April—Ahnsoun ‘Doadoahk Laud oh Nannanti’

¹ Wihk kei mwohn oh mwurin Kataman kin wia ahnsoun medemedewe laud oh doudouloale ong sapwellimen Siohwa aramas akan. Met kin wia ahnsoun medemedewe dahme wiawi pwehki sapwellimen Sises pwoula oh pil ahnsoun medemedewe koapworopwor me Koht ketikihong kitail oh me kitail kak ahneki koapworopwor wet pwehki Sises matkinkitailla. Ni ahmw kin medemedewe duwen Kataman en pahr me ahpwtehn nek me wiawi ni April 19, dahme ke kin medemedewe? Ke kak tamataman aramas akan me ke kilang ni soutik en rahno? mwengehn ngehn me kitail kang rahn en Katamano? kapahrek me wiawi me brothero wia iangahki iren Paipel kan oh kapakap kan me wiawi rahno? Mwein ke koasoanehdi nan kapehdomw me ke pahn kalaudehla ahmw kasalehda ahmw kalahnganki limpoak me Siohwa oh Sises kasalehong uhk. Iaduwen​—⁠dahme ke medemedewe ahnsowo kin kamwekid uhk ahnsouwet?

² E sansal me sapwellimen Siohwa aramas akan kin kasalehda arail kalahngan laud sang ihte arail lokaia. (Kol. 3:​15, 17) Ni mehlel, nan April en pahr me ahpwtehn nek kitail kasalehda atail kalahnganki dahme Siohwa wia pwe kitail kak ale komourpatail oh kitail kasalehda kalahngan wet ni atail kalaudehla atail awahn kalohk. Ong mwomwohdiso kan me mihmi pahn epwelpen Rahn Ohpis en Guam, irail me iang doadoahk en Auxiliary Pioneer nan 2000 kekeirkihda persent 23 sang kekeirada kapw nan pahr mwowe kan. Arail (Auxiliary Pioneer kan) nannanti, iangahki nannanti en sounkalohk teikan, kahrehda kekeirada kapw kan nan awahn kalohk kan, kihla makisihn kan, oh return visit kan. Atail peren pil kin laudla ahnsou me kitail kilang aramas tohto tepida onop Paipel oh pil kekeirada kapw nin duwen irail me iang towehda Katamano!

³ Ni mehlel, pwehki kitail kin uhdahn kamehlele me atail koapworopwor pahn pweida, met kin kamwekid kitail en wia uwen me kitail kak nan doadoahk en Siohwa. E duwehte dahme wahnpoaron Pohl ntingihdi: “Eri, ihme kahrehda kitail kin nantihong oh doadoahk laudki pwe kitail kin koapworopworki Koht ieias me iei Sounkomour en aramas koaros, ahpw mehlel en irail kan me kin pwoson.”​—1 Tim. 4:​10.

⁴ Nan ahnsoun Kataman en pahr wet, iaduwen ke kak kasalehda ahmw pwoson dahme Siohwa wiahdahr pwe kitail en ale komourpatail? Nan April en pahr me ahpwtehn nek, kitail kilang kekeirada me keieu laud en sounkalohk kan me mihmi nan mwomwohdiso kan me mihmi pahn epwelpen Rahn Ohpis en Guam. Kitail kak daulih kekeirada en pahr me ahpwtehn nek? Kitail kak lel mehn akedei wet. Ahpw, e pahn wehwehki me sounkalohk koaros, irail me papidaisla oh irail me saikinte papidaisla, anahne iang kalohk. Sounkalohk kapw kan pahn kak tepida kalohk. Ihme kahrehda, ni ahmw pahn koasoanehdi ahmw koasoandi kan pwehn doadoahk laud oh nannanti nan sounpwong en April, medemedewe ahl akan me ke kak kangoange meteikan, iangahki me kapw kan oh irail me sohte koahiek nan kalohk, en iang uhk nan kalohk.

