Kitail Anahne Ngoangki Wia Dahme Mwahu!
1 Ni atail kerenlahng ahnsoun Kataman en Pahr 2003, mie kahrepe tohto en “ngoangki wia dahme mwahu.” (1 Piter 3:13) Kahrepe me keieu kesempwal iei meirong tomw en Sises Krais. (Madiu 20:28; Sohn 3:16) Wahnpoaron Piter ntingihdi duwen kahrepe wet ni e mahsanih: “Pwe kumwail ese soahng dah me kumwail kamaiaukihda sang nan soangen mour soh-katepe me kumwail sohsohki sang rehn samamwail ko; kaidehn kepwe sohr, duwehte silper de kohl; pwe meirong pweilapalap ehu, iei nta kesempwal en Krais, me iei sihmpwul mwakelekel oh sohte samin.” (1 Piter 1:18, 19) Atail kalahnganki kisakis en limpoak kaselel wet kin kamwekid kitail en kedirepwki wia dahme mwahu, pwe kitail wehwehki me Sises “ketin tounmeteikihla pein ih pwehki kitail, pwe en kapitkitailsang soahng suwed koaros oh kamineikitailda pwe kitail en wiahla sapwellime kelehpw oh ngoangkihte wiewia me mwahu.”—Taitus 2:14; 2 Korint 5:14, 15.
2 Ni ahnsou me kitail kin wia dahme Koht kupwurki, kitail kak ahneki nanpwung mwahu reh oh E pahn ketin pere kitail ni limpoak oh nsenohkin kitail. Piter doula oh mahsanih: “Mehmen me kin men nsenamwahuki mour oh rahn kaperen kan, . . . e uhdahn anahne mweisang me suwed oh wia me mwahu, oh rapahki popohl ni eh kehl unsek. Pwe silangin Kauno [“Siohwa,” New World Translation] kin mahmahsanih me pwung kan, oh e kin karonge ar pekipek kan ahnsou koaros; a e kin sohpeisang me kin wia me suwed.” (1 Piter 3:10-12) Nan rahn pwukat me keper, e kin wia kapai kaselel en ese me Siohwa kin mwasamwasahn oh nsenohkin kitail oh E men sewese kitail oh “sinsile oh apwahpwalih kitail, nin duwen eh kin ketin pere pein pwoaren mese.”—Deud. 32:10; 2 Kronikel 16:9.
3 Mendahki Kristian en mahs ako kin lelohng kasongosong oh kahpwal akan, irail direkihla ngoang, oh met kamwekid irail en wia uwen me irail kak en kalohki Rongamwahu ong aramas koaruhsie. (1 Piter 1:6; 4:12) Met pil duwehte sapwellimen Koht aramas akan rahnwet. Mendahki kitail mihmi nan “ahnsou apwal akan,” atail kalahnganki sapwellimen Siohwa kamwahu pahn kamwekid kitail en wia kupwuren Koht ni ngoang. (2 Tim. 3:1; Melkahka 145:7) Kitail pahn koasoiapene duwen ekei doadoahk mwahu kan me kitail pahn kedirepwki nan sounpwong en March, April oh May.
4 Luhke Meteikan en Iang Towehda Kataman: Ehu ahl me kitail kak kasalehda atail kalahnganki kisakis kaselel en meirong tomw en Sises iei en iang towehda Katamanpen Kamatalahn Krais me pahn wiawi Ni Esil, April 16, mwurin kihrlahn ketipin. (Luk 22:19, 20) Nan pahr me ahpwtehn nek, mie mwomwohdiso 94,600 nan sampah, oh aramas me iang towehda Kataman nan sampah pwon iei meh 15,597,746! Met wehwehki me aramas 220,000 samwa me iang Kataman tohto sang pahr mwowe sang.
5 Aramas depe pahn iang towehda Kataman nan pahr wet? Ma kitail pahn wia uwen me kitail kak en luhke oh kangoange aramas akan en iang kitail towehda Katamano, eri aramas tohto pahn iang kitail. Ke kak tepida ntingihdi eden irail kan koaros me ke men luhke. Mwadang ntingihdi eden ahmw peneinei. Ma ahmw pwoud saikinte iang padahk mehlel, kasalehong ih sang mohngiongomw me ke uhdahn men ih en iang uhk towehda Katamano. Emen ohl pwopwoud me saikinte iang padahk mehlel koasoia me e iang towehda Kataman pahr me ahpwtehn nek pwehki e wehwehki me ah pwoud pahn inenen perenki ma e pahn iang towehda Katamano. Mwurin ahmw ntingihdi eden ahmw peneinei kan, ken ntingihdi eden iengomw tohndoadoahk kan, de iengomw tohnsukuhl kan. Ken tamataman en pil luhke irail me ke kin onop Paipel rehrail.
