Prokram en Mihting Tohrohr nan Pahr 2010
1. (a) Ia ekei oaralap en atail mihting tohrohr kan me wiawiher mahs? (b) Mie ekei ire kan sang mihting tohrohr ko me sewese iuk nan omw doadoahk en kalohk?
1 “Pilada Dahme Keieu Kesempwal,” “Kesihnenda Teng nin Duwen Ehu Pwihn,” “Kaukaule Kadehde Mehlelo,” oh “Kitail Rasehng Pwehl—Siohwa Sounwia Sah,” iei ekei oaralap kan en mihting tohrohr kan me wiawiher mahs. (Pil. 1:9, 10, 27; Sohn 18:37; Ais. 64:8) Ke kin kasikasik en iang towehda mihting tohrohr me koasoandier ong pahr en kalohk 2010? Oaralap en mihting tohrohr wet iei: “Atail Ahnsou Mwotomwotalahr,” me poahsoankihda 1 Korint 7:29.
2. Ia duwen atail kak kalaudehla atail men iang mihting tohrohr wet?
2 Tepida koasoiapene duwen mihting tohrohr wet mwurinte pakair en rahno wiawi nan omw mwomwohdiso. Ekei pahpa oh nohno kan kin sewese neirail seri kan en kasikasik mihting tohrohro ni arail kin kilelehdi rahno nan neirail kalendar, ntingihdi oh kapasahda soahng kan me re anahne, oh wadewadek rahn depe luhwe. Ni ahnsoun Kaudok en Peneinei ni soutik kan, kumwail ele men kousapahlih ire kan me kumwail kilelehdi sang mihting tohrohr kan me wiawiher. Ke pil kak kaunopada omw mohngiong ni omw pahn kousapahlih pwuhken Benefit From Theocratic Ministry School Education (Paiekihda Sukuhl ong Sapwellimen Koht Doadoahk), pali 13-16, pwehn sewese iuk oh omw peneinei en “kanahieng duwen amwail kin rong.”—Luk 8:18.
3. Ia duwen atail kak paiekihda ire kan en mihting tohrohr wet?
3 Doadoahngki Dahme Ke Kin Sukuhlki: Me tohto kin nda mwurin mihting tohrohr, “Inenen mwahu padahk kan!” Met kin ahnsou koaros mehlel pwehki mihting tohrohr iei sapwellimen Siohwa koasoandi en ketikihong kitail kapai kan. (Lep. Pad. 10:22) Kitail anahne doudouloale oh kolokol soahng kan me kitail kin sukuhlki pwehn kak kapwaiada. (Luk 8:15) Ahnsou me kumwail pahn pwurupwurala sang mihting tohrohro, koasoiapene duwen padahk kan rehn amwail peneinei de irail me iang weromwail sidohsa. Koasoiapene amwail mehn akadei kan oh ire kan me pahn sewese kumwail nan amwail doadoahk en kalohk. Amwail pahn wia met pahn sewese kumwail en paiekihda ire kan en mihting tohrohr wet ong ahnsou reirei.—Seims 1:25.
4. Ia duwen mihting tohrohr wet eh pahn kak sewese kitail?
4 Ahnsou koaros kitail kin perenki ma mie me kihong kitail kisakis me kitail uhdahn anahne. Kitail sou kin perenki oh kasikasik dahme Siohwa pahn ketikihong kitail nan mihting tohrohr me pahn wiawi? Kitail kak kamehlele me mihting tohrohr wet pahn sewese kitail ni soahng koaros. Kitail kak kasikasik me Samatail nanleng, Siohwa, pahn ketikihong kitail dahme kitail uhdahn anahne sang ni kangoang kan oh mehn kasukuhl kan ong atail doadoahk me e ketikihong kitail.—2 Tim. 4:2; Seims 1:17.