“Kumwail Wia Keseupen Pein Kumwail”

“Kumwail kalelapak oh wia keseupen pein kumwail ma kumwail weweidki pwoson.”—2 KORINT 13:5.

1, 2. (a) Iaduwen atail peikasalki dahme kitail kamehlele kak kamwekid kitail? (b) Soangen irair dah kan nan senturi keieu en Korint me kakete kahrehong ekei Kristian kan ahnsowo en sehse mehnia ahl irail en keid loale?

OHL EMEN seiseiloak pohn ahl apwoat oh leledo wasa me ahlo kasangpeseng. Pwehki eh sohte wehwehki mehnia ahl me e pahn keid ie pwehn lelahng wasa me e seiseiloaklahng ie, e ahpw idek rehn emen aramas me e tuhwong nan ahlo duwen elen kolahng wasa me e men lel ie. Ahpw, e ekis peikasalki duwen kaweid me e alehdi. Met kahrehiong en sohte kak pousehla eh seiloak. Ni atail kin peikasalki padahk mehlel, met pil kak kamwekid kitail ni ahlohte. Soangen madamadau en peikasal kak kauwehla atail koahiek en wiahda pilipil, kahrehiong kitail en sehse mehnia ahl me kitail en keid loale.

² Ehu irair me pwarada kak kihong Kristian akan en senturi keieu nan Korint oh Krihs soangen madamadau wet. “Wahnpoaron lapalap akan” peidengki en Pohl manaman, oh irail eri koasoia: “Nein Pohl kisinlikou kan me nohn uk oh kehlail, ahpw ni eh kin piserdo rehtail, e kin luwet oh eh mahsen kan pil sohte wia mehkot.” (2 Korint 10:7-12; 11:5, 6) Soangen madamadau wet ele kahrehiong ekei nan mwomwohdiso en Korint irail en sehsehla iaduwen arail pahn kekeid kohwei.

3, 4. Dahme kahrehda en Pohl kaweid ong mehn Korint ko kesempwal ong kitail?

³ Pohl wiahda mwomwohdiso nan Korint ahnsou me e seiloakla wasao nan 50 C.E. E mihmi nan Korint “sounpahr ehu oh sounpwong weneu, padapadahkiong irail duwen mahsen en Koht.” Kahrehda, “pali laud en mehn Korint me iang rong tapihada pwosonla oh papidaisla.” (Wiewia 18:5-11) Pohl kin nsenohki mehlel pali ngehn en rie ko nan Korint. Patehng met, mehn Korint ko ntinglahngehr Pohl peki eh sawas me pid ekei irair kan. (1 Korint 7:1) Ihme kahrehda, Pohl kihong irail kaweid me inenen kaselel.

⁴ Pohl ntingihdi, “Kumwail kalelapak oh wia keseupen pein kumwail ma kumwail weweidki pwoson.” (2 Korint 13:5) Ma brother oh sister kan nan Korint alehda kaweid wet, irail sohte pahn sehse mehnia ahl me re pahn keid loale. E kak pil sewese kitail rahnwet ni ahlohte. Iaduwen atail kak idawehn kaweid en Pohl? Iaduwen atail pahn kak kasawih ma kitail mih nan pwoson? Dahme pidada atail pahn kasalehda ma kitail uhdahn mih nan pwoson?

“Kumwail Wia Keseupen Pein Kumwail”

5, 6. Soangen mehn sosohng dah me mie me kitail kak doadoahngki pwehn kasawih ma kitail mih nan pwoson, oh dahme kahrehda mehn sosohng wet konehng?

⁵ Nan kasosong ehu, mehkot de aramas emen kin sosohng, oh kin mie irair de mehn sosohng ehu me kin doadoahk. Nan soangen irair wet, kaidehn pwoson me kitail alehda me kin sosohng. Emen emen kitail me kin sosohng. Pwehn kasosohng, mehn sosohng unsek ehu miehier. Melkahka ehu me sounmelkahkao Depit ntingihdi mahsanih: “Kosonned en Kauno me unsek mehlel; e kin pwurehng kakehlahda aramas. Mahsen en Kauno me likilik, e kin kaloalokongihala me soaloalokong kan. Kosonned en Kauno me pwung; oh irail kan me kin peikiong kin pereperen. Sapwellime mahsen kan me uhdahn pwung oh kin kamarainihada lamalam en aramas.” (Melkahka 19:7, 8) Pwuhk Sarawi audaudki sapwellimen Siohwa kosonned unsek kan oh kehkehlik pwung kan, sapwellime mehn kataman likilik kan oh kosonned mwakelekel kan. Mahsen me dierek nan Pwuhk Sarawi wia mehn sosohng me keieu konehng.

