Kitail Kak Wia Uwen Me Kitail Kak Nan April 2000?
1 Ni soutik en Ni Esil, April 19, pahn wia ehu ahnsou me keieu kesempwal nan atail pahr en kalohk. Rahno, ni ketipin pahn kihrla nan ehu ehu wasa, ehu ehu mwomwohdiso oh pwihn en Sounkadehde kan en Siohwa wasa koaros nan sampah pahn wia arail Katamanpen Kamatalahn Krais. Pahr me ahpwtehn nek, irail me keieu wia arail Kataman iei irail kisin pwihn en sapwellimen Siohwa ladu kan nan Christmas Island, me mihmi palidohsang international date line. Sohte lipilipil iawasa kitail kin mih ie, atail kasarawi rahn me Sises Krais matkinkitailla pahn wia wiewia ehu me keieu kesempwal nan pahro. Rahn me Katamano pahn wiawi kileledi pohn “Kalendar me Soahng Ngehnin kan kileledi powe ong April 2000,” me mihmi ni pali 6 en insert wet.
2 Nan sounpwong en April pwon, mie atail ahnsou mwahu en kasalehda me kitail kalahnganki sapwellimen Siohwa kadek ni e ketkihda sapwellime Ohl en matkinkitailla oh kalahngan wet kohsang mohngiongatail. Iaduwen? Wahnpoaron Pohl ntingihdi: “Pwe limpoak en Krais me kamwakamwakid kiht, pwehki at dehdehkier padahk wet: aramastehmen pwoukihla aramas koaros; met wehwehki me aramas koaros pil iang mehla. E ketin pwoukihla aramas koaros, pwe irail kan me momour, re dehr kin mourki pein ihr, ahpw re en kin mourkihte ih me pwoukinirailla oh ketin iasada pwe en ketikihong irail mour.” (2 Kor. 5:14, 15) Ei, nan April, kitail kak kasalehda me kitail sohte kin mourki pein kitail ahpw kitail mourki ih me pwoukinkitailla, oh kitail kak kasalehda met ni atail pahn wia uwen me kitail kak nin duwen sounkalohk kan en Wehio!
3 Iang Doadoahk en Auxiliary Pioneer nan April: Wahnpoaron Pohl wia mehn kahlemeng mwahu ong kitail ni e mahsanih: “I sohte katapaniki ei mour; ihte I men kapwaiada pwaisei doadoahk me Kaun Sises ketikihong ie, me iei I en kalohkiseli Rongamwahu duwen kalahngan en Koht.” (Wiewia 20:24) Kitail kin pil ahneki pwais kaselel wet en kalohki ong aramas koaros duwen Siohwa Koht. Ihme kahrehda, kitail men wia uwen me kitail kak nan April oh kitail kak wia met ni atail pahn iang doadoahk en Auxiliary Pioneer!
4 Pwehki nan April 2000 mie Rahn Kaunop limau oh Rahn Sarawi limau, ihme e pahn wia ahnsou mwahu ong tohto en iang doadoahk en pioneer. Nan April 1989, ni ahnsou me keieu tohto iang doadoahk en Auxiliary Pioneer, meh 120,979 me iang doadoahk en Auxiliary Pioneer me wehwehki persent 15 en sounkalohk koaros. Sounpahr eisek mwuri, irail me iang sounkalohk kekeirada daulih persent 18. Met wehwehki me irail me iang doadoahk en Auxiliary Pioneer nan April 2000 kak daulih irail me iang Auxiliary Pioneer nan 1989. Oh pil, awa kan me Auxiliary Pioneer anahne wiahda tikitikla, eri, tohto nan mwomwohdiso kakete iang doadoahk wet. Emen emen sounkalohk me papidaislahr anahne kapakap oh medemedewe ma e kak iang doadoahk en Auxiliary Pioneer nan April 2000.
