“Kepwehpwehki Doadoahk Mwahu kan”
1 Ni pahr akan me wia kaimwiseklahn sapwellime doadoahk en kalohk, wahnpoaron Pohl iang Timoty oh Taitus. Wahnpoaron Pohl ntingihdi mahsen en kangoang ong ira koaros. E padahkiong Taitus me “irail kan me kin pwoson Koht” anahne “nsenohki mweidohng ar ahnsou kan ong ni wia doadoahk mwahu.” (Taitus 3:8) E padahkiong Timoty me irail kan me kin koapworopworki Koht anahne “kepwehpwehki doadoahk mwahu kan.” (1 Tim. 6:17, 18) Kaweid wet kin mwahu ong kitail koaros! Ahpw, dahme pahn kamwekid kitail en wia doadoahk mwahu kan nan atail mour? Oh soangen doadoahk dah kan me mwahu en wia ni rahn akan me kohkohdo?
2 Kahrepe kitail men kepwehpwehki doadoahk mwahu kin kohsang atail kamehlele oh limpoak ong Siohwa oh pil sang atail koapworopwor me E ketikihong kitail. (1 Tim. 6:19; Taitus 2:11) Keieu, nan soangen ahnsou duwehte met, kitail kin tamataman me Siohwa kadarodohng sampah sapwellime Ohl pwe Sises en kak kasarawi mwaren Seme oh kasalehda dahme aramas akan anahne wia pwehn ale mour soutuk. (Madiu 20:28; Sohn 3:16) Met pahn inenen sansal ni atail pahn kasarawi Katamanpen Kamatalahn Krais ni March 28. Pwe kitail men mwekidki koapworopwor me kitail ahneki en ale mour soutuk, kitail soh men wia uwen me kitail kak en “kepwehpwehki doadoahk mwahu kan”? Ei! Soangen doadoahk dah kan kitail kak wia met?
3 Doadoahk Mwahu kan Nan March oh Mwuri: Mehlel, kitail uhdahn pahn iang towehda Kataman pwe e kin wia rahn me keieu kesempwal nan pahr koaros ong Sounkadehdehn Siohwa kan wasa koaros nan sampah. (Luk 22:19) Ahpw, kitail mwahuki aramas tohto en pil iang kitail perenki kasarawi rahno. Menlau tehk ripoht en kalohk nan 2002 Yearbook (Pwuhken Pahr en 2002) oh ke pahn kilang me pahr me ahpwtehn nek: nan sahpw tohto nin sampah, irail me iang towehda Kataman me pak siluh, pahieu, limau de pak tohto sang nempehn sounkalohk kan. E sansal me mwomwohdiso koaros wia doadoahk laud pwehn kihseli doaropwe en luhke aramas ong Kataman nan arail wasahn kalohk. Eri, kitail pil men luhke aramas tohto en iang towehda Kataman tepida sang rahnwet lel March 28, sewese meteikan en sukuhliki duwen koapworopwor en ale komour.
4 Ni ahnsou me April pahn leledo, iaduwen kitail kak kasalehda me kitail kin “kepwehpwehki doadoahk mwahu kan”? Kitail kak wia met ni atail pahn kalohki Rongamwahu. Ni atail kin kasalehda me kitail kin perenki kalohki koapworopwor en Wehin Koht ong aramas akan, kitail kin kasalehda me kitail kin “ngoangki wiewia me mwahu.” (Taitus 2:14; Madiu 24:14) Ma ke sohte kak Auxiliary Pioneer nan March, ke kak Auxiliary Pioneer nan April de May de April oh May koaros? Ma ke Auxiliary Pioneer nan March, ke kak pousehla?