⁶ Me pid duwen sapwellimen Koht mahsen sarawi, wahnpoaron Pohl mahsanih: “Ni mehlel, mahsen en Koht wie momour oh manaman, e keng sang kedlahs me au riau. E kin lelohng loalen aramas lel wasa keieu rir, wasa me mour oh ngehn kin tuhpene ie, wasa me kakon oh sahl akan kin tuhpene ie. E kin kadeikada ineng oh lamalam en nan kapehd en aramas.” (Ipru 4:12) Ei, sapwellimen Koht mahsen kin sohng mohngiongatail pwehn tehk dahme uhdahn mih nan loaletail. Iaduwen atail pahn kak doadoahngki padahk inen oh manaman wet ong pein kitail? Sounmelkakaho kasalehda ni sansal iaduwen kitail kak doadoahngki Mahsen en Koht pwehn sohng mohngiongatail. E kouliki: “Meid pai aramas akan . . .me kin perenki peikiong Kosonned en Kauno, oh medemedewe nan kapehdihr nin rahn oh ni pwong.” (Melkahka 1:1, 2) “Kosonned en Kauno” kin dierek nan Mahsen en Koht. Kitail anahne koasoanehdi ahnsou en wadek ni ngihl tikitik, oh doudouloale audepe kan. Ni atail wia met, kitail anahne mweidohng dahme ntingdi nan Pwuhk Sarawi en wia mehn sosohng ong kitail.

7. Ia ahl keieu mwahu en sohng ma kitail mih nan pwoson?

⁷ Elen sosohng atail pwoson me keieu mwahu iei en wadek oh doudouloale audepen sapwellimen Koht Mahsen oh tehk ia uwen atail wiewia kan pahrekiong dahme kitail sukuhliki. Kitail anahne en perenki atail kin ale sawas ong duwen atail pahn kak wehwehki Mahsen en Koht.

8. Iaduwen sawaspen Paipel kan me kohsang “ladu lelepek oh loalokong” kak sewese kitail en kasawih ma kitail mih nan pwoson?

⁸ Siohwa kin ketikihda padahk oh kaweid kan ki pwuhk kan me kohdo sang rehn “ladu lelepek oh loalokong” me kin kawehwehda iren Pwuhk Sarawi kan. (Madiu 24:45) Karasepe ehu, tehk duwen iren sawas nan kakon me koasoia “Questions for Meditation” (“Peidek kan me Ken Doudouloale”) me kin mih ni imwin pali laud en irelaud kan nan pwuhken Draw Close to Jehovah.a Pwuhk wet kihda iren sawas kaselel me kak sewese kitail en medemedewe duwen pein kitail! Oaralap tohto me kitail kin onopki nan makisihn en Kahn Iroir oh Awake! kin pil sewese kitail en kin tehk ma kitail mih nan pwoson de soh. Emen Kristian sister koasoiahki iren pwuhken Lepin Padahk me mih nan ehu neitail Kahn Iroir me kitail ahpwtehn onopki oh nda: “Ire pwukat inenen konehng. Re kin sewese ie en kak tehk ma ahi koasoi, wiewia, oh mwekid kan kin pahrekiong sapwellimen Siohwa koasoandi pwung kan.”

9, 10. Soangen mehn sawas dah kan me Siohwa kin ketikihda me kitail kak doadoahngki pwehn kasawih ma iei kitail mih nan pwoson?