5 Ni ahmw pahn doadoahngki “Kalendar me Soahng Ngehnin kan kileledi powe ong April 2000” me mihmi nan insert wet, ke kak koasoanehdi ahmw koasoandi ong sounpwong kohkohdo. Pilada mehnia rahn kan ke kak iang kalohk oh kapatahda awa koaros me ke kak iang kalohk nan sounpwongo pwon. Ke kak pil kapataiong awa kan me ke kin kalohk ni ahnsou sohte lipilipil. Ahmw awa kan me ke kapatapene lel awa 50, awa kan ong Auxiliary Pioneer kan? Ma sohte itar, ke kak kilang iawasa ke kak kapataiong ekei awa kan pwehn lel ahmw awa nin duwen emen Auxiliary Pioneer? Ma ke kalohk ihte awa ehu oh minit 40, ke kak lel awa 50 ong sounpwongo pwon.
6 Pwehki awa kan me Regular Pioneer anahne wiahda pil tikitikla, eri ke kin medemedewe ma ke kak iang doadoahk en Regular Pioneer? Ke kin awiawih lao ahnsoun karakar (summer) pwehn tepida? Pwe ahnsoun kopou nekier, April pahn wia sounpwong mwahu en tepida! Ma ke sehse ma ke kak lel awa 70, dahme ke soh Auxiliary Pioneer nan April oh akadeiong awa 70? Ma ke kak lel awa 70 nan April, ke pahn pehm me ke kakehr iang doadoahk en Regular Pioneer.—Kilang pwuhken Organized to Accomplish Our Ministry, pali 113-114.
7 Wia Uwen Me Kitail Kak Nin Duwen Sounkalohk kan en Rongamwahu: Ong kitail koaros, sounkalohk kan oh pioneer kan, atail limpoak ong Koht oh mehn mpatail kin kamwekid kitail en wia uwen me kitail kak ni atail kin papah Siohwa nin duwen pein atail irair kan. (Luk 10:27) Sang nan mohngiongatail, kitail men kasalehda me “kitail kin nantihong oh doadoahk laudki pwe kitail kin koapworopworki Koht ieias me iei Sounkomour en aramas koaros, ahpw mehlel en irail kan me kin pwoson.” (1 Tim. 4:10) Ihme kahrehda, kitail kak kasikasik me koaros pahn kalaudehla arail awa en kalohk nan April, oh kitail en wia uwen me kitail kak nan doadoahk en kalohki Wehio.
8 Kitail en dehr manokehla sapwellimen Sises kaweid: “Mehlel pwe rahket me inenen laud, a tohndoadoahk kan me malaulau. Kumwail eri kapakap oh peki rehn Kaunen rahket pwe en ketin kadarodo tohndoadoahk tohto pwe re en iang doadoahk.” Mwurinte e mahsanih met, e malipepene sapwellime wahnpoaron 12 oh kadarala irail ong kalohk. (Madiu 9:37, 38; 10:1, 5, 7) Mwurin sounpahr ehu, mwurin irail 12 me kaiahnda nan doadoahk en kalohk, Sises “pilada tohnpadahk isiakan oh ketin poaronepeseng mwowe” oh padahkiong irail kaweidohte: “Rahket me inenen laud . . . Kumwail eri kapakap oh peki rehn kaunen rahket pwe en ketin kadarodohng tohndoadoahk tohto nan sapwellime rahk.” (Luk 10:1, 2) Pwuhken Wiewia nan Pwuhk Sarawi kin kasalehda iaduwen Siohwa kin sapeng kapakap pwukat. Nan Pendekos 33 C.E., nempehn tohnpadahk kan kekeirada oh lel 120. Mwurin mwo, kekeirada kin wiawi oh tohnpadahk kan tohtohla lel 3,000 oh mwuri, lel 5,000. (Wiewia 1:15; 2:41; 4:4) Mwurin mwo, “tohnpadahk ko . . . ahpw wie tohtohla.” (Wiewia 6:7) Duwehte rahnwet, kitail kin peki rehn atail Soumas en kadarala pil ekei sounkalohki Wehio! Ma kitail men wia mwekid kan me pwung ong atail kapakap akan, emen emen sounkalohk kan anahne wia arail koasoandi en iang kalohk sounpwong koaros.