⁵ Sewese Irail me Sohte Kin Kalap Iang Kalohk: Ma ke ese ekei sounkalohk kan me sohte iang kalohk nan sounpwong ehu de riau, ke kak luhke ih en iang uhk nan kalohk. Ma ekei nan mwomwohdiso sohla iang kalohk, elder kan kak mwemweitla rehrail oh kangoange irail en pwurehng iang kalohk nan April.

⁶ Kitail koaros anahne pekihda sapwellimen Siohwa ngehn sarawi pwehn kakehlailih kitail nan kalohk. (Luk 11:13) Dahme kitail anahne wia pwehn alehdi ngehn sarawi? Kitail anahne wadek Mahsen en Koht. (2 Tim. 3:​16, 17) Kitail pil kak “rong dahme Ngehn Sarawi mahmahsanihong mwomwohdiso kan” ni atail pahn iang towehda mihding limau kan koaros me kin wiawi ehuehu wihk. (Kaudiahl 3:6) Met kin wia ahnsou mwahu en sewese irail me sohte kin iang kalohk ehu ehu sounpwong iangahki irail me sohla kin iang kalohk pwe ren kak onop Paipel oh iangahki sawaspen Paipel kan ahnsou koaros oh pil sewese irail en iang towehda mihding kan koaros. (Mel. 50:23) Kitail kak wia met ahpw ni ahnsowohte kitail anahne tehk kanahieng pein atail pali ngehn. Ahpw, mie pil mehkot me anahn.

⁷ Wahnpoaron Peter kawehwehda me Koht kin ketikihong “irail koaros me kin peikiong ih” sapwellime ngehn sarawi. (Wiewia 5:​32) Ma kitail kin peikiong Koht, e kin wehwehki me kitail anahne peikiong kehkehlik en “kalohk ong aramas koaros.” (Wiewia 1:8; 10:​42, New World Translation) Ihme kahrehda, mendahki e mehlel me kitail anahne sapwellimen Koht ngehn sarawi pwehn kakehlailih kitail nan kalohk, e pil mehlel me ni atail pahn kasalehda atail ineng en kaperenda Siohwa, e pahn pil sewese kitail. Kitail en dehr mwamwahliki kesempwalpen tepin ewen kahk kan me kin kasalehda atail peikiong Siohwa sang loalatail!

⁸ Sewese me Pwulopwul kan: Pahpa oh nohno kan, ke kin kilang me noumw seri kan kin koasoiong meteikan duwen padahk mehlel? Ke kin iang noumw seri kan nan kalohk? Noumw seri kan kin tiahk mwahu? Ma iei, dahme kahrehda ke kin pweiek? Tuhwong emen elder sang irail elder kan me kin wia Congregation Service Committee, oh tehk ma noumw seri kan kak wiahla sounkalohk nan sounpwong en April. (Tehk pwuhken Our Ministry, pali 99-​100.) Tamataman me noumw seri kan kak pil kasalehda arail men kapinga Siohwa ahnsou kan mwohn oh mwurin Kataman, iangahki ahnsoun Katamano.​—Madiu 21:15, 16.

⁹ Emen Kristian nohno nan Georgia, U.S.A. kin ahnsou koaros kangoange nah serepein en koasoiong meteikan duwen Siohwa. Nan pahr me ahpwtehn nek, ahnsou me serepeino iang eh nohno kalohk, e kihong emen ohl brochure Kupwurki oh serepeino kawehwe ekis duwen audepen brochure. Ohlo idek rehn serepeino: “Ke sounpahr depe?” Serepeino nda: “Sounpahr isuh.” Ohlo pwuriamweikihla en serepeino eh wia padahk me wehwe mwahu. Ohlo tikida rehn Sounkadehde kan oh kin werekiong irail ahpw e sohte mwekidki dahme e rong sang Sounkadehde pwukat. Ahpw, mwurin e koasoiong serepeino, e tepida onop Paipel, iangahki eh pwoud lih oh nah serepeino.

