Peidek kan Sang Sounwadawad kan
Iaduwen serpento nan mwetuwel en Ihden ah kin kasalehiong Ihp madamadau en kauwehla sapwellimen Koht kosonned me pid tuhkehn kehsehki aramas dahme mwahu oh dahme suwed?
Senesis 3:1 mahsanih: “Eri, sineik [serpent] ih mahn me keieu mwersuwed nanpwungen mahn akan me Kauno [“Siohwa,” New World Translation] Koht ketin wiahda. E ahpw idekda rehn liho, ‘Mehlel apwoat me Koht ketin keinepwihsang kumwa en dehr tungoale wahntuhke kan en nan mwetuwelet?’ ” Soangen madamadau tohto mie me kawehwe iaduwen serpento a kak koasoiong Ihp. Ehu madamadau me dene e wia met ni ah lokaia ni mwekid en paliwere. Karasepe, ohlen England Joseph Benson koasoia: “E konehng me kitail en medemedewe me ki lokaiahki paliwere (depada) me wiawi. Ekei aramas pil kamehlele me ele serpent kin kak madamadau oh lokaia mahso, . . . ahpw met sohte mehn kadehde me kak kamehlelehda.”
Eri, iaduwen lokaiakihte paliwere serpento ah kak ndaiong Ihp me ni ah pahn kang wahn tuhke me keinepwiho, e pahn duwehla Koht, kakehr ese dahme mwahu oh dahme suwed? Oh laudsang met, Ihp pil iang koasoi oh sapeng en serpent eh peidek. (Senesis 3:2-5) Madamadau me dene serpento lokaiakihte mwekid en paliwere pahn kihong aramas en pil lemeleme me Ihp pil sapeng serpento ni a lokaiahki peh, ahpw Paipel mahsanih me e lokaia ni koasoi.
Ni wahnpoaron Pohl ah kawehwe duwen dahme wiawi, e kalekehki rie Kristian kan: “I perki ma amwail lamalam akan pahn sapwungala oh kumwail pahn kesehla amwail loalenohng Krais—duwehte Ihp eh lohdiong pahn widing en sineiko.” Keper me Pohl koasoia kohsang rehn “wahnpoaron likamw kan, tohndoadoahk mwersuwed kan.” Keper me “wahnpoaron lapalap” pwukat sohte pidete lokaiahki paliwar oh mwekid en mahs. E kin pid lokaia—arail lokaiahn mwersuwed mehn pitihedi aramas teikan.—2 Korint 11:3-5, 13.
Edetehn lokaia me doadoahk pwehn kaweid sapwungihala Ihp nan mwetuwel en Ihden, sohte mehkot nda me serpento mie takain kepinwere mehn lokaia. Ni mehlel, e sohte anahne. Ni ahnsou me sapwellimen Koht tohnlengo lokaiahng Palaam ni ah doadoahngki nah ahs, mahno sohte anahne wasahn lokaia me duwehte ahn aramas. (Nempe 22:26-31) E sansal mwahu me ahnsou me ‘mahn sohte ngile menet me tihwohla a lokaia duwehte aramas,’ kehl en wia met kohsang nan sapwen ngehn akan.—2 Piter 2:16, NW.
Ngehn me kamwekid serpento me lokaiahng Ihp, Paipel kin kawehwehda me iei ih “serpent en mahso, me adaneki Tepil de Sehdan.” (Kaudiahl 12:9) Ngilen lokaia ko me Ihp rongehr ah sapengehr ko kohsang ni sawas en Sehdan, me kin “kawekila pein ih oh mwomwehda tohnleng en marain.”—2 Korint 11:14.
[Kilel nan Pali 19]
“Kumwa pahn marainla oh duwehla Koht, pwe kumwa pahn esehla dahme mwahu oh dahme suwed”