“Wia Mwahu Ong Aramas Koaros”
1 Oaralap en Atail Doadoahk Ong Wehio en February 2002 (insert) iei “Kalohki Sapwellimen Koht Mahsen Unsek” oh oaralap en March 2002 (insert) iei “Kepwehpwehki Doadoahk Mwahu kan.” (Kolose 1:25; 1 Tim. 6:18) Nan artikel pwukat, kitail ale kangoang en nantihong sewese aramas akan me kin perenki rong en iang towehda Katamanpen Kamatalahn Krais, oh pil sewese irail me solahr kin kalohk en pwurehng miniminiong mwomwohdiso, oh sewese neitail seri kan oh aramas me kin onop rehtail en tepida kalohki Rongamwahu. E sansal mwahu me atail nannanti kan pweida mwahu. “Eri, nindokon eh mie atail ahnsou, kitail en [nantihong] wia mwahu ong aramas koaros.”—Kalesia 6:10.
2 Luhke Irail en Pwurehng Iang Towehda Katamano: Nan wasahn kalohk me mihmi pahnangin United States Branch, aramas rar samwa me saikinte wie sounkalohk kan kin iang towehda Kataman ehu ehu pahr. Pwehki re kin iang towehda Kataman pahr koaros, met kin kasalehda me re men rong, eri, dahme kitail anahne wia pwehn sewese irail me “konehng ale mour soutuk” en “pwosonla”? (Wiewia 13:48) Kangoange irail en tepida iang towehda mihding en mwomwohdiso kan.
3 Dahme ke sohte luhke irail me perenki rong en iang towehda Pwuhk Study en Mwomwohdiso (lokaiahn wai) pwehn sukuhliki duwen kokohp kan me mih nan pwuhken Aiseia? Ma ke pahn wia padahk nan Theocratic Ministry School ehu rahn, ke kak luhke emen me iang Katamano—emen me kisehn ahmw peneinei de emen me ke ese—en iang towehda mihding pwehn rong ahmw padahk. Padahkiong ih duwen oaralap en Kapahrek ong Wehin Pokon me pahn wiawi nan wihk kohkohdo kan. (Doaropwe ehu me kin kasalehda duwen oaralap en Kapahrek ong Wehi Pokon nan ehuehu wihk kin wie langalang nan “Information Board.”) Kilang dahme ke kak wia pwehn kakehlada eh ineng en papah Siohwa. Oh pil, ma e saikinte tepida onop Paipel rehn emen nan mwomwohdiso, ke kak idek reh ma e men onop rehmw.
4 Kangoange Irail me Solahr Kin Iang Kalohk: Irail me tohto me kin iang towehda Kataman inoukihongehr Siohwa arail mour. Ahpw, ekei luwetala ni pali ngehn oh kin uhdi sang arail kalohki Rongamwahu. Pohl kaweidkin kitail en “wia mwahu ong aramas koaros . . . ahpw mehlel ong irail kan me kisehn atail pwoson.” (Kalesia 6:10) Kahrehda, kitail anahne keieu nsenohki irail me solahr iang kalohk.
5 Mwein ekei tepidahr mwekidki kangoang me re ale sang rehn elder kan oh meteikan en pwurehng iang kalohk. Ma elder kan koasoanehdi ken sewese emen me solahr kin iang kalohk, ken tamataman me aramaso pahn ale kangoang laud ni eh pahn kilang pein ahmw limpoak ong Siohwa oh ahmw ngoangki oh perenki kalohk. Kasalehong ih iaduwen ke kin kalohk ihmw lel ihmw, pwurehng pwurala rehn aramas akan, oh pil onop Paipel rehn aramas akan oh nantihong wia soahng pwukat ni peren, oh Siohwa pahn kapaiada irail me kin wia soahng pwukat.
6 Sewese Sounkalohk Kapw kan en Tepida Kalohk ni Ahl me Pahn Pweida Mwahu: Ni ahnsou me emen lih wehwehki me e diarada sapwellimen Koht pwihn en padahk mehlel, e men mwadang tepida kalohk. Ni ahnsou me e sukuhliki dahme e anahne wia pwehn kenikenla rehn Koht, e koasoia: “I men mwadang tepida kalohk.” Ma emen me ke kin onop reh kakehr iang kalohk, sewese ih en “mwadang tepida kalohk,” oh sewese ih en tepida kalohk ni ahl me pahn pweida mwahu. Sewese ih en wiahda eh koasoandi pwehn ahnla kaunopada ong kalohk oh kaukaule iang kalohk wihk koaros.
7 Ma pein noumw seri ahpwtehn wiahla sounkalohk me saikinte papidais, sewese ih en kekeirada nin duwen eh sounpahr oh koahiek. Mwurin ahmw pahn sewese ih ekis, mwein ke pahn pwuriamweikihla uwen mwahu e kin kak koasoi ong aramas emen, wadek sang nan Pwuhk Sarawi, oh kihla pwuhk, brochure de makisihn kan. Ni ahnsou me e pahn tuhwong emen me perenki rong nan kalohk, sewese ih en wehwehki dahme e pahn nda ni ahnsou me e pahn pwurehng pwurala rehn aramaso oh dahme e pahn wia mwurin mwo pwehn sewese aramaso.
8 Kalaudehla Ahmw Ahnsoun Kalohk: Ahmw irair akan kin mweidohng ken kak kalaudehla ahmw ahnsoun kalohk pil mwurin Katamano? Ke kak kalaudehla ahmw ahnsoun kalohk—mwein awa ehu de riau ehu ehu wihk laudsang ahmw ahnsoun kalohk nan sounpwong teikan? Ke kin kilang sounpwong kohkohdo kan nan calendar pwehn kilang mehnia sounpwong ke kak Auxiliary Pioneer? De ke kak koasoanehdi irair akan nan ahmw mour pwehn iang doadoahk en Regular Pioneer? Mwein atail nannanti kan kak kahrehong kitail en kak sewese emen en iangala padahk mehlel! (Wiewia 8:26-39) Ni atail pahn medemedewe rahn kohkohdo kan, kitail en “wia me mwahu [nanpwungatail] oh pil ong aramas teikan koaros.”—1 Dese. 5:15.
[Kaokon nan Pali 3]
Nantihong Sewese:
□✔ Aramas akan me iang towehda Kataman
□✔ Irail me pwurehng iang kalohk
□✔ Sounkalohk kapw kan me saikinte papidais