru 4:16) Kahrehda, kitail en dehr masak me kin uhwong kitail akan, a kitail en lemmwiki Koht oh sohpeiong Ih pwehn ketin kamaiaukitailada. Kitail en kin kahlemengih Depit, kitail dehr dupuk, oh pil dehpa pangala kaweid pwung kan pwe dene kitail en pitsang nan lokolok. Ni imwio, met pahn wahdo peren. Ahpw iaduwen met ah pahn wahdo peren?

9. Kihda ehu karasepen iaduwen lemmwiki Koht a kak imwikihla peren mendahki kalokolok.

⁹ Emen misineri me wereila nan Africa koasoia met, “I kin tamanda mehn karasepe mwahu en nohno men oh nah serepein pwulopwul me sohte iang pwainda doaropwehn palien politik pwe re dehr kauwehla ara irair en Kristian me soh poupali. Mwutumwut en ohl ieu keme ira oh ndahiong ira en kohkohla ni imwara. Ni ara alialu kohla, nohno song en kamweitih kapehden nah serepeino me wia sengiseng, pwe e sohte wehwehki dahme kahrehda met wiawihong ira. Ahnsowo ira sohte peren, ahpw ara nsen mwakelekel mwahu. Mwurin mwo, ira inenen peren pwehki ara peikiong Koht. Ma ira iang pwainda doaropwehn politiko, mwutumwut en aramaso pahn pereperen. Ohl oko pahn kihong ira pwoatol en saida, oh kahkahlek pidapidahkih ira kohkohla lel ni imwarao. Ahpw serepeino oh ah nohno, ni ara ese ma ira pahn kahmahmkihla ara pwoson, ira pahn wia aramas keieu nsensuwed nan sampah.” Ara lemmwiki Koht kapitasang ira nan soangen irair wet.

10, 11. Imwila mwahu dah kan me pwarada sang ahn lih emen a lemmwiki Koht?

¹⁰ Kasalehda lemmwiki Koht pil kin wahdo peren nan ahnsou en kasongosong me pid kesempwal en mour. Ahnsou me Mary liseianki nah seri kesilimen, toahkte ndahiong en kemehla ah liseiano. Toahkte nda, “Irair me ke mih loale inenen keper. Mehkot laud oh keper kak pwarada oh ke kak mehla nan erein awa 24. Oh noumw serien pil pahn iangete mehla. Sohte lipilipil dahme pahn wiawi, I sehse ma noumw serien sou pahn ipwidi poakolong.” Mary kin onop Paipel rehn Sounkadehdehn Siohwa kan ahpw saikinte papidaisla. Mary eri nda, “Sohte lipilipil dahme pahn wiawi, I koasoanedier ien papah Siohwa, oh I wiadahr koasoandi kehlail ieu me I pahn peikiong ih.”—Eksodus 21:22, 23.

¹¹ Ahnsou me e liseian, Mary kin kedirepwki wiewia ah onop Paipel oh apwahpwalih ah peneinei. Mwuhr serio ipwidi. Mary eri koasoia, “Neitiko ekis apwal sang ahi neitik riau mehn mwowe ko, ahpw sohte kahpwal laud me pwarada.” Lemmwiki Koht sewese Mary en kolokol ong pein ih ah nsen mwakelekel, oh mwuri ekis e papidaislahr. Nin doken serio ah laudla, e pil sukuhliki en lemmwiki Siohwa, oh ahnsouwet e iang papah nan ehu Branch Ohpis en Sounkadehdehn Siohwa kan.

‘Kehlailkihda Kehl Sang Rehn Siohwa’

12. Iaduwen lahn Koht ah kakehlail Depit?

¹² Ahn Depit lemmwiki Siohwa sohte kin ihte irehsang ih wia dihp. E pil kin kakehlail ih en wiahda pilipil ni soh peikasal oh erpit nan irair apwal akan. Erein sounpahr ehu oh sounpwong pahieu, Depit oh nah ohl akan rukuruk sang Sohl nan Siklak nan wehin Pilisdia. (1 Samuel 27:5-7) Ehu ahnsou me ohl akan sohte mih nan kahnimwo mehn Amalek lemei kan isikada kahnimwo oh wahsang lih akan, seri kan oh mahn akan. Ni Depit ah sapahldo oh diarada dahme wiawihier, Depit oh sapwellime kan sengiseng. Mwahiei mwadangete wekidekiong kailok, oh sapwellimen Depit ohl ako koasoia me re katepwekehdi ih. Edetehn e mih nan pwunod, Depit sohte kin mworusala. (Lepin Padahk 24:10) Ah lemmwiki Koht kin kamwekid ih en sohpeiong Siohwa, oh e “kehlailkihda kehl sang rehn Siohwa.” Sang ni sapwellimen Koht sawas, Depit oh sapwellime ohl akan kalowehdi mehn Amalek kan oh kapwurehdo soahng koaros.—1 Samuel 30:1-20.

