Koht Ketin Wiahda Tepin Ohl oh Lih

Siohwa ketin wiahda mwetuwel ehu nan wasa me adaneki Ihden. Nan mwetuwelo diren wahnrohs kan, tuhke kan, oh mahn akan. Mwuri, Koht ketin wiahda tepin ohl Adam, sang nan pwehl oh peukohng angin mour nan tumwe. Ke ese dahme wiawi? Ohlo wiahla aramas emen me momour! Siohwa ketikihong Adam pwukoa en apwalih mwetuwelo oh mahsanihong ih en kihong eden mahn koaros.

Siohwa ketikihong Adam kosonned kesempwal ehu. E mahsanihong Adam: ‘Ke kak kang wahntuhke kan sang ni tuhke koaros, ihte ehu me ke sohte kak kang. Ma ke pahn kang wahntuhke wet, ke pahn mehla.’

Mwuhr Siohwa mahsanih: ‘I pahn wiahda emen me pahn kin sewese Adam.’ Ih eri ketin kahrehiong Adam en meirkelikla, oh mwuri E ketin doadoahngki ehu tihnkopwoun Adam ko pwehn wiahda en Adam pwoud. Eden eh pwoudo Ihp. Ia en Adam pepehm duwen eh pwoudo? Adam uhdahn perenkihda kahrehda e nda: ‘Kilang dahme Siohwa ketin wiahsang ni ei tihnkopwou! Met miehier emen me duwe ie.’

Siohwa mahsanihong Adam oh Ihp ira en naineki seri kan oh kadirehla sampah. E kupwurki ira en perenki doadoahkpene pwehn wiahiong sampah pwon en wiahla paradais ehu, de mwetuwel kaselel ehu, duwehte mwetuwel en Ihden. Ahpw met sohte pweida. Dahme kahrehda? Kitail pahn sukuhlki nan irelaud en mwurin met.