6 Mwurin ahmw ntingihdi eden aramas koaros me ke men luhke ong Kataman, ken koasoanehdi ahmw ahnsou pwehn pein tuhwong emenemen irail oh luhke irail. Ken doadoahngki doaropwe kan me wiawihda pwehn luhke aramas akan ong Kataman. Pwehn sewese aramas akan en tamataman mehnia rahn, kuloak depe, oh iawasa Kataman pahn wiawi, type de ntingihdi ni sansal rahn, kuloak oh wasa me Kataman pahn wiawi pohn doaropwe en luhk. Ni ahnsou me kitail kerenlahng April 16, pwurehng koasoiong irail me ke luhkeier oh katamankin irail duwen Katamano, sohte lipilipil ma ke tuhwong ni imwarail de doadoahngki telephone pwehn pwurehng tuhwong irail. Kitail en wia uwen me kitail kak pwehn tuhwong aramas koaros me kitail ese, luhke irail oh sewese irail en iang towehda wiewia kesempwal wet.
7 Sewese Irail akan me Iang Towehda Kataman: Pwongo me Kataman wiawi kin wia pwong kesempwal ieu. Kitail ahneki ahnsou mwahu en kasamwo aramas akan me sohte kin kalapw iang towehda mihding kan. Koasoanehdi ahmw koasoandi kan pwehn mwadang lel Kingdom Hall mwohn Kataman tepida oh pil dehr mwadang kohkohla, ma ke kak, nin duwen irair en wasa me ke mihmi ie. Ken nantihong tuhwong irail me kapw kan koaros. E kin kesempwal en kasamwo irail oh kadek ong irail.—Rom 12:13.
8 Ke kak sewese ekei me iang towehda Kataman en kekeirada ni pali ngehn ni ahmw pahn onop Paipel rehrail? Nantihong ale eden irail akan me kapw me iang towehda Kataman iangahki arail address pwe ken kak pwurehng tuhwong irail oh sewese irail ni pali ngehn. Ma ke pahn sewese irail ni limpoak, mwein ekei irail pahn kekeirada ni pali ngehn oh kak wiahla sounkalohk me saikinte papidais mwohn Kataman en pahr kohkohdo. Ni ahnsou me ke pwurehng tuhwong irail me iang towehda Katamano, luhke irail en iang towehda Kapahrek Tohrohr me pahn wiawi April 27.
9 Ke Kak Auxiliary Pioneer Nan March, April oh May? Nan pahr koaros, atail ngoangki papah Siohwa kin kamwekid kitail en wia uwen me kitail kak nan kalohk nan sounpwong kan me doadoahk tohrohr wet kin wiwiawi. Pahnangin Guam Branch, sounkalohk 304 iang doadoahk en Auxiliary Pioneer nan March 2002 oh sounkalohk 125 iang doadoahk en Auxiliary Pioneer nan April 2002. Ma sounkalohk koaros nan mwomwohdiso pwon pahn sawaspene oh miniminpene pwehn kalohki Rongamwahu, ni ngoang, nan sounpwong en March, April oh May, met pahn imwila mwahu.
10 Ehu mwomwohdiso nan United States me sounkalohk 107 oh sounkalohk 9 iang doadoahk en Regular Pioneer: irail ripohtki me sounpwong en April 2002 “uhdahn mwahu” pwehki sounkalohk 53 iang doadoahk en Auxiliary Pioneer, iangahki elder kan koaros oh ministerial servant kan koaros. Iaduwen elder kan sewese sounkalohk kan en ngoangki wia doadoahk en Auxiliary Pioneer nan sounpwong en April? Irail tepida mwadang kangoange sounkalohk kan koaros nan arail mwomwohdiso en Auxiliary Pioneer nan April. Mihding en tuhpene ong kalohk wiawi ni menseng, mwurin souwas oh ni soutik pwe sounkalohk koaros kak iang kalohk ahnsou me irail kak. Re kangoange irail en kalohk ni arail doadoahngki telephone, keieu ong irail me mah kan oh pil soumwahu laud. Kalohk ni atail doadoahngki telephone kin wia ahl mwahu en tuhwong aramas akan, mehlel irail me kin mihmi nan ihmw kan me aramas sohte saledek en pein pedolong. Kalohk ni atail doadoahngki telephone kin pil sewese sounkalohk en kak tuhwong aramas akan me sohte mihmi nan imwarail ni rahn.