13, 14. Iaduwen lemmwiki Koht ah kin sewese Kristian emen en wiahda pilipil mwahu?

¹³ Sapwellimen Koht ladu kan rahnwet pil kin loiong irair akan me pil anahne ren kin likih Siohwa oh ni lamalam kehlail wiahda pilipil konehng. Kitail kilang karasepe me pid Kristina. Ni Kristina a tikitik, e onop Paipel rehn Sounkadehdehn Siohwa kan. Ahpw e men wiahla emen soun piano nan pwihn en koul, oh e inenen nannantihong nan ah rapahki met. Laudsang met, e kin namenek iang kalohk oh ih eri masak wia pwukoah kan me e pahn wia ma e papidaisla. Nin doken Kristina ah wie onohnopte Mahsen en Koht, e tepida kilang kehl en Mahsen en Koht. E sukuhliki duwen lemmwiki Siohwa, oh ih wehwehkidahr me Siohwa kupwurki sapwellime ladu kan en poakohng Ih ki mohngiong unsek, lamalam unsek, ngehn unsek oh kehl unsek. (Mark 12:30) Met kamwekid ih en inoukihda ah mour ong Siohwa oh eri papidaisla.

¹⁴ Kristina peki rehn Siohwa sawas en kalaudehla ah irair en pali ngehn. E kawehwehda nda, “I ese me mour en soun piano men kin pidada kalap seiloak oh contract kan en keseng kereniong pak 400 nan ehu pahr. Kahrehda, I uhd koasoanehdi en wiahla sounpadahk en sukuhl pwe ien kak apwalih ie oh wia sounkalohk kaukaule men.” Ni ahnsowo, koasoandi wiawihda pwe Kristina en wia keieu en ah kapwar keseng nan imwi keseng wadawad nan sapwarail. Kristina koasoia, “Ahi kapwar kesengo wia keieu en ahi pwarada mwohn wehi pokon oh pil kaimwisekla.” Mwurin mwo, Kristina pwoudkihda elder Kristian emen. Met ira kin doadoahk nan ehu Branch Ohpis en Sounkadehdehn Siohwa kan. E inenen perenki pwe Siohwa ketikihong ih kehl en wiahda pilipil pwung oh ahnsou wet e kak doadoahngki ah ahnsou oh kehl nan sapwellime doadoahk.

Sohso Kesempwal

15. Dahme Depit men kihong sapwellime seri kan, oh iaduwen ah wia met?

¹⁵ Depit ntingihdi, “Kohdo, kumwail kompoakepahi pwulopwul kan, oh rong ie, pwe I pahn padahkihong kumwail duwen lemmwiki Siohwa.” (Melkahka 34:11) Nin duwen pahpa men, Depit kin men kihong sapwellime seri kan sohso kesempwal—lemmwiki Siohwa ni mehlel, toupahrek, oh pwung. Sang ni lokaia oh wiewia, Depit kin kasalehda me Siohwa kin limpoak, nsenoh, oh kin ketin mahk ong sapwellime seri kan nan sampah, ah kaidehn Koht emen me kin idihd oh kamasepwehk, de kin raparapahki sapwung tikitik koaros me aramas kin wia ong sapwellime kosonned akan, ahpw e kin ketin wia Sahm emen me ketin limpoak, nsenoh, oh kin ketin mahk ong Sapwellime seri kan nan sampah. Depit wia peidek wet: “Ewen kahk sapwung kan ihs me kak ese?” Oh mwuri, e kasalehda ah kin likih me Siohwa sohte kin ahnsou koaros kasakasawih atail sapwung kan, ni ah kapatahiong: “Komw ketin doareiesang soangen sapwung me sohte sansal akan!” Depit wehwehki me ma e pahn wia wen ah kak, ah koasoi oh madamadau kan Siohwa pahn kupwurki.—Melkahka 19:12, 14.

16, 17. Iaduwen pahpa oh nohno kan kak padahkiong seri kan duwen lemmwiki Siohwa?

¹⁶ Depit wia mehn karasepe mwahu ohng pahpa oh nohno kan en rahnwet. Ralph me ih oh rie pwutak kin papah nan Branch Ohpis en Sounkadehdehn Siohwa kan koasoia: “Ahi pahpa oh nohno kekeirkitada ni ahl me wiahiong padahk mehlel en kaperen. Ni ahnsou me se pwulopwul, ira kin wia pwe sen kisehn ara koasoakoasoipene kan me pid wiewia kan nan mwomwohdiso, oh kiht kin ngoangki oh perenki soahng kan me pidada padahk mehlel duwen me re kin wia. Ira kin kekeirkitada en kamehlele me e pahn katapan ohng kiht ma se wia doadoahk en Siohwa. Ni mehlel, erein pahr tohto aht peneinei kin kousoan nan sahpw ehu me anahnepen sounkalohki Wehio kan inenen anahnepe laud oh pil anahnepen sounsawas en kauwada mwomwohdiso kapw akan.

