Kaiahnehda Ahmw Koahiek en Kasawihada Dahme Mwahu Sang Dahme Suwed
1 Nan imwin rahn akan me kin inenen kansensuwed kin wahdohng kitail kahpwal tohto oh soangsoangen kasongosong kan ong sapwellimen Koht aramas akan wasa koaros nan sampah. (2 Tim. 3:1-5) Kitail koaros anahne kangoang pwehn kak kehlail ni pali ngehn. (1 Kor. 16:13) Kitail kak wia met ni atail pahn ale sapwellimen Siohwa sawas nin duwen atail kin kaukaule tungoale mwengehn ngehn sang sapwellime Mahsen, mweidohng sapwellime ngehn sarawi en kamwekid atail mour, oh miniminiong sapwellime pwihn.—Mel. 37:28; Rom 8:38, 39; Kaudiahl 2:10.
2 Pwehki kahrepe pwukat, oaralap en Kapokon en Rahn Tohrohr, me wiawi nan pahr me ahpwtehn nek, me koasoia: “Ni Amwail Lamalam, Kumwail en kin Duwehte Ohl Mehlel Koahiek men” me inenen konehng atail ahnsou. Oaralap wet kohsang 1 Korint 14:20, oh kitail kak wadek mahsen en Wahnpoaron Pohl wasao: “Riei ko, ni amwail lamalam akan kumwail dehr kin mwomwen seri. Ni mehkan me pidada mehkot me suwed kumwail en rasehng kisin seri pwelel kan; a ni amwail lamalam, kumwail en kin duwehte ohl mehlel koahiek men.” Ia ahmw madamadau duwen prokram en rahno?
3 “I ale kangoang laud!” “Ih soangen kaweid me I kin uhdahn anahne!” Ihme Sounkadehde riemen koasoia duwen prokram en rahno. Pil emen ohl me sohte iang padahk mehlel—me iang towehda kapokono pwehn kilang nah serepein sounpahr 12 papidaisla—inenen perenki rong prokram en rahno oh e koasoia me e kak wehwehki iaduwen prokram en rahno kak mwahu ong eh peneinei. Ih duwen pil ahmw pepehm? Kitail en katamankin kitail duwen ekei ire kesempwal kan me kohda nan prokram en rahno.
4 Loalokong Pwung Kin Anahn Pwehn Kaiahne Atail Koahiek en Kasawihada Dahme Mwahu Sang Dahme Suwed: Nan tepin padahk me oaralap koasoia “Kekeirada Omw Kehlen Dehdehkihla Mehkan ni Ahnsouwet,” dahme brothero me wia padahk wet kasalehda me anahn pwehn powehdi kahpwal akan en rahnwet? Met kin wehwehki laudsang lamalam mwahu. Kitail anahne kaiahne atail wehwehkihla Paipel, pwe ma soh, kitail pahn kak lohdi ong wia dahme suwed me kin kalapw kapilkitailpene. Met kin wehwehki me kitail anahne sawas sang rehn Koht. Duwehte sounmelkahkao, kitail anahne peki sawas sang rehn Siohwa ki kapakap pwehn kak wehwehkihla sapwellime kosonned akan oh mehn kataman kan pwehn kak papah Ih sang nan mohngiong unsek.—Mel. 119:1, 2, 34.
5 Nan padahk me mwurin met, Sounapwalih en Circuit kasalehda me Siohwa, ni E kin doadoahngki sapwellime Mahsen oh sapwellime pwihn, kin ketikihong kitail “Mehn Sawas kan en Koahiekla Ni Atail kin Wehwehkihla Pwuhk Sarawi.” Wehwehki de dehdehki kin wehwehki “koahiek en kak kilang ire ieu oh kilang ia mwomwen ire tikitik kan kin pid ireo pwon.” Ihs me kak sewese kitail en kaiahnehda koahiek wet? Siohwa ketin kihong kitail kisakis kan me mih rehn ohl akan pwehn sewese kitail en kekeirada ni pali ngehn. (Episos 4:11, 12) Sapwellimen Siohwa pwihn sansal me mihmi sampah kin kangoange kitail en wadek Mahsen en Koht rahn koaros oh pil kaukaule iang towehda mihding kan koaros. (Mel. 1:2) Kitail kin sukuhliki iaduwen kitail kak doadoahngki Paipel oh sawaspen Paipel kan ni atail kin wia pein atail onop oh wia onop en peneinei iangahki kaunopada ong mihding kan oh kalohk. Ke kin doadoahngki mehn sawas kan koaros me Siohwa koasoanehdi ong kitail? Ke kin kolokol ahmw koasoandi en wia pein ahmw onop Paipel? Met kin kesempwal ma kitail sohte men lohdi pahn kasongosong kan me kin pid sidail en likou oh kapwat me sampah kin lelki oh pil lamalam en sampah.—Kol. 2:6-8.