5 Ekei Auxiliary Pioneer kan me kin doadoahk en mwohni diarada me re kak kalohk ekis—awa ehu de riau—mwohn irail pahn kohla doadoahk, wia kalohk nanial oh tuhwong aramas akan me kin mihmi nan arail wasahn pisnis kan me kin mwadang tepida doadoahk ni menseng. Ekei kin koasoanehdi ekis ahnsoun mwengehn souwas pwehn kalohk. Ekei kin pil onop rehn emen iengarail tohndoadoahk ahnsoun mwengehn souwas. Sister tohto me wia lih pwopwoud kan me kin apwalih imwarail kin koasoanehdi arail ahnsou pwehn kalohk ahnsou me neirail seri kan mihmi nan sukuhl. Ma re kin pirida mwadang pwehn wia arail doadoahk nan ihmw, e pahn mie arail ahnsou laud ni rahn pwehn wia doadoahk en kalohk oh padahk.—Episos 5:15, 16.
6 Mendahki ke sohte kak Auxiliary Pioneer, mwein ke kak koasoanehdi koasoandi ieu pwehn kalaudehla ahmw ahnsoun kalohk, oh wia uwen me ke kak en “wia me mwahu, re en kepwehpwehki doadoahk mwahu kan, re en sapan, oh perenki ehukihong” meteikan padahk mehlel.—1 Tim. 6:18.
7 Tamataman Doadoahk Mwahu en Katohnpadahk: Ehu ehu pahr, aramas tohto kin iang towehda Kataman. E pahn mwahu ma ekei nan mwomwohdiso pahn nantihong tuhwong aramas akan me iang towehda Kataman ahpw me saikinte onop Paipel. Re kak pwurehng pwurala rehrail oh sewese irail en kekeirada ni pali ngehn. Mwein ekei irail me iang towehda Kataman kin wia peneinei en Sounkadehdehn Siohwa kan. Mwein ekei irail me iang towehda Kataman kin wia aramas me onop Paipel mahs, oh ma emen pahn kangoange irail en pwurehng onop oh kaukaule iang towehda mihding kan, re pahn wia mehpwukat. E pahn inenen kaperen en kilang irail wiahla sapwellimen Siohwa ladu kan me pahn ieiang kitail papah Siohwa!
8 Ni atail pahn kalaudehla atail ahnsoun kalohk erein March oh pil sounpwong kan mwuri, kitail pahn diarada ekei aramas me kitail kak pwurehng pwurala rehrail. Song en kihong irail peidek ehu. Mwurin mwo, ke kak ndaiong irail me ke pahn sapeng peideko ahnsou me ke pwurala reh. Ni ahnsou me kitail pahn wia met, kitail kak kaunopada ahl en pwurehng pwurala rehrail. Ma kitail kak mwadang pwurehng pwurala rehrail, ih me pahn keieu mwahu. Ma kitail sohte kak tepida onop rehrail ahnsou me kitail tepin tuhwong irail, kitail kak pwurehng pwurala rehrail oh tepida onop Paipel rehrail ahnsowo ma kak.
9 Ni ahnsou me kitail pahn wia kalohk nanial, kitail pahn nantihong koasoi ong aramas akan. Aramas tohto kin kihong sounkalohk kan ederail, neirail address, oh neirail nempehn telephone ahnsou me re kin tuhwong sounkalohk kan me kin kalohk nanial. Ma aramaso me ke tuhwong sohte kin mihmi nan wasahn kalohk en ahmw mwomwohdiso, menlau audehda doaropwe me adaneki “Please Follow Up (S-43) form” oh kihong Secretary en ahmw mwomwohdiso oh e pahn uhd kihong mwomwohdiso me aramaso kin mihmi nan arail wasahn kalohk. Ma Secretary sohte kak wia met, Secretary pahn uhd kihong Branch Office doaropweo pwe re pahn uhd pwukoahki. Ni ahl wet, kitail kak sewese aramaso en kekeirada ni pali ngehn.
