Sounsahkas kan en Keimwen Nahna kan
NI keilen pali kapi en Seden Mehla mie kahnimw en mahs ehu oh nan wel me kapilpene iei me adaneki En-gedi. Pwehki wasahn alu kan oh pohn koadoken nahna pwukat me takaihn e kin wia douwe kaselel en kuht en nahnahn Sapwen Inou, me duwehte kuht pwukat me sansalda wasaht.
Mahn menet me sohte kak dipikelekel de pwupwudi kin iang kisehn kapikipik kaselel kan en mahn akan. Kitail en pahkpeseng Paipel oh kilang ni keneinei mahn kapwuriamwei menet.
“Kuht Lawalo Kan Kin Kousoan Pohn Nahna Ile Kan”
Ih met me sounmelkahkao koulki. (Melkahka 104:18) Kuht en pohn nahna kan kin kapikipikda pwehn kak mour pohn wasa ile kan! Re inenen palsek, ni ahr kin alu pohn takai kan ni likilik oh marahra. Met pwehki wiawihdahn kikirail kan. Pwal me mih nanwerengen kikirail kan kin kak wehwehpeng pahn uwen toutou en kuhto, me karehong mahno en kak sokedi teng ni ahnsou me e kesikesihnen de alialuh pohn takai pasapas tehtik kan.
Kuht en nahna kan pil ahneki koahiok en katouparekih irail. Irail kak lus wasa doh oh lusdiong pohn pasapas takai kan me kin uhsang ni keimwen nahna kan me tehtikitik itar ongete nehrail pahieuwo. Sounsukuhl en mahn oh tuhke me adaneki Douglas Chadwick pak ehu kilangada ehu soahngen kuht en nahna me doadoahngki ah touparek pwehn dehr tengala pohn ehu pasapas me nohn tehtikitik ong ih en soupeila mwuri. Ohl kosoia: “Mwurin ah kilikilang ehu pasapas me dohki piht 400 pah, kuhto katengehdi neh riau kan mwowe oh ni wawai aluhki neh riau ko mwuri aluhdahla pohn moangeo ni keilen takaio duwehte ma e wia mwadongo pit. Ni ahi koledi ahi esingek, kuhto wie alu ni ahl wet lau neh kan en mwowe uhd soupeilahng wasao me e tepin kohdo sang ie.” (National Geographic) Ihme e sohte kapwuriamweiki me kuht en nahna kan kin adaneki “sounsahkas kan en keimwen nahna kan”!
‘Ke Ese Ahnsou Me Kuhten Wel Kan Kin Ipwidi?’
Kuht en pohn nahna kan me lawalo. Irail kin men mih wasa kan me dohsang aramas. Mehlel, aramas kin apwalki kerenih mahn menet pwehn kilang arail mour nan wasa kan me re kin mih ie. Ihme karehda, Me Naineki “mahn kan me mihmihseli pohn dohl kid kei” kak ni pwung kalelepek rehn ohlo Sohp: “Ke ese ahnsou me kuhten wel kan kin ipwidi?”—Melkahka 50:10; Sohp 39:1.
Loalaokong me Koht ketikihong loalerail kin kehsehki kuht lih kan iahd ahnsoun eh pahn neitik. Kuht liho kin rapahki wasa kis me mie perepe oh naitikihdi kisin kuht emen de riemen, oh met kin kalap wiawi ni imwin May de nan June. Erein rahn keite mwuri kisin kuht kan kin kakehr alu.
“Limpoak Rasehng Tie Men oh Kaselel Duwehte Kuht en Nahna Men”
Nanmwarki loaloakong Solomon kangoangehki ohl pwopwoud kan: “Perenki omw pwoud en omw pwulopwul, me limpoak rasehng tie men oh kaselel duwehte kuht en nahna men.” (Lepin Padahk 5:18, 19, NW) Met kaidehn pwehn mwamwahleki lih kan. E sansal me, Solomon kin kosokosoia kaselel, lingan, oh irair kaselel teikan en mahn pwukat.
Kuht en nahna kan kin iang kisehn “mour” kan me kin wia kadehdehpen erpit en Sounkapikadao. (Senesis 1:24, 25) Kitail soh kin perenki me Koht ketikihong kitail soahngen mahn kapwuriamwei tohto?
[Credit Line]
Courtesy of Athens University