Koht Me Ketin Lapalap Sang Koaruhsie

I ESE me ke pwungki me mie me lapalap oh kehlail sang kitail koaros. Ihs met?— Siohwa Koht. Ia duwen sapwellime Ohl, Sounpadahk Lapalapo? E lapalap sang kitail?— Ei, e pil lapalap sang kitail.

Sises kin patopato rehn Koht nanleng. Ih ngehn de tohnleng emen. Ia duwe, Koht pil ketin wiahda tohnleng de ngehn teikan?— Ei, e ketin wiahda tohnleng rar kei. Tohnleng pwukat pil kehlail oh lapalap sang kitail.​—Ipru 1:7; Daniel 7:10.

Ke tamataman eden tohnlengo me lokaiahiong Mery?— Ede Kapriel. E padahkihong Mery me nah serio pahn wia sapwellimen Koht. Koht ketikihong mouren sapwellime Ohlo nan kapehden Mery pwe Sises en kak ipwidi pohn sampah.​—Luk 1:26, 27.

Ke kamehlele wiewia kapwuriamwei wet? Ke kamehlele me Sises kin patopato rehn Koht nanleng mwohn e ketin ipwidi pohn sampah?— Sises mahsanih me ei. Ia duwen Sises eh mwahngih duwen mepwukat? Mwein Mery padahkihong ih ni ahnsou me e tikitik duwen dahme Kapriel padahkihong ih. Oh mwein Sosep pil padahkihong Sises me Koht iei uhdahn Seme.

Ni ahnsou me Sises ketin papidaisla, Koht mahsanih sang nanleng: ‘Kowe iei nei pwutak kompoake.’ (Madiu 3:17) Pwohng mwohn eh pwoula, Sises ketin kapakapki: “Maing Semei! Komw ketin kalinganaiehda mwohn silangomwi ahnsou wet, kalinganahkiniehda linganohte me I ahnekier ni ei patopato rehmwi mwohn sampah wet eh saikinte kepikipikda.” (Sohn 17:5) Ei, Sises ketin peki en pwurala rehn Semeo nanleng. Ia duwen eh pahn kak pwurala nanleng?— Ihte ma Siohwa Koht pahn ketin pwurehng wekidala ih en pwurehng wia emen ngehn de tohnleng.

Eri met I men idek rehmw ehu peidek me kesempwal. Ia duwen, tohnleng kan koaros mwahu? Dahme ke lemeleme?— Nin tapio, irail koaros mwahu. Met pwehki Siohwa me ketin wiahda irail oh soahng koaros me e ketin wiahda me mwahu. Ahpw emen tohnleng pwukat suwedla. Ia duwen met eh wiawi?

Pwehn diar pasapeng, kitail anahne pwuralahng ahnsou me Koht ketin wiahda tepin ohl oh lih, Adam oh Ihp. Ekei aramas kin nda me koasoipen Adam oh Ihp soi likamw pwoat. Ahpw Sounpadahk Lapalapo mwahngih me koasoipen Adam oh Ihp uhdahn mehlel.

Ahnsou me Koht ketin wiahda Adam oh Ihp, e ketikihdiong ira nan mwetuwel kaselel ehu me adaneki Ihden. Wasao iei paradais. Ira kak naineki seri tohto oh momour kohkohlahte nan Paradais. Ahpw mie ire kesempwal ehu me ira anahne ese. Kita koasoiapeneier duwen met. Nna kita pahn kilang ma kita tamataman dahkot met.

Siohwa mahsanihong Adam oh Ihp me ira kak kang soangen wahntuhke koaros nan mwetuwelo. Ahpw mie oapwoat tuhke me ira sohte pahn kang wah. Koht mahsanihong ira dahme pahn wiawi ma ira pahn kang. E mahsanih: “Ke pahn mehkihla.” (Senesis 2:17; 3:3) Eri, ia ire kesempwal me Adam oh Ihp anahne ese?—

Ire kesempwal wet iei peik. Ira kak mour ma ira pahn peikiong Siohwa Koht. E sohte itar Adam oh Ihp en ndahte me ira pahn peikiong ih. Ira anahne kasalehda ara peik sang ni ara wiewia kan. Ma ira peikiong Koht, ira pahn kasalehda me ira poakohng ih oh ira men ih en wia ara Kaun. Eri ira pahn kak mour kohkohlahte nan Paradais. Ahpw ma ira pahn kangasang wahntuhke pwoatet, dahme met pahn kasalehda?—

