Ihs Me kin Kaunda?

“IS me kaunda sampah?” Ma emen kalelepek rehmw peidek wet, dahme ke pahn sapengki? Aramas sarawi tohto pahn inda me “Koht” de “Sises.” Ehu artikel me pwarada nan ehu nuhs en Bahama, me adaneki The Freeport News, kihda pasepeng ehu me aramas malaulaute pahn kasik.

Aramaso me intingihda artikelo kosoia: “I diarada tract ehu pohn ahi kendake. Uhdahno I sohte pahn wadek met, ahpw ahnsouwet I koasoanehdi en wadek tracto. Oarelap en tracto kalelepek peideko, ‘Ihs Me Uhdahn Kaunda Sampah?’” Ni en lih menet wadek audepen tracto me poahsonda pohn Paipel, e sukuhlkihdi me kaunen sampah wet kaidehn Koht de Sises ahpw Sehdan me Tepel.​—Sohn 12:31; 14:30; 16:11; 1 Sohn 5:19.

Tracto kawehwe: “Medemedewe duwen soahngen lemei laud ni ahr kin kemehla aramas. Aramas kin doadoahngki perehn ahngiang gas poison, wasahn selidi, kesik kisiniei, pakudang, oh pil soahngen kalokolok lemei teikan en kemehla aramas akan ni lemei. . ..Dahme kamwekid aramas en wia soahngen wiewia suwed de kamwekid irail nan soahngen irair me pahn karehong irail en ahneki pepehm en wia soahngen pwukat? Komw medemedewe ma mie ehu manaman soh sansal me suwed me kin kamwekid aramas en wia soahngen wiewia lemei?” E kapwuriamwei en Paipel kahdaneki Sehdan “koht en koasoandi wet en mehkan”?​—2 Korint 4:4.

E kaperen pwe, kereniongehr Sehdan oh nah ngehn saut kan pahn sohla. “Sampah wet oh mehkoaros nin sampah me aramas kin inengieng kin sosohrala; ahpw me kin kapwaiada kupwur en Koht pahn momour kohkohlahte.” (1 Sohn 2:17) Ehi, Paipel inoukihda me irail ko me kin wia kupwur en Koht pahn ahneki koapworopwor en mour kohkohlahte nan sampah kapw pwungo. (Melkahka 37:9-11; 2 Piter 3:13; Kaudial 21:3, 4) Ia uwen e pahn kansenamwahu pwe lipwen Sehdan oh nah ngehn saut akan pahn koakoahk sang!

Mwurin ah kasawih audepen kisin tract wet, souninting en nuhso The Freeport News kaimwsekla ah kosoi oh inda: “I inenin perenkihda ahi wadek tracto . . . pwehki ngehi kin pil pwunodki duwen irair en sampah, oh ihs me kaunda.”