¹⁰ Me pwulopwul tohto wiahlahr sounkalohk kan oh kitail kin inenen perenki arail kin iang kitail ahnsoun kalohk. Irail me pwulopwul pwukat kakete kangoange me pwulopwul teikan. Ahpw, sounpwong en April pil kin wia ahnsou konehng ong peneinei kan en kakehlailih nanpwungarail oh pil kakehlailih arail pali ngehn ni arail pahn ehupene nan kalohk. Tapwin peneinei kan en tiengala mwowe en koasoanehdi soahng pwukat.​—Lepin Padahk 24:27.

¹¹ Sewese me Kapw kan: Iaduwen irail me kapw kan me ke kin onop Paipel rehrail? Re kak pil iang kalohk nan April? Mwein re nda me re kin perenki koasoiong meteikan dahme re sukuhliki ahnsou me kumwa koasoiapene pwuhken Knowledge, irelaud 11, parakrap 14 de pwuhken Mour Kohkohlahte, irelaud 15, parakrap 18. Ma ke kereniong kanekehla pwuhken Mour Kohkohlahte, kaunopada pwe ken kak koasoia ire wet ni ahl me sansal ni amwa pahn wia irelaud 30, parakrap 11 me kin koasoia: “Kadehde ahmw limpoak mehlel ong Siohwa oh kisehmw akan ni ahmw iang pwaisaneki doadoahk en kalokalohk oh padapadahk me kin kamourala aramas. (1 Korint 9:16; 1 Timoty 4:16)” Ke lemeleme met pahn sewese irail me kin onop Paipel rehtail en mwekidki dahme re sukuhliki?

¹² Aramaso me ke kin onop Paipel reh kin kamehlele Mahsen en Koht? E kin kapwaiada dahme e kin sukuhliki sang nan Paipel? E kin kasalehda sang eh mour me e kin kapwaiada kaweid me mihm nan Pwuhk Sarawi? E kin iang towehda mihding kan koaros? E men papah Siohwa Koht? Eri, dahme ke soh kangoange ih en tuhwong elder kan oh idek rehrail ma e kak iang kalohk nin duwen emen sounkalohk me saikinte papidaisla oh kumwa kak ehupene nan kalohk nan sounpwong en April? (Tehk pwuhken Our Ministry, pali 97-99.) Ni ahl wet, e pahn kak pehm iaduwen sapwellimen Siohwa pwihn sansal kak utungada ih ni eh pahn nantihong papah Siohwa.

¹³ Mehlel, ekei irail me kin onop Paipel kin kekeirada mwadang sang ekei. Ihme kahrehda, nin duwen kaweid me mihmi nan Atail Doadoahk Ong Wehio en June 2000, pali 4, parakrap 5-6, sounkalohk tohto kin onop keriaun pwuhk rehn irail akan me nin tepio kasalehda me re men rong ahpw, mwuri, re anahne sawas pwehn kak uhdahn iangala padahk mehlel oh wiahla sounkalohk kan. Kitail sohte men kesehla atail koapworopworki me irail me mohngiong mehlel kan pahn ehu rahn wiahla sapwellimen Sises tohnpadahk kan, “mehnda ma ahnsou mwotomwot de reirei.” (Wiewia 26:29) Ahpw, ma ke tamataman sounpwong depe ke onop rehn aramaso oh ke kak nda me ke onop rehn aramaso ahnsou “reirei,” mwein sounpwong en April pahn wia ahnsou mwahu me aramaso kak kasalehda eh kalahnganki meirong tomw en Krais?

¹⁴ Iaduwen Ke Kak Sewese Irail: Kitail kin sukuhliki soahng tohto ong iaduwen kitail kak sewese irail me kapw kan nan kalohk en koahiekla ni atail pahn kasawihada iaduwen Sises kaiahne meteikan. E sohte ihte rapahki pokon en aramas oh ahnsou me e diar aramas akan padahkiong sapwellime wahnpoaron kan en tepida koasoi ong irail. E kasalehda kesempwalpen iang doadoahk en kalohk, kangoange irail en kapakap ahnsou koaros oh pil kihong irail soahng siluh: emen en iang irail, wasa kan me re pahn kalohk ie, oh pil dahme re pahn nda. (Madiu 9:​35-​38; 10:​5-7; Mark 6:7; Luk 9:​2, 6) Ke kak pil wia duwehte. Mendahki ke pahn sewese pein noumw seri, emen me ke kin onop Paipel reh me ahpwtehn pahn iang kalohk, de emen me sohla kin iang kalohk oh ahpwtehn pwurehng iang kalohk, e pahn pil mwahu en sewese irail ong soahng pwukat.

