Prokram Kapw en Kapokon en Circuit

Iaduwen kitail kak en kesihnenda teng ong irail kan me kin uhwong laud padahk mehlel? Iaduwen kitail kak powehdi ahn Sehdan kasongosong kan me kin kalapw kasonge kitail en pwurala loale? Prokram en kapokon en circuit ong pahr en kalohk en 2009 pahn sapengla peidek kesempwal pwukat. Oaralap en kapokon iei “Omw Mwahu en Powehdi me Suwed.” (Rom 12:21) Pahn mie padahk kangoang tohto kan me pahn kakehlailih atail pwoson nan kapokon en rahn riau, oh ekei padahk pwukat pahn pilipilda ong kapokon en rahn ehu.

Sounapwalih en district pahn wia ekei padahk kan me oaralap koasoia “Kakehlailih Omw Mwahu en Powehdi me Suwed,” “Kanahieng en Dehr Nohk Koapworopworki Pein Kowe!,” “Suwed Koaros Kereniong Pahn Sohrala!,” oh “Kakehlailih Atail Pwoson en Powehdi Sampah.” Sounapwalih en circuit pahn wia ekei padahk kan me oaralap koasoia “Iet Ahnsou en Pepehd!,” me poahsoankihda Rom 13:11-13, oh “En Dehr Kasalehda Luwet ni Ahnsou Apwal,” me poahsoankihda Lepin Padahk 24:10. Kitail pil kasikasik sang padahk en sounapwalih en circuit me koasoia “Tehk Duwen Anahn akan en Circuit.” Pil ehu padahk kangoang iei “Ke Kak Pwaisanki Doadoahk en Papah—Wia Doadoahk en Pioneer?” Keieun symposium me koasoia “Pelianda Kehlail Ahn Tepil Widing Suwed kan.” E pahn sewese kitail en kasawih oh soikala widing suwed kan en Tepil me kin mih nan pali en computer ape oh mehn kamweit kan oh pali en kasukuhl. Keriaun symposium me koasoia “Alehdi Kehl en Pelian nan Rahn Suwed Pwukat” pahn kasalehiong kitail iaduwen doadoahngki mwahu kaweid en Paipel me dierek nan Episos 6:10-18.

Kalohki rongamwahu en Wehio kin pid kalowehdi me suwed. (Kaud. 12:17) E sohte kapwuriamwei ahn Sehdan kin kalapw kaloke Sounkadehdehn Siohwa kan! (Ais. 43:10, 12) Ahpw Sehdan sohte pahn pweida pwehki kitail koasoanehdi teng en kolokol ‘atail mwahu en powehdi me suwed.’ Wiahda koasoandi mwahu en iang paiekihda sang kapokon en circuit wet.