10 Ma aramaso kihong uhk nah nempehn telephone, kaidehn nah address, ke kak pwurehng pwurala rehrail ni ahmw pahn telephonela rehrail. Kaunopada mwowe dahme ke pahn nda. Tamataman en kihdi noumw pwuhken Reasoning wasao me ke pahn telephone pwe ke kak mwadang kilang pwuhko ahnsou me ke koasoi ong aramaso. Ekei sounkalohk kan kin pweida mwahu ni arail kin onop rehn aramas akan ni arail doadoahngki telephone, iangahki irail me re sohte kin diar nan imwarail. Emen sister tepida idek rehn tohnihmw kan ma e kak ale neirail nempehn telephone ahnsou me e kin kalohk ihmw-lel-ihmw, oh pwehki met, e tepida onop Paipel rehn aramas riemen.
11 Sewese Elder kan ni Arail Pahn Sewese Irail me Solahr Kalohk: Elder kan kin nsenohki irail me solahr kin kalohk oh kasalehong irail limpoak. Ekei irail, sang pein nsenarail, tepidahr pwurehng iang towehda mihding kan. Re wehwehkiher arail anahn en miniminiong sapwellimen Siohwa pwihn pwehn pehm soangen meleilei oh nsenamwahu me kileledi nan Melkahka 91. Ekei irail kakehr pwurehng iang kalohk. Ma ekei aramas me sohte iang kalohk sounpwong weneu de tohto sang ahpw re iang Kataman, mwein re pahn perenki onop Paipel rehn emen. Ma met wiawi, elder kan kak koasoanehdi pwe emen kak onop rehn irail me anahne sawas. Ma elder kan idek rehmw ma ke men sewese emen ong koasoandi wet, ke kak kihda ahmw sawas oh re uhdahn pahn kalahnganki.—Rom 15:1, 2.
12 Nantihong “Wia Doadoahk Mwahu”: Sounkalohk tohto me iangehr Auxiliary Pioneer service ong sounpwong ehu de tohto sang diarada me arail ahnsoun kalohk laudla nan sounpwong kan mwurin arail Auxiliary Pioneer. Re tuhwong aramas akan me kin perenki rong oh re men pwurehng pwurala rehrail. Met kahrehong irail en kalaudehla arail ahnsoun kalohk pwehn kak pwurehng pwurala rehn irail me men rong. Ekei irail tepida onop Paipel rehn aramas pwukat, oh met kahrehong irail en kalaudehla arail ahnsoun kalohk.
13 Pil ekei kin diarada peren laud ahnsou me re kin kalaudehla arail ahnsoun kalohk oh katohnpadahk kahrehda re uhd kasawihada dahme re kin kihong en keieu kesempwal nan arail mour. Pwehki met, ekei kin katikitikala arail ahnsoun doadoahk en mwohni oh ihme kahrehda re kak kaukaule Auxiliary Pioneer. Pil ekei kak wiahla Regular Pioneer. Re kak koapworopworki Koht oh re sohte pahn koapworopworki dahme sampah kak kihda. Re diarada me pwehki re “sapan oh perenki sewese meteikan,” mehpwukat kihong irail kapai tohto sang Siohwa oh kakehlailla arail koapworopwor en kasikasik “mouro me uhdahn mour mehlel.” (1 Tim. 6:18, 19) Ni mehlel, pwehki sounkalohk tohto kin tepida iang doadoahk en Pioneer, mwomwohdiso pwon me kin paiekihda. Pioneer kan kin koasoia arail ekspiriens mwahu kan nan kalohk oh re kin luhke meteikan en iang irail kalohk, oh mehpwukat kin kahrehda koaros nan mwomwohdiso en kekeirada ni pali ngehn.
14 E pahn mwahu ma kitail koaros pahn “kepwehpwehki doadoahk mwahu kan” ahnsoun Kataman oh mwurin Kataman ni atail pahn kalaudehla atail ahnsoun kalohk. Kitail en kasalehda atail kalahnganki dahme Siohwa wia ni E ketikihong kitail koapworopwor en ale mour soutuk nan sampah kapw.—2 Pit. 3:13.