Adam oh Ihp Sapeikiong Koht

Ehu rahno Ihp wie kelekelehpw a sineik men pa koasoiong ih. E nda: ‘Mehlel me Koht sohte mweidohng kumwa en kang wahntuhke koaros?’ Ihp sapeng nda: ‘Se kak kang wahntuhke koaros, ihte ehu me se sohte kak kang. Ma se pahn kang wahntuhke wet, se pahn mehla.’ Sineiko ahpw sapeng nda: ‘Kumwa sohte pahn mehla. Ni mehlel, ma kumwa pahn kang, kumwa pahn duwehla Koht.’ Met mehlel? Soh, e likamw. Ahpw Ihp kamehlele met. Pwehki eh kilikilang wahntuhkeo, eh men kang wahntuhkeo ahpw lalaudla. Ih eri kang wahntuhkeo oh kihong ekis rehn Adam. Adam ese me ira pahn mehla ma ira sapeikiong Koht. Ahpw mendahki met, Adam kang wahntuhkeo.

Kohkohlahng ni soutik en rahno, Siohwa mahseniong Adam oh Ihp. E keinemwe rehra dahme kahrehda ira sapeikiong ih. Ihp ahpw kapwukoahki sineiko, oh Adam kapwukoahki Ihp. Pwehki Adam oh Ihp sapeikiong ih, Siohwa ketin kausasang ira nan mwetuwelo. Pwe ira en sohte douluhl kak pwurala loale, e ketikihdiong tohnleng kan oh kedlahs kisiniei ehu wasahn pedolong nan mwetuwelo.

Siohwa mahsanih me me pitiehdi Ihpo pahn pil iang kalokolok. Kaidehn sineiko me pein koasoiong Ihp. Siohwa sohte ketin wiahda sineik en kak lokaia. Tohnleng suwed men me kamwakid sineiko en lokaia. E wia met pwehn pitihedi Ihp. Eden tohnleng menet iei Sehdan me Tepil. Ni ahnsou kohkohdo, Siohwa pahn ketin kasohrehla Sehdan pwe en sohla kak pitih aramas en wia me suwed.