¹⁷ “Dahme kin kolokol ohng kiht nan ahl pwung kaidehn diren kosonned de keinepwih tohto kan, ahpw pwehki ohng aht pahpa oh nohno, Siohwa uhdahn mie oh inenen kadek oh mwahu. Ira kin inengieng kalaudehla ara ese Siohwa oh en kaperenda ih, oh se kin ale mehn kasukuhl laud sang ara kin mehlel nan ara lemmwiki Koht oh limpoak ohng ih. Pil ahnsou ma se wiahda mehkot sapwung, aht pahpa oh nohno sohte kin wiahiong kiht en ahneki pepehm me Siohwa solahr limpoak ohng kiht, oh sohte kin lingeringer oh kihong kiht soangen irehsang kiht mehkan me sohte katepe en wia. Pali laud en ahnsou, ira kin ka­mwohd­ang­kit­edi oh koasoiong kiht, ekei pak nohno kin koasoi ah pilen mese kin dahrpene, oh kin nannantihong ah koasoi en lel aht mohngiong. Oh met kin pweida mwahu ohng kiht. Se sukuhlikihsang ni ahn aht pahpa oh nohno koasoi oh wiewia kan me lemmwiki Siohwa wia mehkot lingan oh me en wia emen sapwellime Sounkadehde kan wia mehkot kaperen oh kansenamwahu ah kaidehn katoutou ieu.”—1 Sohn 5:3.

18. Dahme kitail pahn alehsang atail kin lemmwiki Koht mehlel?

¹⁸ Nanpwungen “kaimwiseklahn mahsen en Depit akan,” kitail wadek: “Nanmwarki me kin kaunda ni pwung, me kin kaunda ni lemmwin Koht, kin rasehng marain en ketipin me kin dakada nimenseng ni eh kin sohte depwek.” (2 Samuel 23:1, 3, 4) Solomon, sapwellime Depit ohl me uhd wiliandi ih, sansal me e koledi erpit en mahsen pwukat, pwe peki me Siohwa en ketikihong ih “mohngiong peik” oh koahiek en “kasawihada wekpeseng en dahme mwahu oh dahme suwed.” (1 Nanmwarki 3:9) Solomon wehwehkidahr me lahn Siohwa iei elen erpit oh peren. Mwuhr, e oaralapihada pwuhken Eklesiasdes ki mahsen pwukat: “Mwurin mepwukat koaros, meteieu me I pahn nda: lemmwiki Koht, oh kapwaiada sapwellime mahsen, pwehki ih kahrepe wet me aramas kepikipikihda. Koht pahn ketin kadeikada atail wiewia koaros, mehnda ma suwed de mwahu, mehnda ma pil mehkot me wiawi ni rir.” (Eklesiasdes 12:13, 14) Ma kitail pahn kapwaiada audepen kaweido, kitail uhdahn pahn diar me “imwilahn karakarahk oh lahn Siohwa”kaidehnte ihte erpit oh peren ahpw pil “kepwehpwe oh lingan oh mour.”—Lepin Padahk 22:4.

19. Dahme pahn wiahiong kitail en wehwehkihla “lemmwiki Siohwa”?

¹⁹ Sang ni karasepen Paipel akan oh ekspiriens kan nan atail ahnsou, kitail kilang me lahn Koht ni pwung kin kaweid mwahu ong ladu mehlel kan en Siohwa. Soangen lahn wet sohte kin ihte pere kitail sang wia dahme Samatail nanleng sohte ketin kupwurki, ahpw e kak pil kihong kitail lamalam kehlail ahnsou me kitail kin tuhwong uhwong kan oh kihong kitail kehl en powehdi atail kasongosong kan oh kahpwal akan me kin lelohng kitail. Kahrehda, kitail koaros pwulopwul de mah, en kin lelepek ong atail onop Mahsen en Koht, doudouloale dahme kitail sukuhliki, karanih Siohwa ni atail kin kaukaule oh kapakap ong nan mohngiongatail akan. Ni atail kin wia met, kitail pahn kaidehn diarete “loalokong me pid duwen Koht” ahpw pil wehwehkihla “lemmwiki Siohwa.”—Lepin Padahk 2:1-5.

[Nting tikitik me mi pahs]

Ke Kak Kawehwe?

Iaduwen atail en kin lemmwiki Koht

• sewese emen en maiau sang dihp laud?

• ahneki peren pahn kalokolok oh kamakam?

• kakehla kitail en wia kupwuren Koht?

• wia sohso kesempwal ieu ohng neitail seri kan?

[Kawehwehpen kilel kan nan ehu ehu pali 13]

Lemmwiki Siohwa irehdi Depit sang kemehla Nan­mwarki Sohl

[Kawehwehpen kilel kan nan ehu ehu pali 15]

Lemmwiki Koht iei sohso kesempwal me pahpa oh nohno kan kihong neirail seri kan