⁹ Kitail pil kin ale iren kaweid oh kangoang tohto kan sang mihding en mwomwohdiso kan, kapokon tikitik kan, oh kapokon laud akan. Mepwukat koaros wia koasoandi en sawas ong atail pali ngehn akan me Siohwa kin ketikihong aramas me Aiseia kohpada duwe: ‘Ni rahn ekei me pahn kohdo, nahnao, wasa me Tehnpas Sarawio kokouda ie, pahn wiahla nahna keieu ile, ilehsang dohl akan koaros. Wehi tohto pahn kin pokondohng rehi, oh towe kan pahn kin nda, “Nna, kitail kohdalahng pohn dohlen Kauno, . . E ahpw pahn ketin kasalehiong kitail kupwure, pwe kitail en keid nan sapwellime ahl akan.’ ” (Aiseia 2:2, 3) E inenen wia kapai ehu en ale soangen kaweid pwukat duwen elen Siohwa kan.

¹⁰ Kitail en dehr pohnsehse kaweid me kin kohsang irail akan me ahneki irair akan, iangahki elder Kristian akan. Me pid irail, Pwuhk Sarawi mahsanih: “Riei ko, ma mie emen rehmwail me lohdiong nan sapwung ehu, kumwail kan me poadidi ni ngehn, kumwail kapwungala. Ahpw kumwail pahn kamantik, oh mwasamwasahn pein kumwail, pwe kumwail de pil lohdiong pahn songosong.” (Kalesia 6:1) Ia uwen atail kalahnganki iren sawas pwukat me kin sewese kapwungkitailla!

11. En kasawih ma kitail mih nan pwoson pidada dah?

¹¹ Neitail sawaspen Paipel kan, mihding en Kristian kan, oh ohl pilipilda kan, mepwukat wia koasoandi kaselel kei sang rehn Siohwa. Pwehn sohng de kasawih ma kitail mih nan pwoson pidada en kasawih pein kitail. Kahrehda ni atail kin wadewadek neitail pwuhk kan de rongorong kaweid sang Pwuhk Sarawi, kitail anahne en pein idek rehtail: ‘Met soh kin kawehwehda duwen ngehi? I kin wia met? I kin tengedihong kamehlele padahk kan en Kristian? Mwomwen atail madamadau kan de wiewia kan ong ire kan me kitail kin ale sang soangen sawas pwukat kin pil kamwekid atail irair en pali ngehn. Pwuhk Sarawi mahsanih, “Pwe mehmen me sohte kin ahneki Ngehn Sarawi, e sohte kak ale kisakis kan me kin pwilisang rehn Ngehno. E pil sohte kak wehwehki soahng pwukat, pwe e kin wiahki mehkot mwahl.” Ahpw, “aramas emen me ngehn sarawi kin mih reh e kak kasawih mehkoaros.” (1 Korint 2:14, 15) Kitail soh anahne en kasalehda madamadau ngenin oh kasalehda atail kalahnganki dahme kitail wadek nan neitail pwuhk kan, makisihn kan, oh pwuhk teikan iangahki dahme kitail kin rong nan atail mihding kan oh sang rehn elder kan?

Kumwail Wia Keseupen Pein Kumwail

12. Dahme pidada atail kasawih pein kitail?

¹² En kalelapak oh wia keseupen pein kitail pidada emen emen en pein kasawih pein ih. Ei, kitail kak mih nan padahk mehlel, ahpw ia uwen atail mour kin pahrekiong padahk mehlel? En kalelapek oh kasawih pein kitail pidada en kasalehda atail mah ni pali ngehn oh mehlelpen atail kalahnganki mwengehn ngehn kan.

13. Nin duwen me Ipru 5:14 kasalehda, dahme kin kasalehda me kitail mah ni pali ngehn?

¹³ Soangen mah ni pali ngehn dah me kitail anahne kasawih rehtail? Wahnpoaron Pohl ntingihdi: “Kisin tungoal kekeluwak, iei ih me aramas koahieklahr kan kin tungoale, irail kan me ahnlahr oh esehlahr wekpeseng en me mwahu oh me suwed.” (Ipru 5:14) Kitail kin kasalehda atail mah ni pali ngehn ni atail kin kaiahne atail kehl en wia pilipil. Duwehte sounmwadong men me kin anahne kaukaule kaiahne ekei muscle en nan paliwere pwehn kak pweida nan mwadong, ih pil duwen atail anahne kaiahne atail kehl en pilipil ni atail kin doadoahngki kosonned en Pwuhk Sarawi.