11 Elder en mwomwohdisowo kaimwisekla arail ripoht oh koasoia: “Se inenen perenki sounpwongo oh se kalahnganki pwais kaselel me se ahneki en papah Siohwa ni aht wia doadoahk tohrohr oh se pil kalahnganki kapai kan me Siohwa ketikihong emenemen kiht.” Ma ahmw mwomwohdiso pil pahn wia koasoandi mwahu kan, kumwail pil kak paiekihda kapai tohto duwehte mwomwohdiso me se ahpwtehn koasoia.
12 Kangoange Sounkalohk Koaros en Iang Kalohk: Atail limpoak ong Koht oh mehn mpatail kin kamwekid kitail en koasoanehdi atail ahnsou pwehn iang kalohk sounpwong koaros oh ehukihong meteikan duwen Rongamwahu en Wehin Koht. (Madiu 22:37-39) Sounapwalih en Pwuhk Study en Mwomwohdiso oh brother kan me kin sewese irail anahne sewese irail nan Pwuhk Study en iang kalohk sounpwong koaros. Ehu ahl en wia met iei en koasoanehdi mwowe en iang emenemen tohn Pwuhk Study nan kalohk. Dehr awih lao lel imwin sounpwongo en wia met, tepida mwadang. Met pahn kihong uhk ahnsou mwahu kan en sewese meteikan ni limpoak.
13 Mie sounkalohk mah kan de soumwahu laud kan nan ahmw Pwuhk Study me kin apwaliki iang kalohk? Ma ekei irail kin kousoan nan imwen me mah kan de irail mihmi nan pein imwarail oh sohte kak pedoi, e kin sansal me irail sohte kak iang kalohk ni ahl oh ni ahnsou kan koaros me kitail kin kak iang. Ahpw, irail kak doadoahngki arail ahnsou mwahu kan en mweidong arail marain en sansal mwohn aramas akan, oh aramas me kilang arail wiewia mwahu kan mwein pahn kak mwekidki met oh met pahn sewese irail en iangala padahk mehlel. (Madiu 5:16) Sounapwalih en Pwuhk Study kan anahne kehsehkin irail sounkalohk mah kan oh pil irail me iang soumwahu laud me irail kak ripohtki arail iang kalohk minit 15 kohda. Pwehki irail me lelepek pwukat kak ripohtki arail ahnsoun kalohk mehnda ma minit 15te, met pahn wahdohng irail peren oh nsenamwahu. E kin pil sewese irail me kin kapatapene awa kan ohng ripoht en kalohk en sampah pwon en wehwehki me wiewia kan en sapwellimen Koht aramas akan kin mehlel oh pwung.
14 Irail me Pwulopwul kan Kin Kedirepwki Wia Dahme Mwahu! E kin inenen kansenamwahu en kilang irail Kristian pwulopwul kan doadoahngki arail kehl ong papah Siohwa! (Lepin Padahk 20:29) Ma ke wia emen pwulopwul, iaduwen ke kak kasalehda ahmw ngoangki papah Siohwa nan sounpwong pwukat me doadoahk tohrohr kin wiawi?
15 Ma ke saikinte wia emen sounkalohk me saikinte papidais, ke kak nantihong en lel mehn akadei wet? Pein idek rehmw peidek pwukat: ‘I kin wehwehki duwen padahk kesempwal kan nan Paipel? Iaduwen—I men kalohk oh padahkiong meteikan duwen Rongamwahu en Wehin Koht? Ahi tiahk oh wiewia kan kin mwahu oh I kin wia mehn kahlemeng mwahu ong meteikan? I kak kasalehda ahi pwoson ni ahi pahn ehukihong meteikan duwen Rongamwahu? I kin men wia met sang nan mohngiongi?’ Ma ke kak sapeng “ei” ong peidek pwukat, eri e mwahu ma ke pahn kasalehong ahmw pahpa oh nohno kan duwen ahmw ineng en wiahla sounkalohk men. Ahmw pahpa oh nohno kak tuhwong emen elder sang pwihn en “Service Committee” oh koasoiong ih duwen ahmw ineng en wiahla sounkalohk men.
