Peidek Kan Sang Rehn Sounwadawad Kan
Nin duwen me Madiu 17:20 kasalehda, wahnpoaron kan sohte kak kamwahuwiala pwutak soumwahu men ‘pwehki arail pwoson sohte itar.’ Ahpw, Mark 9:29 kin kasalehda me arail sohte kak kamwahuwihla pwutako kin doakedoake anahnepen ren kapakap. Dahme kahrehda pwuhk en Rongamwahu riau pwukat kin kihda kahrepe kan me wekpeseng?
Ni mehlel, pwuhken Rongamwahu riau pwukat kin kaunsekehla ehuehu audepara kan, ahpw ire pwukat sohte kin uhpene. Keieu, kilang nan Madiu 17:14-20. Emen ohl ripohtki me nah pwutako kin soumwahu rerrer oh me sapwellimen Sises tohnpadahk kan sohte kak kamwahuwiala pwutako. Sises eri kamwahuwiala pwutako ni ah kausasang reh emen ngehn saut me kin kaloke pwutako. Tohnpadahk kan kalelepek kahrepen re sohte kak kausekihsang ngehn saut rehn pwutako. Nin duwen me pwuhken Madiu kasalehda, Sises sapengkin irail: “Pwehki amwail pwoson sohte itar. Kumwail en ese pwe ma mie pwoson rehmwail, mehnda ma e pahn uwehte kisin weren kadiring kis, kumwail pahn kak ndahng nahna wet, ‘Tohrekweisang met, tohrekla mwo,’ a e pahn wiawi. Kumwail pahn kakohng mehkoaros.”
Ahnsouwet, menlau pahkalahng nan Mark 9:14-29, wasa me kitail pahn diarada kalaudepen ire pwukat. Karasepe ehu, Mark 9:17 kin kasalehda ni oaritik me nan irair wet ngehn suwed men me kin kahrehong pwutako en soumwahu rerrer. Kitail en pil tehk me wasa teikan nan Paipel, Sises kin kamwahuwiala irail kan me ahneki soumwahu rerrer oh aramas kan me ngehn saut kan kin tiada pohrail. (Madiu 4:24) Nan irair tohrohr wet, “ngehn saut men,” de ngehn suwed men, me kahrehda soumwahuwo, nin duwen me toahkte Luk kadehdehda. (Luk 9:39; Kolose 4:14) Tehk lokaia ko, “Ahnsou koaros me ngehno kin tiada powe” nan Mark 9:18. Ihme ngehn sauto sohte kin kaukaule kaloke pwutako, ahpw ekeite pak. Mendahki met, tohnpadahk kan sohte kak kausesang ngehn sauto oh kamwahuwiala pwutako. Ni ahnsou me re kalelepek ia kahrepen met, Sises sapengkin irail: “Soahngen ngehn saut wet sohte kak pekeuskihsang mehkot pwe kapakapte.”
Ahpw, wadek kanahieng rongamwahu en Mark, kin kasalehda me eh sohte kin uhwong dahme Madiu kileledi. Nan Mark 9:19, kitail wadek me Sises kin pahtouki seupwoson en diho. Oh nan iretikitik 23, Mark kileledi me Sises padahkiohng semen pwutako: “Mehkoaros kak pweida rehn me kin pwoson.” Ihme, Mark pil kasalehda duwen kesempwalpen pwoson. Ihme, nan iretikitik 29, Mark kin kapataiong kalaudpen ire wet. Mark kapataiong dahme Sises mahsanihki duwen kapakap, me Madiu oh Luk sohte kileledi nan neira pwuhk ko.
Eri, dahme kitail kak nda? Nan ahnsou teikan irail wahnpoaron 12 ko oh tohnpadahk 70 ko kin kaus ngehn saut kan. (Mark 3:15; 6:13; Luk 10:17) Ahpw nan irair wet tohnpadahk ko sohte kak kausesang ngehn sauto. Dahme kahrehda? Ma kitail kapatahpene iretik kan me pwuhk teikan koasoia, kitail pahn wehwehkihda me re saikinte kaunopadahng wia met nan irair wet. Ele kisehn kahpwalo iei soahngen ngehn saut me tiada pohn pwutako, pwehki e mwomwen me ngehn saut kan kin ahneki soahngen irair kan, peren kan, oh pil koahiek kan me wekpeseng. Pwehn kausesang ngehn saut menet, pwoson kehlail oh kapakap ngidingidki sawas en Koht me keieu anahn. Ehi, Sises ahneki soahngen pwoson wet. Semeo, Sounkaronge kapakap, kin pil utung ih. (Melkahka 65:2) Sises sohte ihte kak kamwahuwiala pwutak soumwahuwo ni ah kausesang reh ngehn sauto ahpw e ketin wiahda met.