¹⁵ Kasalehda Kesempwalpen Kalohk: Kasalehong aramaso kesempwalpen iang doadoahk en kalohk. Kasalehda me ke kin perenki doadoahk en kalohk oh iaduwen doadoahk en kalohk kin pweida mwahu. Kasalehda ekspiriens kan me kin kasalehda me doadoahk en kalohk kin pweida mwahu nan pein ahmw wasa. Kasalehda duwen iaduwen Sises kin medemedewe duwen aramas me sansalda nan Madiu 9:​36-​38. Kangoange aramaso me men wiahla emen sounkalohk de aramaso me sohla iang kalohk ahpw met kin pwurehng iang kalohk en kapakapki pein eh doadoahk en kalohk ni eh kin iang kalohk oh pil en kapakapki doadoahk en kalohk me kin wiawi wasa koaros nan sampah.

¹⁶ Sewese Ih en Medemedewe Duwen Ahnsou Dah kan me E Kak Kalohk ong Aramas akan: Kangoange ih en iang pwihn en Pwuhk Study ong kalohk ihmw-lel-ihmw. Kangoange ih en kalohk ong eh peneinei oh aramas me e kin ese oh pil ienge tohndoadoahk kan oh ienge tohnsukuhl kan ahnsoun mwengehn souwas. Ni ahnsou me kitail kin iang taxi, de mehn peidaid en wehi pokon, kitail kak tepida koasoi ong aramas akan ni atail pahn kasalehda me kitail nsenohki irail. Ni atail kin tiengala mwowe oh koasoiong meteikan oh kasalehda atail nsenohki meteikan, pak tohto mie mehkot me irail kin koasoia me kin kihong kitail atail ahnsou mwahu en kalohk ong irail. Ni mehlel, ahnsou mwahu tohto kin kohda “rahn koaros” me kitail kak kasalehong meteikan duwen atail koapworopwor.​—Mel. 96:​2, 3.

¹⁷ Ni mehlel, e pahn mwahu ma kowe oh sounkalohk kapwo pahn ehupene nan kalohk en ihmw-lel-ihmw mwadang. Ma ke men kalaudehla ahmw kalohk nan sounpwong en April, idek rehn brother me kin kihseli wasahn kalohk kan ma ke kak ale ahmw wasahn kalohk me karanih imwomw. Ma ehi, met pahn kihong uhk ahnsou mwahu en kalohk wasao oh nantihong tuhwong aramas koaros me kin mihmi wasao. Karasepe ieu, ahnsou me ke nek kalohk de ke kohla ni Kingdom Hall de wasa teikan, mwein ke pahn kilang me tohnihmwo mihmi ahnsowo, me mwowe tohnihmwo sohte mie de ke tamanda me mahs ahnsou me ke tuhwong tohnihmwo, e perenki rong. Ma ke kak, uhdi wasao oh kalohk ong tohnihmwo ni ahnsou mwotomwot. Met pahn kahrehong uhk en perenki kalohk pwe ke pahn kilang ahmw kalohk pweida ni ahmw pahn tuhwong aramas akan me kin perenki rong.

¹⁸ Kaunopada Padahk me Aramas Pahn Perenki Rong: E kin mwahu ahnsou me emen kin men kasalehda duwen Wehin Koht, ahpw e pil pahn mwahu sang ma e pahn kasalehda dahme e pahn koasoia ni ahl me ngoang, keieu ma e wia sounkalohk kapw de e wia emen me sohla kalohk ahpw ahpwtehn pwurehng iang kalohk. Sewese irail me kapw kan de irail me pwurehng iang kalohk en kaunopada oh met pahn uhdahn katapan. Service Mihding kan oh mihding en tuhpene en kalohk kan kin kasalehda mehn sawas kan me kin sewese kitail ahnsoun kalohk, ahpw pein kaunopada mwohn kalohk kin keieu mwahu.