6 Kitail Anahne Kaiahnehda Atail Koahiek en Kasawihada Dahme Mwahu oh Dahme Suwed: Nan keieun eh padahk me oaralap koasoia: “Perela Omw Pali Ngehn ni Omw kin Kaiahne Omw Kehlen Kasawihada Mwahu oh Suwed,” brother me mwemweitdo kawehwehda me irail me mihmi nan sampah sohte kak kasawihada dahme mwahu oh dahme suwed. (Aiseia 5:20, 21) Kahrepen met: re kin kahng pohnese oh idawehn sapwellimen Koht kosonned pwung kan. Ni pali teio, kitail me kin ale kaiahn ni pali ngehn sang rehn sapwellimen Siohwa pwihn kin pohnese sapwellimen Koht kosonned pwung kan, oh mehpwukat kin sewese kitail en kaweidki kitail nin duwen atail tiahk oh wiewia kan. Ihme kahrehda, kitail kak wehwehki dahme mwahu oh dahme Siohwa kin kupwurki kitail en wia oh kapwaiada kupwuren Koht me unsek.—Rom 12:2.
7 Pwehn liksang lamalam pingiping en sampah iangahki wah suwed me kin kohsang met, kitail en ahnsou koaros kaiahne atail koahiek en kasawihada dahme mwahu oh dahme suwed. Iaduwen kitail kak wia met? Nin duwen dahme ntingihdi nan Ipru 5:12-14, wahnpoaron Pohl kasalehda me kitail anahne wia laud sang nimte “milik” en Mahsen en Koht. Kitail anahne kang mwengehn ngehn me kekeluwak, duwehte me kitail wia ma kitail kaunopada oh iang towehda Pwuhk Study en wai me onopki pwuhken Aiseia. Mwurin mwo, kitail anahne doadoahngki dahme kitail kin sukuhliki. Ni ahnsou me kitail kin wia met, kitail pahn kamehlele me sapwellimen Siohwa kosonned oh kaweid akan koaros kin pwung. Met kin kaiahne atail koahiek en kasawihada dahme mwahu oh dahme suwed.
8 E kin kansensuwed pwe ekei kin pwupwudi ni pali ngehn. Pwekihda? Re sohte kin nantihong wia dahme mwahu oh pwung nin duwen kupwuren Siohwa. Kahrehda, re kin kilang soangen prokram en TV oh radio me sohte mwahu ong Kristian kan oh pil iang “computer chat rooms” mendahki soahng suwed tohto kak lelohng irail sang mehpwukat. Ma kitail kin mwekidki kaweid erpit sang Siohwa, kitail sohte pahn lohdi pahn madamadau suwed kan en aramas akan.—Lepin Padahk 13:20; Kal. 5:7; 1 Tim. 6:20, 21.
9 Kumwail, me Pwulopwul kan: “Ni Mehkan Me Pidada Mehkot me Suwed, Kumwail en Rasehng Kisin Seri Pwelel kan”: Nan prokram en rahno, padahk riau kin kangoange me pwulopwul kan en kaiahne arail koahiek en kasawihada dahme mwahu oh dahme suwed. Brother kan me wia padahk pwukat kasalehda me wehwehn iren Paipel me mahsanih: “Ni mehkan me pidada mehkot me suwed, kumwail en rasehng kisin seri pwelel kan” met kin wehwehki me kitail sohte men wehwehki duwen soahng kan me pid dahme suwed de dahme samin mwohn silangin Siohwa. (1 Kor. 14:20) Kitail koaros anahne tehk kanahieng iaduwen kitail kin doadoahngki atail ahnsou pwehn kak liksang soahng kan me kin kahrehong kitail en lelohng soahng kan me suwed oh luwetkihla mehpwukat. (Episos 5:15-17) E pahn mwahu ma kitail pahn tehk ia uwen laud atail ahnsou kitail kin wadek mehkot me sohte pahn sewese kitail en kekeirada ni pali ngehn. Ke wia met? Dahme e kasalehda? Likin atail koasoandi en wadek Paipel rahn koaros, kitail en nantihong wadek sawaspen Paipel kan me Society kin wiahda ong kitail. Ma kitail pahn wia met, e pahn sewese kitail koaros, iangahki me pwulopwul kan, en “ahneki wehwe mwahu.”—Lepin Padahk 4:7-9, New World Translation.
