Tiahk Mwahu Wahdo Kaping

NUHSPEHPA en Itali me adaneki La Gazzetta del Mezzogiorno kapinga Sounkadehde kan en Siohwa pwehki arail ntingihdi artikelo me oarelap koasoia “Matera​—City of Unique Cave Dwellings.” (Matera​—⁠Kahnimw En Wasahn Kousoan Nan Pwoahr kan.) Artikel wet pwarada nan makasihn en Awake! en July 8, 1997 (lokaiahn wai), me kin kohpeseng ni lokaia tohto. Makasihno Awake! kin ahnsouwet kawehwehdiong ni lokaia 81 oh daulih meh rar pak 19 kin kohpeseng nan sampah pwon. Nuhspehpao koasoia me makasihno Awake! kin keieu deila nan summero “me pid ah kin sewesehda kahnimwo Matera ni ah kin pakairki ong wehipokon duwen poadoapoad oh lingan en wiawihdahn kahnimw wet.”

Nuhspehpao kin kapinga Sounkadehde kan me pid Kapokon en District me oarelape koasoia “Pwoson Mahsan en Koht” me wiawi nan Matera nan 1997. Artikelo kasalehda me Sounkadehde kan “luhke aramas 4,000 nan wasahn mwadong me adaneki XXI Settembre Stadium nan werengen ahnsou karakaro pahn ketipino; re apwaliala kamwakelehda wasahn mwadongo, pwurehng litepwihla, oh onehda wasa teikan nan wasahn mwadong wet (keieu imwen kainen kan) oh re sohte ale pweipwei sang doadoahk pwukat, oh pein pwainda kepwe kan me anahn ong onohn sapahl pwukat.”

Sounkadehdehn Siohwa kan kin nantiong en wia mehn mpe mwahu kan. (Madiu 22:​37-39) Re kin idawenla kaweid en iren Pwuhk Sarawio: “Amwail tiahk kan nanpwungen me rotorot akan en kin mwahu, pwe . . . ni ar pahn kin kilang amwail wiewia mwahu kan, re en kapingahki Koht ni Rahnen eh pahn ketido.”​—⁠1 Piter 2:⁠12.