16 Ma ke wialahr sounkalohki Rongamwahuwo, ke kak isaneki ahmw ahnsoun kommoal sang sukuhl en kalaudehla ahmw ahnsoun kalohk? Irail me pwulopwul tohto me papidaislahr kak iang doadoahk en Auxiliary Pioneer oh kin perenki doadoahk wet pwehki irail wiahda koasoandi mwahu oh pil ale sawas sang arail pahpa oh nohno oh pil meteikan. Ma ke sohte kak iang doadoahk en Auxiliary Pioneer, ke kak kalaudehla ahmw ahnsoun kalohk. Wiahda mehn akadei ong pein kowe. Ke kak wiahda mehn akadei ong awa depe me ke men kalohk, ahpw e pahn pil mwahu en wiahda pil ehu mehn akadei me pahn pid kamwahuwihala ahmw koahiek nan kalohk. Mwein ke kak nantihong en kasalehda iren Paipel ehu ni ihmw kan koaros, de kamwahuwihala ahmw koahiek ni ahmw pwurehng pwurala rehn aramas akan, de tepida onop en Paipel rehn aramas emen, de songen wia kalohk ni ahmw doadoahngki telephone. Ke kak pil wiahda mehn akadei ong emen mehn mpomw, de iengomw tohnsukuhl, de tohn ahmw peneinei en iang uhk towehda Kataman nan pahr wet? Ni ahmw pahn nantihong mehn akadei pwukat oh wiewia pwukat, met pahn wia kapai laud ong uhk oh pahn pil kangoange meteikan nan mwomwohdiso.—1 Deselonika 5:11.
17 Sewese Irail me Kapw kan en Kekeirada Ni Pali Ngehn: Nan pahr en kalohk me ahpwtehn nek, nan mwomwohdiso kan me mihmi pahnangin Guam Branch, average en aramas me kin onop Paipel nan ehuehu sounpwong iei irail meh 2,391. Kedekedeo, pali laud en irail pwukat pahn kak kekeirada ni pali ngehn oh inoukihong Siohwa arail mour oh papidaisla. Ahpw, mwohn irail kak inoukihong Siohwa arail mour oh papidais, irail anahne wia ewen kahk kan pwehn kak wiahla sounkalohk kan me kin kalohki Rongamwahu en Wehin Koht. Met kin wia ewen kahk kesempwal en sewese irail me kapw kan en wiahla sapwellimen Sises Krais tohnpadahk kan. (Madiu 9:9; Luk 6:40) Ke kin onop rehn aramas emen me kakehr wiahla sounkalohk men?
18 Ma ke saikinte uhdahn ese ma aramaso me ke kin onop reh kekeirada mwahu oh kakehr wiahla sounkalohk men, peki sawas en Sounapwalih en ahmw Pwuhk Study de Sounapwalih en Kalohk. Mwein ke kak luhke ih en iang uhk ehu rahn me ke pahn onop rehn aramaso. Brother pwukat kin ahneki ekspiriens en kasawihada ma aramaso kekeirada mwahu oh kakehr iang kalohk. Irail pahn kak kihda iren sawas kan me pahn sewese aramaso en kekeirada ni pali ngehn.
19 Ni ahnsou me aramaso me ke onop Paipel reh kin kasalehda me e men wiahla sounkalohk me saikinte papidais oh ke pehm me e kakong wia met, ken koasoiong Presiding Overseer nan ahmw mwomwohdiso. E pahn koasoanehdi elder riemen en tuhwong uhk oh pil aramaso me ke kin onop Paipel reh pwehn tehk ma e kak wiahla sounkalohk men, ni ara pahn doadoahngki pwuhken Our Ministry, pali 98 oh 99. (Kilang Watchtower (lokaiahn wai) en November 15, 1988, pali 17.) Ma aramaso me ke onop reh kakehr wiahla sounkalohk men, ke kak tepida mwadang kaiahne ih nan kalohk. Ni ahnsou me e pahn kapedolong nah ripoht en kalohk, elder kan pahn pakair ong mwomwohdiso me aramaso wiahlahr sounkalohk me saikinte papidais. Se koapworopworki me aramas kid kid kei kakehr wiahla sounkalohk kapw kan, irail me pwulopwul oh me laud, oh irail pahn kak lelehr mehn akadei wet nan sounpwong pwukat me doadoahk tohrohr wet kin wiawi.
20 Koasoandi Mwahu kan kin Sewese Kitail en Pweida nan Doadoahk me Keieu Mwahu: Ma kitail pahn mwadang koasoanehdi atail koasoandi kan, met pahn sewese kitail en pweida mwahu nan doadoahk tohrohr ahnsoun Kataman (sounpwong en March, April oh May). (Lepin Padahk 21:5) Elder kan anahne koasoanehdi koasoandi tohto pwe doadoahk en kalohk en kak pweida mwahu.
