Ia Mwomwen Mour nan Mwetuwel en Ihden?

Siohwa ketikihong Adam oh Ihp soahng mwahu tohto. Senesis 1:28

Siohwa ketin kapikada tepin lih Ihp oh ketikihong Adam en pwoudiki.​—Senesis 2:21, 22.

Ara madamadau oh paliwarara unsek oh sohte mehkot sapwung rehra.

Ara wasahn kousoan iei nan mwetuwel en Ihden, Paradais ehu, wasa me lingan oh mie pillap, wahntuhke kan oh pil mahn akan.

Siohwa kin ketin mahseniong ira oh e kin ketin padahki ira. Ma ira rong ih, ira pahn mour kohkohlahte nan Paradais nin sampah.

Koht ketin mahsanih ira en dehr tungoale wahntuhkeo. Senesis 2:16, 17

Siohwa ketin kasalehiong Adam oh Ihp wahntuhke pwoat nan mwetuwelo oh e ketin padahkihong ira en dehr tungoale pwe ira de mehkihla.

Emen tohnleng ko uhwongada Koht. Tohnleng suwed menet iei Sehdan me Tepil.

Sehdan sohte mwahuki Adam oh Ihp en peikiong Siohwa. Sehdan eri doadoahngki sineik men oh ndaiong Ihp me ma e pahn tungoale wahntuhkeo, e sohte pahn mehla ahpw e pahn duwehla Koht. Met uhdahn likamw.​—Senesis 3:1-5.