14, 15. Dahme kahrehda kitail en nantiong onopki soahng me loal kan me pid Mahsen en Koht?

¹⁴ Ahpw, mwohn atail kak kaiahne atail kehl en pilipil, kitail anahne alehdi loalokong. Pwehn kak ale met, pein onop kaukaule inenen kesempwal. Ni atail kin kaukaule wia pein onop, keieu soahng kan me loal me pid Mahsen en Koht, atail kehl en pilipil kin kehlailla. Erein sounpahr tohto dower powe, soangen oaralap loal tohto kin kohda nan Kahn Iroir makasihn. Iaduwen atail kin mwekidki padahk mehlel me loal kan? Kitail kin soikala padahk pwukat pwehki re kin audaudki “ekei soahng kan kin apwal en wehwehki”? (2 Piter 3:16, NW) Weksang met, kitail kin wia uwen me kitail kak pwehn wehwehkihla mouren padahk loal pwukat.—Episos 3:18.

¹⁵ Ahpw, iaduwen ma wia pein onop ki apwal ohng kitail? E pahn kesempwal ma kitail en nantiong sukuhliki en perenkihla wia pein onop.b (1 Piter 2:2) Pwehn mahla ni pali ngehn, kitail anahne sukuhliki iaduwen atail pahn kak ale kamwahu sang mwenge kekeluwak, me iei padahk mehlel loal kan sang Mahsen en Koht. Pwe ma soh, atail kehl en pilipil sohte pahn kehlailla. En kasalehda ma kitail mahla ni pali ngehn, kaidehn ihte kehl en pilipil me anahn. Kitail anahne doadoahngki loalokong me kitail alehdihsang atail kaukaule wia pein onop nan atail mour ehu ehu rahn.

16, 17. Kaweid dah me tohnpadahk Seims ketikihda me pid en wiahla “soun kapwaiada Mahsen en Koht”?

¹⁶ Kasalepen ihs kitail pil kin sansal sang atail kasalehda atail kalahnganki padahk mehlel—atail doadoahk en pwoson. Pwehn kasalehda kesempwalpen kasawih pein kitail, tohnpadahk Seims mahsanih: “Kumwail kapwaiada mahsen en Koht, pwe ma kumwail pahn rongorongete, kumwail pahn pitih pein kumwail. Pwe mehmen me kin rongete mahsen en Koht ahpw sohte kin kapwaiada, e rasehng aramas me kin irongen nan kilahs ehu oh kin kilang uhdahn mwomwen pein ih. A ni eh kin keisang ni kilahso, e kin mwadang manokehla mwomwe. A me kin tehk mwahu kosonned unseko me kin kasaledekla aramas, me iei Rongamwahu en Krais, oh kin dadaurete, sohte kin rongete oh manokehla, ahpw kapwaiada--iei aramas menet me Koht pahn ketin kapaiada ni mehkoaros me e pahn kin wia.”​—Seims 1:22-​25.

¹⁷ Mouren mahsen en Seims iei met: ‘Irongih iuk nan kilahs en Mahsen en Koht, oh kasawih pein kowe. Kaukaule wia met, oh kasawih pein kowe ni ahmw doadoahngki dahme ke diar sang Mahsen en Koht. Ken dehr mwadang manokehla dahme ke kilang. Kawekila dahme ke kilang me anahne ken wekidala.’ Mehlel, ekei pak, e kin apwal en kapwaiada kaweid wet.

18. Dahme kahrehda e apwal en idawehn kaweid me Seims ketikihda?

¹⁸ Ehu karasepe iei anahnepen iang kisehn doadoahk en kalohki Rongamwahu en Wehio. Pohl ntingihdi, “Pwe atail pwoson kin tepisang nan kapehditail, oh ihme kitail kin pwungkihla rehn Koht; atail kadehde kin tepisang ni ewetail, oh ihme kitail kin mourkihla” (Rom 10:10) Pwehn kak kalohk ong aramas koaros ni atail doadoahngki awatail, kitail anahne wia wekidekla tohto. Pali laud en kitail sohte mengeiki wia doadoahk en kalohk. Pwehn kak pwerisek nan doadoahk en kalohk oh kesempwaliki met nan atail mour, kitail anahne wia wekidekla tohto kan oh meirongkihla soahng tohto. (Madiu 6:33) Ahpw, ahnsou me kitail pahn tepidahr kapwaiada pwukoa wet me Koht ketikihdo, kitail pahn peren pwehki kitail kapinga Siohwa. Eri, iaduwen, kitail kin ngoangki atail doadoahk en kalohki Rongamwahu en Wehio?

