Pweidahn Kokohp en Paipel Ehu

POHN MEHN KASANSAL nan wasahn nekidala kepwehn mahs me adaneki Imperial War Museum nan London, England, mie kuloak ehu me kin pein kilele awa kan. Ni ahnsou me kuloako kin pir, e kin sek sekon 3.31 koaros. Ni ahnsou me e kin sek ehu nempe kin pil kapatapatohng wen nempeko me miehier. Ehu ehu sek, ehu ehu nempe, kin wiliwilian emen ohl, emen lih, de seri me mehkila mahwin erein pahr 1900 wet.

Sek wet tepiada nan June en 1989 oh e pahn imwisekla wadawado ni lukepen pwong en mandahn pahro 2000. Ni ahnsouwo nempehn me pahn wadawadi pohn kuloalo pahn mihmi ni uwen aramas rar pak epwiki​—nempehn irail kan me mekihla mahwin erein pahr 1900.

Impen sounpar 2,000 samwalahro, Sises Krais kohpada duwen ahnsou ehu me pahn sansalkihda ‘pei pahn wiawi nanpwungen sahpw akan, oh mahwen pahn pweida nanpwungen wehi kan.’ Me parekiong met, Sounkadehde kan en Siohwa kin ahnsou werei kalokalohki me mahwin en 1900 wet, iangahki rerrer en sahpw tohto kan, soumwahu kan, lehk en mwenge, oh wiewia teikan, kin oarepene kihda mehn kadehde me kitail kin momour ni “imwin rahn akan”​—ahnsouwo mwurin ahn Sises kasapwilda nin duwen Nanmwarki nanleng nan pahr 1914.​—Luk 21:10, 11; 2 Timoty 3:1.

Ni ah kin doadoahngki manaman en Paipel, The Watchtower kin pakairki rongamwahuwo me Wehin Koht pahn ahnsou keren kasorala sounpelien koaros oh kawekiohng sampah en wiahla paradais ehu. Oh iaduwen mahwin? Paipel mahsani: “Kumwail kohdo, oh kilang dahme Kaun-o (Siohwa) ketin wiahda. Kumwail kilang soahng kapwuriamwei kan me e ketin wiahda nin sampah. E kin ketin katokehdi mahwen wasa koaros nin sampah; e kin ketin katimpeseng arep kan, oh kauwehla kesik ketieu kan, e kin ketin isikala nein sounpei kan mehn sansar kan.”​—Melkahka 46:8, 9.

[Credit Line]

Clock: By Courtesy of the Imperial War Museum