21 Pwehn sewese tohnmwomwohdiso en pweida mwahu nan kalohk, elder kan anahne koasoanehdi mihding en tuhpene ong kalohk nan wihk oh pil ni imwin wihk kan. Sounapwalih en Kalohk pahn tiengala mwowe nin duwen koasoandi pwukat. E anahne koasoanehdi mihding en tuhpene ong kalohk ni sohrahn, de mwurin souwas, de ni soutik? E kesempwal en kehsehki tohnmwomwohdiso duwen koasoandi kapw pwukat. E pahn mwahu ma koasoandi kan en tuhpene ong kalohk pahn mihmi ni “Information Board” pwe koaros en kak kilang.
22 Elder kan pahn tehk ma koasoandi kan ong Kataman wiawihda mwadang mwohn April 16. Irail pahn pil pakairki ma koasoandi en mihding kan wekila nan wihko. Ma irail pahn nantihong nsenohki koasoandi pwukat, met pahn kahrehong Kataman en “soandi oh pweida mwahu.”—1 Korint 14:40, NW.
23 Ni ahnsou me irail wia arail onop en peneinei, tapwin peneinei kan kak koasoia iaduwen arail peneinei kak kalaudehla arail ahnsoun kalohk nan sounpwong en March, April, oh May. Iaduwen—ahmw peneinei pwon kak iang doadoahk en Auxiliary Pioneer? De kumwail koaros kak utungada oh sewese emen de riemen sang ahmw peneinei en iang doadoahk en Auxiliary Pioneer? Ma kumwail sohte kak wia met, kumwail kak koasoanehdi ekei mehn akadei kan nin duwen peneinei pwehn kak kalaudehla ahmw ahnsoun kalohk. Mie emen pwulopwul nan ahmw peneinei me ke kak kangoange oh sewese pwehn wiahla sounkalohk men me saikinte papidais? Aramas depe me ahmw peneinei kak luhke ong Kataman en pahret? Ma kumwail pahn koasoanehdi mwahu amwail koasoandi kan, met pahn wahdo kapai oh peren ong ahmw peneinei.
24 Isaneki Ahmw Ahnsou Mwahu kan me Luhwe: Ni ahnsou me wahnpoaron Piter ntinglahng irail me tepin Kristian akan, e katamankin irail duwen karuwaru en arail ahnsou pwehki imwin koasoandi en mehn Suhs akan kerendohr ahnsouwo. (1 Pit. 4:7) Rahnwet, mehn kadehde tohto kin kasalehda me imwin koasoandi suwed wet kerendohr. Ehuehu rahn, atail mour pahn kasalehda ma kitail kamehlele met de soh. Nin duwen sapwellimen Siohwa ladu kan me kin ngoangki papah Ih, kitail anahne nsenohki doadoahk kesempwal oh karuwaru me iei doadoahk en kalohki Rongamwahu en Wehin Koht.—Taitus 2:13, 14.
25 Met wia ahnsou mwahu en mwekid oh kasalehda atail ngoangki doadoahk kesempwal wet! Doudouloale duwen dahme Siohwa kin ketin wia ong uhk, ahmw peneinei, oh ahmw mwomwohdiso. Edetehn kitail sohte kak pwainda soahng koaros me Siohwa wia ong kitail, kitail kak kihong Siohwa atail kaudok sang nan mohngiong unsek. (Melkahka 116:12-14) Siohwa pahn kapaiada atail nannanti oh doadoahk me kitail kin wia. (Lepin Padahk 10:22) Kitail koaros en “ngoangki wia dahme mwahu” ahnsou wet pwe kitail men kalaudehla atail kalohk “pwe kaping en kohwong Koht ni mehkoaros ni mwaren Sises Krais.”—1 Pit. 3:13; 4:11.
[Box/Chart on page 3]
Aramas me Iang Towehda Kataman Sampah Pwon
1999 14,088,751
2000 14,872,086
2001 15,374,986
2002 15,597,746
[Kaokon nan Pali 4]
Ihs me Ke Pahn Luhke ong Kataman?
□ Ahmw peneinei
□ Mehn mpomw kan oh aramas me ke ese
□ Iengomw tohndoadoahk kan oh tohnsukuhl kan
□ Return Visit oh Bible Study kan
[Kaokon nan Pali 5]
Sewese Irail me Iang Towehda Kataman
□ Kasamwo irail ni kadek oh limpoak
□ Pwurehng pwurala rehrail
□ Idek rehrail ma irail men onop Paipel rehmw
□ Luhke irail en iang towehda Kapahrek Tohrohr