Dahme Kahrehda Ira Sohlahr Mi Nan Ara Wasahn Kousoan

KILANG dahme wiawi met. Adam oh Ewa pokous sangehr nan mwetuwel kasehlel en Ihden. Ke ese dahme kahrehda?

Pwehki re wiahda mehkot me inenen suwed. Eri Siohwa kaloke ira. Ke ese me suwed da me Adam oh Ewa wiahda?

Ira wia mehkot me Koht mahsanih ong ira en dehr wia. Koht padahkiong ira me ira en kak kang wahn tuhke koaros en nan mwetuwelo. Ahpw sang tuhke apwoat Koht padahkiong ira en dehr kang, de ira pahn mehla. Tuhke pwoatet Koht kolokol ong pein ih. Kitail koaros ese me e sapwung en alehda mehkot me ahn emen tohrohr, kaidehn? Eri, dahme wiawi?

Rahn ehu ni ansou me Ewa kelehpwla nan mwetuwelo, emen sineik lokaia ong ih. Nna, lemeleme met! E padahkiong Ewa en kang wahn tuhke me Koht padahkiong ira en dehr kang. Eri, sen pil tamanda me ni ansou me Koht wiahda sineik e sohte ketin wiahda pwe sineik en kak lokaia. Eri met wehwehki me emen tohrohr me kahreong sineiko en kak lokaia. Ihs mwo?

Kaidehn Adam. Kahrehda e pahn emen tohrohr me Siohwa wiahdahr mwohn ah wiahda sampah. Aramas pwukat adaneki tohnleng kan, oh kitail sohte kak kilang irail. Tohnleng menet kin aklapalap. E tapiadahr lemeleme me e pil men kaunda duwehte Koht. Oh e pil mwahuki aramas akan en peikiong ih ahpw kaidehn ong Siohwa. Iei ih tohnlengo me kahreong sineiko en kak lokaia.

Tohnleng menet pitihdi Ewa. Ni ansou me e padahkiong Ewa me e pahn duwehla Koht, liho eri kang wahn tuhke keinapwio pwe e kamehlele. Liho ahpw kangada, oh pil duwehte Adam. Adam oh Ewa sapeik ong Koht, ihme kahrehda ira sohlahr kak mi nan ara wasahn kousoan kasehlel.

Ahpw ehu rahn Koht pahn kahreong sampah pwon en pil kasehlel oh linganla duwehte mwetuwel en Ihden. Mwuhri kitail pahn sukuhliki duen ahmw pahn kak kisehn doadoahk wet. Ahpw met, kitail en tehk dahme wiawi ong Adam oh Ewa.