Mour Apwal Ehu Tapiada

LIKIN mwetuwel en Ihden, Adam oh Ewa lelohng kahpwal tohto. Ira anahne en doadoahk laud pwen mie kenara kisin mwenge. Sohlahr tuhke kasehlel, oh ira kilangehr tuhke tekatek kamadak me wosada wasa koaros. Mehpwukat lelohng Adam oh Ewa pwehki ara sapeik ong Koht oh sohlahr wia kompoakpah.

Ahpw suwed sang met, Adam oh Ewa tapiadahr mehla. Tamataman, duen peneu me Koht ketikihong ira me ira pahn mehla ma ira pahn kang sang wahn tuhkeo. Eri, rahno me re tapiada kang wahn tuhkeo paliwarara tapiada kekeiridi ong mehla. Ira uhdahn pweipwei pwe ira sohte men rong Koht!

Seri kan koaros nain Adam oh Ewa ipwidi mwehrin arail pahpa oh nohno kapidoi sang mwetuwel en Ihden. Met pil wehwehki me neira seri kan pahn pil laudla, mahla oh mehla.

Ma Adam oh Ewa peikiong Siohwa, mour nan sampah pahn ehu me kaperen ong ira oh neira seri kan. Irail kak mour kohkohlahte ni insenamwahu nan sampah. Sohte aramas men pahn mahla, mwerekerekedi, soumwahuda oh mehla.

Koht mwahuki aramas en insenamwahu mihmi kohkohlahte, oh E inoukihdi me ehu rahn e pahn pweiong aramas. Sampah kaidehn ihte pahn lingan, ahpw aramas akan pahn pil ahniki roson mwahu. Oh aramas koaros nan sampah ni ansouo pahn wia kompoakpah mwahu ong emenemen oh ong Koht.

Ahpw Ewa sohlahr wia kompoakpen Koht. Ihme kahrehda ni ansou me e kaipwidi seri, inenen apwal ong ih. Liho madak kowahlap. Pwehki ah sapeik ong Siohwa, met kahrehdo kainsensuwed tohto. Kaidehn met pwung?

Adam oh Ewa naineki pwutak oh serepein tohto. Ni ansou me keieun neira pwutak ipwidi, re kihong ede Kein. Re kahdaneki kariemen en neira pwutak Eipel. Dahme wiawi ong ira? Ke ese?