Ripoht En Sounkalohk Kan En Wehio

Koht Kin ketin Kekeirada Wahr kan nan Alaska

KADUPWALKIHDI sino oh ais, kisin weren tuhke kis kin awiawih ahnsou mwahu pwehn kak kekeirada lau e laudla. Erein sounpwong mwotomwot siluh en ahnsoun karakar nan Alaska, kisin weren cabbage kis me mihmi ni uwen ihns walikis ehu kin kak keirada lau lel paun kereniong 90! Ehi, sahpw wet me mahso me tohto kin leme me e wia sapwtehn ais ehu, kak kawosada wahnsahpw tohto.

Met me keieu mehlel nan mwaht en Alaska ni pali ngehn. Wasao, nan sapwen ahnsou kopou reirei kan, Sounkadehde kan en Siohwa kin kaukaule kamwarak weren Wehio. Me pil duwehte nan wasa teikan nan sampah, Koht kin karehong wahro en wosada nan mohngiong kan me mwahu.​—⁠1 Korint 3:​6, 7.

● Nin doken ah ieiang poas en sukuhl ehu, Sounkadehde pwulopwul men me adaneki Vanessa kilangada ienge tohnsukuhl men me adaneki Ann, me kin kalap mwomwohd kelehpw. Ann mwomwen nsensuwed, ihme Vanessa kin luke Ann en mwohdi reh. E sohte kapwuriamwei ia karepen Ann kin nsensuwed! Ah nohno mehkihla soumwahu en mohngiong, oh ahnsou mwotomwot kis mwuri, ah pahpa mehkihla kanser. Ih met me karehda Ann kin koukousoanki rehn ah peneinei kan nan Alaska.

Nin doken ah iang kalohk ni ehu Rahn Kaunopo, Vanessa uhdi ni imwen serepein menet oh pwilikihdi reh brochureo Does God Really Care About Us? Ni Ehd mwuri, nan wasahn sukuhl, Ann kin rapahki Sounkadehde pwulopwulo. Mie en Ann peidek en Paipel tohto, me Vanessa kin sapengla. Ann kalelepek: “Ia wasa kumwail kin sarawi ie?” Ni soutiko, Ann iang towehda tepin mihding me eh iang ni Kingdom Hall.

Sohte werei mwuri serepein sopwoupwou sounpar 17 menet diarada ‘pahpa’ oh ‘nohno’ tohto duwen me Sises inoukihda. (Madiu 19:29) Oh ia uwen e wia ahnsou kaperen ehu en kilang Ann me peren oh pohkomwokomw kasalehda ah inou ong Siohwa ni ah papidaisla nan pihl ni Kapokon en District me oaralap “Sounkair Kan en Sapwellimen Koht Popohl”!

● Nan wasa kan me dohsang kahnimw me adaneki Alaskan Arctic​—⁠wasa me kisin kousapw kan kin dohpeseng​—⁠weren Watch Tower Society sounpihr kin kadoadoahk pwehn kamwarak weren Wehio nan kahnimw 150. Ahpw kekeiradahn pali ngehn sang ni onop kaukaule en Paipel anahne wiawi sang ni ntingpene. Pwehki me tohto kin apwalki ntingih kisinlikou, emen sounonopkihong meteikan Paipel anahne ese dahme e pahn ntingih pwe meno me eh ntingohng en perenkihte rong. Iaduwen e kak wia met?

Kathy kin wia onop en Paipel kekeirada mwahu ehu rehn Edna, mendahki ira kin kousoan dohkihpeseng mwaihl 400! Kathy sohte kin ntingih sapahl peidek kan nan pwuhko me ira kin onopki, ahpw e kin doadoahngki ehu doarepwe tohrohr oh ntingihdi peidek kan sang nan pwhuko me re kin onopki oh pil kihong wasahn ntingihdi pasapeng kan. Mwurin Edna kin ntingihdi pasapeng kan, Kathy kin sapeng kisinlikouwo oh kapataiong lokaia kan me anahn pwehn kawehwehda ni sansal mouren ire ehu. Kathy koasoia: “I kin koasoanehdi ni soutik en Ni Esil ong aht ‘onopo,’ oh I kin song en kapwaiada koasoandio duwehte ahnsoun onop en Paipel teikan. I pil kadarwohng Edna pwuhdo kan me stamp miehr oh pil iangahki adres. Pwehki pekederpeseng en kisinlikou kan kin reireiki wihk riau, onop doadoahngki wiepen ntingpene kin inenen pwand.”

Medewehla ahnsou kapereno me Kathy oh Edna tuhpene ni kapokon en district nan Anchorage mwurin sounpwong eisek en ara onop doadoahngki kisinlikou! Sounkadehde kan pil perenki me mie irail kan me kin onop Paipel oh meteikan me kin perenki rong padahk mehlel sang nan kousapw doh tohto kan nan Alaska me kin iang towehda kapokono.

Mendahki kekeirada kan kin ekei pak pwand, ekei “wahr kan” kin wosada mwadang ni ahnsou me marain en padahk mehlel kin dakar. Uwen tohtohn sounkapinga Siohwa me kin papidaisla ehu ehu sounpar nan Alaska, kin tohtohkisang me epwiki! Se nda, “Kalahngan en Kupwuromwi, Maing Siohwa,” pwehki omw karehong wahr kan en kekeirada!