Mery Pein Mahla Oh Mehla?

NIN DUWEN me nuhspehpa en Vatican L’Osservatore Romano kasalehda, me padahk en Kadolik duwen Assumption (padahk en Kadolik me dene Meipwon Mery poukdala nanleng ki paliwar uduk) koasoia: “Immaculate Virgin (Meipwon Sohdipeo), me saledek sang mwaimwai en tepin dihp, poukdala nan lingan en nanleng ki paliwar oh soul, ni ahnsou me ah mour nan sampah imwisekla.” Padahk wet kin kahrehong ekei sounpadahk en Kadolik kan en kose me dene Mery “sohte mehla ahpw mwadangete kohsang mour nan sampah ong nan lingan en nanleng,” nuhspehpao koasoia.a

Nan ahnsou keren, Pope John Paul II wiahda ehu padahk duwen ire wet me weksang met. Ni General Audience ni Vatican ni June 25, 1997, e koasoia: “Kadehde Kapw sohte koasoia irairen en Mery mehla. Ah soh mweseiseiki met kahrehong emen en lemeleme me Mery pein mahla oh mehla, oh en pwuhk sarawi sohte koasoia met kasalehda me e sohte kesempwal. . . . Sohte utupen lamalam kan me men irehsang Mery irairo me e pein mahla oh mehla.”

En Pope John Paul padahk kasansalehda sapwung toutou ehu nan padahk en Immaculate Conception (Ipwikihdi Sohdihp). Ma inen Sises “saledek sang mweimwei en tepin dihp,” iaduwen Mery kak mehla sang “ni ah mahla,” me kohsang dihp me Adam kadaurdo? (Rom 5:12) Padahk en sarawi kapwonopwon wet kin kohsang en sarawi en Kadolik lamalam sapwung me pid Mery. Ihme e sohte kapwuriamwei me saminimin oh pingiping kin pwarada nan Sarawi en Kadolik pwehki ire wet.

Nindoken Paipel kin kasalehda me Mery kin aktikitik, lelepek, oh poadidi, e sohte kin koasoiahki irair pwukat emen me “ipwikihdi sohdihp.” (Luk 1:38; Wiewia 1:​13, 14) Paipel mahsanih: “Aramas koaros wiadahr dihp, oh irail koaros dohsangehr sapwellimen Koht lingan me e kin ketikihong aramas.” (Rom 3:23) Ehi, Meri sohsohkihda dihp oh soh unsek duwehte tohnsampah koaros oh sohte mehn kadehde me e mehkihla mehkot likin e pein mahla oh mehla.​—⁠Pil tehk 1 Sohn1:​8-10.

[Nting tikitik me mi pah]