Ihs me Pwukoahki?

Tohto kin ikidiki Koht arail kahpwal akan. Ehu lepin padahk en Paipel ketihtihki: “Pein sapwung en ohl emen kin kauwehla ah mour, ahpw e kin uhd kaulimehki Kauno.” (Lepin Padahk 19:​3, The New English Bible) Ahpw, ikidiki Koht kahpwal akan en aramas kin duwehte kapwukoahki emen sounwiahda sidohsa aksident kan me kin kalap kohsang rehn aramas kan me kin sakaula oh tangahki sidohsa.

Koht ketikihongehr tohnsampah kaweid kesempwal kan nan sapwellime Mahsan, Pwuhk Sarawi. Ni atail onopki Pwuhk Sarawi oh momourki kosonned kan oh mouren kosonned kan me kileledi loale, kitail kak liksang lidip en mour tohto. Me weksang met, sapeikiong kaweid en Koht pahn imwila suwed ong emen. Karasepe ehu, irail ko me kin mwenge daulihla, simwok, kamamsakau, de wiahda tiahk en nenek, kin kalap imwikihla kauwehla arail pali roson. (Luk 21:34; 1 Korint 6:18; 2 Korint 7:⁠1) Kristian wahnpoaron Pohl ntingihdi: “Pwe mehkot me aramas pahn padokedi, ihme e pahn dolung. Ma e padokedi nan mwetuwel en paliwere ineng en paliwar, e pahn dolungasang mehla; a ma e padokedi nan mwetuwel en Ngehn, e pahn dolungasang rehn Ngehno mour soutuk.”​—⁠Kalesia 6:​7, 8.

Ia uwen e pahn mwahu en mourki kosonned oh mouren kosonned kan en Koht! Ma kitail pahn wia met, kitail pahn lelohng mehlel en inoun Koht me soukohp Aiseia lohkihda: “Ngehi me Kauno [“Siohwa,” New World Translation] omw Koht, me kupwurki padahkihiuk pwe en wia kamwahu ehu ong uhk oh kaweid uhk nan ahl me ke pahn keid ie. Ma ke rongete ehi kosonned akan! Eri, kupwuramwahu ahpw pahn pwilipwilwei rehmw rasehng piletik pwoat me sohte kin madada. Powehdi pahn lelohng uhk, rasehng iloak kan me kin pwungupwungdohng ni oaroahr.”​—⁠Aiseia 48:​17, 18.