¹⁹ Iaduwen ke kak sewese sounkalohk kapw kan en kaunopada ong kalohk? Kumwa kak kaunopada padahk en kihla makisihn, oh tamataman me padahko pahn mengei oh mwotomwot! Idek rehrail en medemedewe dahme kin wiawi me aramas nan pein amwail wasahn kalohk pahn nsenohki, oh mwurin mwo, rapahki ire ieu nan makisihn me pahn dokedoke dahme wiawi. Kihong ih en praktis padahko, oh doadoahngki mwadang padahko nan kalohk.

²⁰ Sewese Irail me Iang Katamano en Mwekidki Padahk Mehlel oh Wiahla Sounkadehde: Nan April 2000, irail me iang towehda Katamano tohtohki aramas rar pak 14.8. Ahpw, irail me wia sounkalohk kan tohtohki aramas rar pak 6. Met wehwehki me aramas rar 8.8 me kin perenki rong oh re iang towehda prokram tohrohr (Katamano) oh wasao re rong emen brother kawehwe duwen padahk en Paipel kan. Re pil tuhwong ekei Sounkadehde kan, oh ni mehlel, re perenki Sounkadehde kan me re tuhwong. Pali laud en irail kin koasoi mwahu duwen Sounkadehde kan, oh re pil kin kihda arail sawas en mwohni ong doadoahk en kalohk, oh ma aramas kin idek rehrail duwen kitail, re pahn nda mehkot mwahu. Ekei irail kakete wiahla Sounkadehde kan ehu rahn. Dahme kitail kin wia pwehn sewese irail en kekeirada ni pali ngehn?

²¹ Pali laud en irail akan me kin iang towehda Katamano kin iang towehda pwehki pein kitail kin luhke irail en iang towehda. Met wehwehki me aramas akan kin wehwehki emen kitail Sounkadehde kan. Ma kitail luhke emen oh e kin iang towehda Katamano, mie atail pwukoa en kasamwo ih oh sewese ih en paiekihda laud prokram en rahno. Pwehki aramas tohto pahn mihmi nan Kingdom Hall, sewese ih en rapahki deuwe. Mweidohng ih en doadoahngki Paipel ieu, oh luhke ih en iang uhk doadoahngki noumw pwuhken koul. Sapeng peidek kan me e kin idek rehmw. Ma ke kasalehda me ke nsenohki ih, met pahn kak sewese ih en men onop Paipel oh iang towehda mihding kan oh kekeirada ni pali ngehn. Ni mehlel, kitail koaros pwukoahki kasamwo irail me kapw kan oh koasoi ong irail, ni ahl kadek oh limpoak, pwe re pahn perenki iang towehda Katamano.

²² Ma emen kin iang towehda Kataman, e kin tamataman sounpahr tohto dahme wiawi ni Katamano. Ma e iang towehda Katamano, met kak wehwehki me e saikinte diar padahk mehlel wasa teikan likin padahk kan me Sounkadehde kan kin wia oh dahme wiawi nan Kingdom Hall e kin men kasawihada oh tehk kanahieng. Ni eh kin rong kawehwe me pid meirong en tomw, met pil kak wia mehkot me pahn kamwekid ih, keieu ma e sohte kin wehwehki mwowe duwen sapwellimen Siohwa limpoak laud ong aramas akan. E kak mwadang kilang me kitail kin weksang aramas teikan​—⁠kitail kin kasalehda mehlel, kadek, limpoak oh wahu. Atail Kingdom Hall kin weksang dahme e kin kilang nan ihmw sarawi teikan duwehte sansal kan oh tiahk kan me sohte katepe. Irail me kapw kan kakete kilang me irail me kin iang towehda kin kohsang wehi tohto oh pil sohte dahl en meirong me kin wisikseli. Soahng pwukat koaros kin kihong ih madamadau laud oh e kakete koasoanehdi nan kapehde me e men pwurehng iang towehda mihding kan nan Kingdom Hall.

