Padahk Mehlelo Duwen Hell
RIPOHT EHU sang padahk en pelien sarawi en Church en England kasalehda me hell kaidehn wasa karakar ehu; ahpw e wia irair ehu. Ripohto kawehwe: “Mie karepe tohto ong wekideklahn padahk wet. Ahpw ehu karepe iei uhwong sang loale oh arail sohte ahneki pwoson en Kristian me pahn uhwong pelien lamalam me kin kapwarehda masak oh kekeiradahn lamalam me Kohto me kin kalokehki aramas rar kan kalokolok soutuk sohte kin parekiong sansaldahn limpoak en Koht rehn Krais.”
En lamalam kan sapwungki padahk wet me pid hell sohte kin paradahte rehn Church en England. Aramas tohto sang soangsoangen pelien lamalam kan kin apwalki kaudekiong Koht emen me kin isikada aramas kan. Emen professor en pelien kaudek oh pil koasoandi en aramas ni Duke University’s Divinity School me adaneki Jackson Carrol, kosoia: “Aramas men kaudekiong Koht emen me limpoak. E kin uhwong tiahk en ahnsouwet en kosoia duwen dihp oh lamalam en dipiki mehkot.”
Sounkadehde kan en Siohwa kin kamehlele me hell, duwen me Paipel kin padahngki, me iei sousou en me melahr kan—kaidehn wasahn kalokolok karakar ehu. Re kin kamehlele padahk wet, kaidehn pwehki e wia padahk indand ehu, ahpw pwehki dahme Paipel mahsanih: “Me melahr akan sohte ese mehkot. . .e sohte pahn mie wiewia, de lamalam, de loalokong, de erpit, nan wasahn me melahr akan [“hell,” Catholic Douay Version].”—Eklesiasdes 9:5, 10.
Pwehki wehwe sansal wet me pid irair en me melahr akan, Charles Taze Russell, tepin president en Watch Tower Society intingihdi nan 1896: “Se sohte diarada [nan Paipel] wasahn kalokolok soutuk me kosonned akan oh nain pelien kaudek kan pwuhk kan, oh kaun en lamalam tohto kan, kin padahngki. Ahpw se diarada me ‘hell,’ sheol, hades, me iei wasa me keinek koaros pahn kohwong loale pwehki dipen Adam, oh me koaros kak pwainsapahl sang loale sang ni mehlahn Kauno; oh ‘hell’ met iei sousou—irair en mehla.”
Ihme karehda erein sounpar epwiki kei, Sounkadehde kan en Siohwa kin padahngki padahk mehlelo me pid duwen hell.
[Kilel nan pali 31]
Charles T. Russell