Keieu en Ohl oh Lih

DAHME weksang kilel teiko nan kilel wet? Ei, aramas mi nan kilel wet. Ira me keieu en ohl oh lih. Ihs me wiahda ira? Koht me wiahda ira. Ke ese mwaren Koht? Mware iei Siohwa. Ah ohlo oh liho adaneki Adam oh Ewa.

Iet duen en Siohwa Koht wiahda Adam. E ale ekei pwelpahr sang nan pwehl oh wiahda mwomwen paliwar unsek ehu, mwomwen ohl men. Ih esingek ong nan tumwe, oh Adam eri mourada.

Mie doadoahk me Siohwa Koht kilelehdi Adam en wia. E padahkiong Adam en kihong eden mahn koaros. Adam mwein kilikilang mahn kan ansou werei, ihme kahrehda e kak pilada ahd me keieu mwahu ong irail koaros. Ni ansou me Adam kin kihong eden mahn akan e pil kilang mehkot tohrohr. Ke ese dahkot mwo?

Mahn koaros mie arail werek. Mie pahpa en elepant oh mie nohno en elepant, oh mie pahpa en laion oh mie nohno en laion. Ahpw Adam sohte ah werek. Ihme Siohwa kahreong Adam en meir kelikala, oh ih eri kihsang apwoat tihn kopwou ni pangepange. Doadoahngki tih pwoatet, Siohwa wiahda lih pwen werekiong Adam, oh liho wiahla ah pwoud.

Met inenen kaperen ong Adam! Oh tamanda duen peren me Ewa pil ahniki ni ah pwildiehr nan ehu mwetuwel kasehlel pwen kousoan! Met ira kak naineki seri oh mour ni insenamwahu.

Siohwa mwahuki Adam oh Ewa en mour kohkohlahte. E mwahuki sampah pwon en wiahla wasa kasehlel oh lingan duwehte mwetuwel en Ihden. Adam oh Ewa perenki mehlel me ira pahn wia kowa doadoahk wet! Iaduen, ke mwahuki iang kisehn doadoahk en kaparadaisihla sampah duwehte mwetuwel kasehlel ehu? Ahpw peren oh insenamwahu me Adam oh Ewa ahniki sohte werei. Kitail pahn tehk dahme kahrehda met wiawihki.