9 Menlau pwurehng tehk “Kalendar me Soahng Ngehnin kan kileledi powe ong April 2000.” Pwehki April 1 me Rahn Kaunop oh April 2 me Rahn Sarawi, ke kak tepida wia ahmw awa nan sounpwongo? Ke kak utungada rahn kan me kileledi “Rahn en kihla makisihn kan” erein sounpwong en April oh iang ahmw Pwuhk Study? Ke lemeleme ke kak iang kalohk awa ehu de tohto sang Rahn Sarawi koaros? Ni soutik kan, ketipin kin pwand en kihrla. Eri, ke lemeleme ke kak iang kalohk en ni soutik? Oh ke dehr manokehla en isaneki ahnsou mwahu koaros en kalohk nan ahmw wasahn doadoahk, nan wasahn sukuhl oh pil wasa teikan.
10 April kin wia ahnsou mwahu ong irail kan me elder kan kin tehk me re konehng en tepida iang kalohk nin duwen sounkalohk me saikinte papidais. Ma ke kin onop rehn emen me wia kekeirada mwahu, dahme ke soh tuhwong Presiding Overseer oh idek reh ma aramaso kakehr wiahla sounkalohk men? Ma noumw seri kan saikinte papidais, ke koasoiongehr elder kan duwen arail kekeirada ni pali ngehn? Met soh pahn wia ahnsou mwahu en sewese irail en wiahla sounkalohk kei?—Kilang pwuhken Organized to Accomplish Our Ministry, pali 97-100.
11 Ma kitail pahn wia uwen me kitail kak nan April 2000, kitail koaros pahn kalaudehla atail awa kan nan kalohk oh kapedolong atail ripoht en kalohk ni imwin sounpwong. (Pil kilang Mark 6:30.) Irail sounkalohk kapw kan me saikinte papidais pahn anahne sawas en ese iaduwen re pahn audehda neirail doaropwe en “Ripoht en Kalohk” oh kapedolong mwadang ni imwin sounpwong kan. Ma emen emen kitail kin wia uwen me kitail kak nan April, kitail wehwehki me atail doadoahk me kisehn ripohto pwon en April oh kitail kihda atail kaping ong Siohwa sang atail kalohk.
12 Sewese Meteikan en Iang Towehda Kataman: Ke soh pahn perenki kilang kekeirada kapw ong irail me iang towehda Katamanpen Kamatalahn Krais nan 2000? Ei, met pahn wehwehki me aramas tohto sang mahs kin kasalehda arail kalahnganki limpoak me Siohwa Koht oh Sises Krais kasalehong kitail! (Sohn 3:16; 15:13) Koasoanehdi ahmw koasoandi kan pwehn iang towehda Kataman.
13 Met wia ahnsou mwahu en luhke aramas en iang towehda Kataman. Ntingihdi ihs me ke men luhke. Ke kak ntingihdi irail me ke kin onop rehrail mahs oh met, oh aramas me kin perenki rong me ke kin pwurehng pwurala rehrail nan kalohk. Ke kak pil ntingihdi iengomw tohndoadoahk kan, iengomw tohnsukuhl kan, mehn mpomw oh pil irail me ke kin tuhwong nan wasahn doadoahk. Oh pil, ke dehr manokehla aramas akan me ke kin ese oh ahmw peneinei. Mwurin ke ntingihdi irail koaros, ke kak nantihong en tuhwong irail koaros oh luhke irail. Kasalehong irail, ni sansal, iahd oh iawasa Kataman pahn wiawi. Ni ahnsou me April 19 pahn keren, pwurehng katamankin irail me ke tuhwong, ke kak pein pwurala rehrail de ke kak call irail ni telephone. Ke kak ndaiong irail me ke kak kohla pwekada irail pwe re kak iang komwi ni ahmw pahn kohla ni Kataman.