²³ Mwurin Katamano, emen sang nanpwungen sounkalohk kan en mwadang pwurala rehn irail me kapw kan oh sewese irail ni pali ngehn. Ma ke luhke emen kapw en iang towehda Kataman, mie ahmw pwukoa tohrohr. Mwohn re mweselsang Kingdom Hall, kehsehkin irail duwen mihding kan me kin pil wiawi nan Kingdom Hall. Ndaiong irail duwen oaralap en kapahrek me pahn wiawi Rahn Sarawi en wihk mwurio. Kehsehkin irail duwen iawasa oh kuloak depe Pwuhk Study en Mwomwohdiso pahn wiawi karanih imwarail. Mwuhr, kihong irail pwuhken Mour Kohkohlahte oh kehsehkin irail me oaralap en kapahrek me pahn wiawi nan wihk me tepida April 30 iei “Ihs me Pahn Kohdahla Nanleng oh Pwekihda?” Kawehwe ong irail me mwomwohdiso pwon kin iang towehda Kapokon en District me koasoandi ong irail.

²⁴ Koasoanehdi pwehn pwurehng tuhwong irail nan pein imwarail. Tehk ma mie neirail brochure Kupwurki oh pwuhken Knowledge oh pwuhken Mour Kohkohlahte, pwe soahng pwukat pahn kak sewese irail en wehwehki mour en padahk kan me mihmi nan Paipel. Ma re saikinte tepida onop Paipel rehn emen, idek rehrail ma re men onop Paipel rehmw. Kangoange irail en wadek brochure Jehovah’s Witnesses pwehki brochure wet kin kasalehda duwen dahme kin wiawi nan sapwellimen Siohwa pwihn sansal. Luhke irail en kilang video cassette kan duwehte Our Whole Association of Brothers. Koasoanehdi pwe ren kak tuhwong tohn mwomwohdiso teikan, iangahki peneinei kan me kin mihmi karanih imwarail. Nan sounpwong kohkohdo kan, nantihong pwurehng pwurala rehrail; luhke irail en iang towehda mihding kan ahnsou me Sounapwalih en Circuit kin mwemweitla rehmwail de rahn en Kapokon en Circuit kan de Kapokon en Rahn Tohrohr. Kihong irail ahnsou mwahu koaros pwe ren kak kasalehda me re wia kisehn “irail kan me konehng ale mour soutuk”!​—Wiewia 13:48.

²⁵ Dahme Elder kan Kak Wia: Pali laud en ahnsou, pweida mwahu en doadoahk en kalohk nan April pahn poahsoankihda dahme elder kan kin wia oh koasoandi ong mwomwohdiso. Ma kowe emen brother me kin wia Pwuhk Study en Mwomwohdiso, ntingihdi dahme ke kak wia pwehn sewese koaros me kin iang towehda ahmw Pwuhk Study en kak iang koasoandi tohrohr kan en kalohk. Mie me mihmi nan ahmw Pwuhk Study me pwulopwul, kapw, sohte kin iang kalohk sounpwong koaros de irail me sohla iang kalohk ahpw met pwurehng iang kalohk? Tehk pwehn kilang me pahpa oh nohno kan, pioneer kan oh sounkalohk teikan kak sewese irail pwukat. Sewese irail nin duwen sohte lipilipil sawas dah me re anahne. Emen sister, me sohte kin kalohk sounpwong koaros erein sounpahr riau me ahpwtehn nek, kalohk awa 50 samwa nan sounpwong en April 2000. Dahme kahrehda ah awahn kalohk nan April laudsang sounpwong teikan? E nda me e ale kangoang laud ahnsou me elder kan kohla mwemweitla reh.