19. Dahme iang pidada atail doadoahk en pwoson?

¹⁹ Ia pahn uwen laud en atail doadoahk en pwoson? Pohl ntingihdi: “Kumwail doadoahngki dahme kumwail padahngki oh ale sang rehi, sang ni ei lokaia oh pil ei wiewia kan. Eri, Koht, me kin ketikihong kitail popohl, en ketin ieiang kumwail.” (Pilipai 4:9) Kasalepen ihs kitail kin sansal sang atail kapwaiada dahme kitail sukuhliki, alehda, rong, oh kilang uwen laud de tohtohn irail akan me inoukihdahr ahr mour oh wiahlahr tohnpadahk Kristian kei. Siohwa doadoahngki soukohp Aiseia en kaweidkin kitail met, “Iet ahlo, kumwail idawehn.”—Aiseia 30:21.

20. Soangen aramas dah kan me kin wia kapai laud ehu ong mwomwohdiso?

²⁰ Ohl oh lih akan me kin wia tohnsukuhl kaukaule kei en Mahsen en Koht, me kin pwerisek ong kalohki Rongamwahu, me kin mehlel nan ahr loalopwoat, oh me kin wia soun utung lelepek kei en Wehio kin wia kapai laud ehu ong mwomwohdiso. Irail kin wia mehn kakehl kei en mwomwohdiso kan me re kin wia kiseh. Irail pil kin wia mehn sawas laud ong irail me kapw tohto me anahne sawas. Ni atail pahn kin alehda nan atail mohngiong kaweid en Pohl en ‘wia keseupen pein kumwail ma kumwail weweidki pwoson,’ kitail pahn pil wiahla mehn kahlemeng mwahu ong meteikan.

Perenki Kapwaiada Kupwuren Koht

21, 22. Iaduwen atail pahn kak perenki wia kupwuren Koht?

²¹ Nanmwarki en mehn Israel ko Depit kouliki, “Maing ei Koht, ia uwen ei kin ngoangki kapwaiada kupwuromwien! I kin kolokol sapwellimomwi padahk kan nan mohngiongiet.” (Melkahka kan 40:8) Depit kin perenki wia kupwuren Koht. Pwekida? Pwehki Sapwellimen Siohwa kosonned mih nan mohngiong en Depit. Depit uhdahn wehwehki mehnia ahl me e pahn keid loale.

²² Ma sapwellimen Koht kosonned mih loalatail, kitail sohte pahn sehse mehnia ahl me kitail en keid ie. Kitail pahn kin perenki kapwaiada kupwur en Koht. Eri, kitail en ‘nantihong’ ni atail papah Siohwa sang mohngiongatail.—Luk 13:24

[Nting tikitik me mi pahs]

Ke Tamatamante?

• Iaduwen kitail kak kasawih ma kitail mih nan pwoson?

• Dahme pidada en kasalehda ihs kitail?

• Iaduwen kitail kak kasalehda me kitail wia Kristian kei me mah ni pali ngehn?

• Iaduwen atail doadoahk en kasalehda atail pwoson kak sewese kitail en kasawih duwen kitail?

[Kilel nan Pali 9]

Ke ese ia ahl me keieu mwahu en kasawih ma kitail mih nan pwoson?

[Kilel nan Pali 10]

Kitail kin kasalehda atail wia Kristian mah kei ni atail kin doadoahngki atail kehl en pilipil

[Kilel nan Pali 11]

Kitail kin kasalehda ihs kitail ni atail ‘sohte kin wia sounrongorong kei me kin manokehla, ahpw kitail kin wia sounkapwaiada Mahsen en Koht’