14 Nin duwen kaweid me kohwong elder kan sang Society, elder kan pahn nantihong tuhwong irail me sounkalohk kan mahs ahpw luwetala oh sohla iang kalohk (inactive publishers) pwehn iang towehda Kataman. (Madiu 18:12-14) Elder kan anahne kousapahlih kisin likou sang Society me “February 2, 1999” kileledi powe. Secretary en mwomwohdiso pahn ntingihdi irail me sounkalohk mahs ahpw sohla (inactive publishers), oh Service Overseer pahn koasoanehdi ihs rehn elder kan pahn nantihong tuhwong irail oh luhke irail en iang towehda Kataman. Ma elder kan pahn mwadang kohla rehrail oh kihong irail kangoang, re kakete pwurehng men iang kalohk oh mwein kak pwurehng iang kalohk nan April. Ahnsou me re pahn pwurehng iang kalohk, e pahn mwahu ma re pahn iang emen sounkalohk koahiek nan kalohk.
15 Kangoange Koaros en Iang Kalohk Nan April! Elder kan oh ministerial servant kan oh tapwin peneinei kan koaros kak sawaspene pwehn wia uwen me kitail kak nan April 2000. Elder kan pahn nantihong koasoanehdi mwahu koasoandi kan oh pein irail pahn wia mehn kahlemeng mwahu ong wia uwen me re kak nan kalohk. (Ipru 13:7) Re kak koasoanehdi mwahu kalohk erein wihk kan oh ni imwin wihk kan. E pahn mwahu en koasoanehdi pil ekei mihding en kalohk kan ong mwurin souwas oh ni soutik kan. E pahn mwahu ma elder kan pahn ntingihdi koasoandi pwukat oh langahda ni “Information Board.” Re kak koasoanehdi emen en kihpeseng pwihn en kalohk kan. Irail me pahn kihpeseng pwihn en kalohk pahn anahne kihong sounkalohk kan wasahn kalohk me itar ong ahnsoun ihmw-lel-ihmw.
16 Nan April, kitail pahn kihla makisihn en Watchtower oh Awake! kan. Pwehn tepiada onop en Paipel rehn aramas akan, kitail kak pil kihong irail me perenki rong neirail brochure Kupwurki. Ihme kahrehda, elder kan anahne tehk ma mie itar makisihn kan oh brochure kan ong sounpwong en April.
17 Ni imwin sounpwongo, irail brother kan me kin wia Pwuhk Study iangahki irail brother kan me kin sewese irail—kaidehn ihte Secretary en mwomwohdiso—pahn kak sawas pwehn ale ripoht en kalohk kan sang koaros me iang kalohk nan April. Re anahne kangoange sounkalohk koaros en mwadang kapedolong arail ripoht kan mwurinte imwin sounpwongo. Mwein soahng pwukat kak wiawi ni soutik en Rahn Sarawi, April 30. Oh, ahnsou me Secretary kin kihpene ripoht kan, oh e kilang me ekei sounkalohk kan saikinte kapedolong arail ripoht kan, e kak katamankin irail, ni kadek, en kapedolong arail riport mwohn e pahn kadaralahng Society mwohn May 6.
18 Ahnsoun Kataman kin wia ahnsou kesempwal ehu ong sapwellimen Koht aramas akan. E kin wia ehu ahnsou me kedirepw nan doadoahk en Siohwa. E pahn wia ahnsou mwahu ma sounkalohk koaros pahn wia uwen me irail kak, ma re kak iang doadoahk en Auxiliary Pioneer, e pahn mwahu, pwehn kihda ahnsou laud nan kalohk oh sewese tohto en iang towehda Katamanpen Kamatalahn Krais. Kitail en kapakapki sapwellimen Siohwa kapai laud kan en sewese kitail en wia uwen me kitail kak nan April 2000, oh kihda kaping laud ong Siohwa!—Ipru 13:15.
[Kaokon nan Pali 3]
Auxiliary Pioneers
Me Keieu Tohtohn Irail me Iang Doadoahk en Auxiliary Pioneer:
120,979
(April 1989)
[Kaokon nan Pali 4]
cSounkalohk
Sounkalohk me Keieu Tohto: 1,040,283
(August 1998)
[Kaokon nan Pali 5]
Iang Towehda Kataman
Keieun Tohto Sang Mahs Lel Met: 2,135,167
(1997)