²⁶ Elder kan oh ministerial servant kan kak sawaspene pwehn tehk ma pahn mie itar wasahn kalohk kan, makisihn kan, brochure kan oh pwuhk kan pwehn kihla nan sounpwong wet. Iaduwen​—⁠elder kan kak koasoanehdi pwehn mie koasoandi tohrohr kan ong kalohk? Ma iei, kasalehong mwomwohdiso duwen koasoandi tohrohr pwukat. Ahpw, mwohn mehkoaros, nan pein atail kapakap kan oh iangahki kapakap kan me kitail kin wia nan kalohk oh mihding kan, kitail en peki sapwellimen Siohwa kapai kan pwe koasoandi kan koaros me pid sewese aramas en kekeirada ni pali ngehn nan sounpwong pwukat pahn pweida mwahu.​—Rom 15:30, 31; 2 Deselonika 3:1.

²⁷ Nan April 2000 nan mwomwohdiso ehu nan North Carolina, U.S.A., elder kan wasao kangoange sounkalohk kan en kalaudehla arail awahn kalohk. Nan mihding kan koaros ehu ehu wihk, re kangoange sounkalohk kan en kapakap oh medemedewe laud ma re kak Auxiliary Pioneer nan April. Oh pil, elder kan koaros oh ministerial servant kan koaros kin koasoia iaduwen re pahn wia uwen me re kak nan kalohk nan April. Eri, nan April, persent 58 en sounkalohk kan iang doadoahk en Auxiliary Pioneer, iangahki elder kan koaros oh ministerial servant kan koaros!

²⁸ Kitail Kin Ahneki Peren Ma Kitail Wia Uwen Me Kitail Kak: Ia ekei kapai kan kitail kak alehdi ma kin “doadoahk laud oh nannanti” nan doadoahk en kalohk? (1 Tim. 4:10) Ahnsou me elder kan sang mwomwohdiso en North Carolina me se koasoia nan parakrap 27 koasoia duwen ngoang me sounkalohk kan nan arail mwomwohdiso kasalehda, re ntingihdi: “Brother oh sister kan koaros kin kalap koasoia duwen limpoak me re pehm nanpwungarail ahnsou me re kin ehupene oh sawaspene nan kalohk.”

²⁹ Emen brother pwulopwul me sohte kak alu mwahu​—⁠e medemedewe me e men kalaudehla eh awahn kalohk nan sounpwong en April 2000. Pwehki eh koasoanehdi mwahu eh koasoandi kan oh pil ale sawas sang eh nohno oh rie brother oh sister kan ni pali ngehn, e peren pwe e kak Auxiliary Pioneer oh pweida mwahu nan kalohk nan sounpwongo. Ia eh pepehm duwen April 2000? E koasoia: “Edin nan ahi mour I pehm me paliwarei doadoahk mwahu.”

³⁰Sohte pekidpe, Siohwa kin kapaiada irail me kin kesempwaliki arail pwais en kalohki duwen sapwellime kaunda. (Mel. 145:11, 12) Ni atail pahn kasarawi rahn me atail Kaun pwoula, kitail pil wehwehki me kitail pahn alehdi kapai tohto ahnsou kohkohdo kan ma kitail pahn lelepek ong Siohwa Koht. Wahnpoaron Pohl kin kasikasik keting en mour soutuk. Ahpw, e wehwehki me keting wet sohte pahn kohwong ih ma e sohte pahn pwerisek ni eh papah Siohwa oh mwekidki eh koapworopwor. E ntingihdi: “I kin wia doadoahk laud oh apwal pwe I en kapwaiada ei kohwa wet. I kin doadoahngki sapwellimen Krais roson lapalap me kin doadoahk loalei.” (Kol. 1:​29) Siohwa doadoahngki Sises, pwehn kihong Pohl kehl pwehn kak pweida mwahu nan kalohk, oh E kak pil wia duwehte met ong kitail rahnwet. Ke pahn pein pehm kehl wet nan sounpwong en April nan pahret?

[Box article]

Ihs me Ke Kak Kangoange Pwehn Wiahla Sounkalohk men nan April?

Noumw seri?

Emen me ke kin onop Paipel reh?

Emen me sohla kalohk ahpw kakete pwurehng men iang kalohk?