Met pahn kasalehda me ira sohte kalahnganki dahme Koht ketikihong ira. Ma ke mi wasao, ke pahn peikiong Siohwa?— Nin tapio, Adam oh Ihp kin peik. Ahpw mwuhr emen me kehlail sang ira pitihedi Ihp. E kahrehiong Ihp en sapeikiong Siohwa. Ihs mwo?—

Paipel kasalehda me sineik emen lokaiahiong Ihp. Ahpw ke ese me sineik sohte kin kak lokaia. Eri ia duwen sineiko eh kak lokaia?— Emen tohnleng me kahrehda e mwomwen me sineiko me lokolokaia. Ahpw uhdahn tohnlengo me lokolokaia. Tohnlengo tepida ahnekihda madamadau sapwung. E men Adam oh Ihp en kaudokiong ih. E men ira en peikiong ih. E men duwehla Koht.

Tohnleng suwedo kahrehiong Ihp en ahneki madamadau sapwung. E doadoahngki sineiko oh ndaiong Ihp: ‘Koht likamw. Ke sohte pahn mehla ma ke kang wahntuhkeo. Ke pahn duwehla Koht me loalokong.’ Ma kowe mwo, ke pahn kamehlele dahme e nda?—

Ihp tepida inangihada mehkot me Koht sohte ketin mweidohng ih. E kangada wahntuhkeo me sohte mweimweiong ih en kang. Ih eri pil kihong Adam en iang kang. Adam sohte kamehlele dahme sineiko nda. Ahpw eh ineng en mi rehn Ihp kehlail sang eh limpoak ong Koht. Kahrehda e pil iang kangada wahntuhkeo.​—Senesis 3:1-6; 1 Timoty 2:14.

Ia imwilahn met?— Adam oh Ihp solahr unsek, ira mahla oh mehla. Eri pwehki ara soh unsek, neira seri koaros pil soh unsek oh mahla oh mehla. Koht sohte likamw! Aramas kak mour ma re kin peik. (Rom 5:12) Paipel padahkihong kitail me tohnlengo me likamw ong Ihp iei ih me adaneki Sehdan me Tepil, oh tohnleng teikan me suwedla kin adaneki ngehn suwed kan.​—Seims 2:19; Kaudiahl 12:9.

Ke wehwehki dahme kahrehda tohnleng mwahu men me Koht ketin wiahda eh suwedla?— Met pwehki e tepida medemedewe soahng suwed kan. E men ih me en keieu lapalap. E ese me Koht ketin mahsanihong Adam oh Ihp en naineki seri kan oh tohnleng menet men irail koaros en kaudokiong ih. Tepilo men aramas koaros en sapeikiong Siohwa. Ihme kahrehda e kin song en kihong madamadau sapwung kan nan atail lamalam.​—Seims 1:13-15.

Tepilo nda me sohte me uhdahn poakohng Siohwa. E nda me kita sohte poakepoake Koht oh kita sohte men wia dahme Koht mahsanih. E nda me kita kin peikiong Koht ihte ma soahng koaros kin mwahu ong kita. Ia duwe, Tepilo mehlel? Ih duwen kita met?

Sounpadahk Lapalapo mahsanih me Tepilo sounlikamw men. Sises ketin kasalehda me e ketin poakohng Siohwa sang ni eh kin ketin peikiong Ih. Sises sohte kin ketin peikiong Koht ihte ma e kin mengei. E kin ketin peik ahnsou koaros pil ahnsou kan me aramas kin kahrehiong en apwal ong ih en peik. E kin ketin lelepek ong Siohwa lao lel eh pwoula. Ihme kahrehda Koht ketin kamourada ih pwehn kak pwurehng mour kohkohlahte.

Eri ihs me ke pahn nda me iei atail imwintihti me keieu laud?— Iei Sehdan me Tepil. Ke kak kilang ih?— Soh. Ahpw kitail ese me Tepilo mie oh e kehlail sang kitail. Ahpw ihs me kehlail sang Tepilo?— Siohwa Koht. Kahrehda kitail ese me Koht kak ketin pere kitail sang Sehdan.