10 “Paiekihda Sang Omw kin Kapwaiada Kaweid en Paipel kan ki Wehwe Mwahu”: Ih oaralap en kaimwiseklahn padahk en Kapokon en Rahn Tohrohr. Brothero me mwemweitdo kawehwehda me Siohwa kin wia Utupen wehwehki soahng kan me kak kihong kitail mour oh soangen wehwe kin siksang soahng kan me kin kohsang aramas akan. Medewehla ma kitail kak wehwehki dahme Siohwa kin mwahngih! E kin ketin sewese aramas akan pwe ren wehwehki duwen soahng kan ma irail kin rapahki oh peki sawas ki pwoson. (Lepin Padahk 2:3-5, 9; 28:5) Ke kin doadoahngki sapwellime koasoandi pwehn peki sawas sang rehn Koht?
11 Se kin kangoange koaros en sukuhliki duwen kasawihada mour en kaweid kan ahnsou me kitail kin wadek Pwuhk Sarawi. (2 Tim. 3:16, 17) Tehk kanahieng duwen mour en kaweid pwukat oh onopki irail pwehn kak wehwehki, ni ahl me pwung, dahme Siohwa kin mahsanih. Mweidong ahmw ahnsou pwehn kak doudouloale duwen mour en kaweid pwukat oh koasoanehdi irail nan ahmw madamadau oh mohngiong. Met pahn kaiahnehda ahmw koahiek en kasawihada dahme mwahu oh dahme suwed oh ke kak wia pilipil mwahu kan me kin pid ahmw mour. (Sosua 1:8) Kitail en tehk ekei irair kan me kitail kak lelohng oh kilang iaduwen kitail kak doadoahngki kaweid en Paipel pwehn wia pilipil mwahu kan me pahn sewese atail mour en pweida mwahu.
12 ‘I en ale ong ie soangen mwomwen sidail en likou ehu de mwomwen wia moang ehu?’ Ahn sampah mwomwen sidail en likou oh kapwat oh mwomwen wia moang me ndand kin kasalehda ngehnen uhwong oh pelian. Met kin kahrehda aramas kin likawih likou kan me sohte soandi mwahu oh pil doadoahngki likou it. Mehnia iren Paipel kan kin sewese kitail en pelianda atail ineng en men doadoahngki soangen likou me sohte konehng Kristian? Ma kitail kin kaiahne atail koahiek en kasawihada dahme mwahu oh dahme suwed, kitail pahn kak tamataman mour en kaweid me mihmi nan 1 Timoty 2:9, 10, (NW) en “doadoahngki likou me konehng . . . , nin duwen me konehng [aramas] poadidi kan.” Pil ekei iren Paipel me pid ire wet iei 2 Korint 6:3 oh Kolose 3:18, 20.
13 ‘Dahme I kak wia pwehn kolokol ehupene kehlail ong ahi peneinei?’ Kapehse nanpwungen tohnpeneinei kan kin kesempwal. Seims 1:19 kin kaweidkin kitail: “Emenemen kumwail koaros en nan kapehd mwadang ong rong, ahpw dehr nan kapehd karuaru en lokaia oh lingeringer.” Tohnpeneinei anahne rong oh lokaia nanpwungarail pwe met kin kahrehda re pahn wehwe mwahu nanpwungarail. Mendahki dahme kitail nda kin mehlel, ahpw ma kitail pahn doadoahngki lokaia lemei, aklapalap, de keng, atail lokaia sohte pahn sewese mehteikan. Eri, mehnda ma ke wia emen ohl pwopwoud de lih pwopwoud, pahpa de nohno de seri, atail lokaia en “katapan oh kansenamwahu.”—Kol. 4:6.
14 ‘Iaduwen—I kin noahrok kepwehn sampah?’ Noahrok kin wia kasongosong sang sampah me kin kak kauwehla ahn emen mour. Noahrok sohte kak sewese emen en ahneki peren mehlel. (Ekl. 5:10; Luk 12:15; 1 Tim. 6:9, 10) Pwehn sewese kitail en dehr lohdi pahn lidip en noahrok, Sises ketikihong kitail kaweid me inenen kesempwal: pwoaren masatail en mwakelekel oh marain—me wehwehki kitail en dehr noahrok. Kolokol soangen mour me toupahrek oh sohte pingiping kin kohsang atail kilangwohngete mehkan me pid Wehin Koht oh wiahkihla soahng teikan koaros en keriau nan atail mour.—Madiu 6:22, 23, 33.
15 Dahme Kesempwal Kitail en Wia: Mahsen en Koht kin audaudki kaweid mwahu tohto me kin sewese kitail en wiahda pilipil mwahu kan. Kitail anahne sukuhliki mour en kaweid pwukat, doudouloale, oh wehwehki iaduwen kitail pahn doadoahngki kaweid pwukat nan atail mour. Ni atail kin ‘kaiahne atail koahiek en kasawihada dahme mwahu oh dahme suwed,’ kitail kak paiekihda oh pil wauneki Siohwa.—Ipru 5:14, NW.