Koht Pahn Kauwehla Sampah?
NIN DUWEN me Pope John Paul II kasalehda, aramas kak kilangwohng ahnsou kohkohdo ki koapworopwor. E koasoia me, erein poadoapoad, “aramas kan kin kaukaulehte wiahda dihp kan, ele toutou sang dihp ko me sansalda mwohn Nohlik lapalapo.” Mendahki met, pope kawehwehda me, “sang ni mahsan kan en inouwo me Koht wiahiong Noha kitail wehwehkihda me ahnsouwet sohte dihp ehu me kak karehong Koht en kauwehla sampah me pein ih ketin wiahda.”
Mehlel me Koht sohte pahn kauwehla sampah? Paipel mahsanih me mwurin Nohliko, Koht mahsanihong Noha: “Mour koaros solahr pahn kamakamkihla pilen nohlik ehu, oh solahr nohlik ehu me pahn wiawi pwehn kauwehla sampah.” (Senesis 9:11) Pope koasoia me ki mahsan pwukat, Koht “kapwukoahki pein ih en doarehla [sampah] sang ohla.”
Paipel kasalehda ni sansal me Sounkapikadao sohte pahn mweidohng weren sampah en ohla. Paipel mahsanih: “Sampah pahn mihmi kohkohlahte.” (Eklesiasdes 1:4, New World Translation) Ahpw mie mehkot me kitail kak sukuhlkihsang Nohliko—mehkot me pope sohte koasoia.
Sises mahsanih me irair kan pohn sampah ni ahnsoun ah ketier nan ahnsou kohkohdo pahn “duwehte ni mwein Noha,” ni en aramas kan “pahn sasairki Nohliko lau e kohdo oh kamwopwihrala koaruhsie.” (Madiu 24:37-39) Me rasehng met, wahnpoaron Piter ntingihdi me duwehte “sampahn ahnsouwo me lellohng ohla sang ni pilen nohliko,” e pahn pil duwehte “rahn en kadeik oh kasohralahn aramas akan me dohsang Koht” me kohkohdo pohn sampah en ahnsouwet.—2 Piter 3:5-7.
Sises oh Piter kin manokehla sapwellimen Koht inouwo ong Noha? Soh douluhl! Duwehte me e ketin mahsanih nan inouwo ong Noha, Koht sohte pahn doadoahngki pilen Nohlik pwehn kauwekihla koasoandi suwed wet en mehkan. Ahpw, e pahn ketin doadoahngki kehl en “Nanmwarki en nanmwarki kan oh Kaun en kaun akan,” Sises Krais. (Kaudiahl [Apocalypse] 19:11-21) Ihme karehda, nin duwen me Paipel kasalehda, sampah sohte pahn kasohrla, ahpw “sampahn” tohnsampah suwed kan me pahn uhdahn kasohrala. (Lepin Padahk 2:21, 22; Kaudiahl 11:18) Mwurin met, “me pwung kan pahn sapwanekihla sampah, oh re pahn kousoan loale kohkohlahte.”—Melkahka 37:29.