Soangen Ahd Dah me Komw Wiadahr?

NAN Pwuhk Sarawi, lepin lokaiao “ahd” kin ekei pak wehwehong ahn emen ah wiewia kan. Karasepe ehu, Nanmwarki loalokong Solomon ntingihdi: “Adamwahu mwahusang lehn wai pweilaud kan; oh rahn me ke mehla mwahusang rahn me ke ipwidi.” (Eklesiasdes 7:1; pil tehk Lepin Padahk 22:⁠1.) Nin duwen me mahsen kan en Solomon kasalehda, aramas emen sohte kin ipwikihdi adamwahu ehu. Ahpw, erein ah mour e pahn wiahda ede me pahn mie katepe. Edeo pahn kasalehda pein ah irair kan, ma e kin kadek de roporop, limpoak de sempoak, aktikitik de aklapalap, ma e kin mwahu de suwed.

Tehk duwen Depit. Erein ah kakaun, e kasalehda me pein ih me kehlail oh soh wukiwuk. Ni ahnsouohte, Depit kin ni karakarahk pohnese ah sapwung kan oh koluhkihla dipe toutou kan. Ki kahrepe mwahu, sapwellimen Siohwa soukohpo kin kasalehda me Depit kin wia “ohl emen me e [Koht] ketin kupwurki.” (1 Samuel 13:14) Pwulopwulo Depit wiadahr adamwahu ehu rehn Koht.

Me weksang met, Nanmwarki en Suda Sehoram wiadahng pein ih ahd suwed ehu. E kasohpeiweisang tohn ah wehio kaudok en Siohwa oh pil kemehla rie ohl wenemen oh ekei soupeidi kan en Suda. Kedekedeo, Siohwa kasoumwahuwihkihda Sehoram soumwahu kamedek ehu me karehong en mehla. Paipel mahsanih me Sehoram “mehla oh sohte me pahtoukihla,” de nin duwen me Today’s English Version kawehwehda, “sohte me nsensuwedkihla ah mehla.”​—2 Kronikel 21:20.

Mour en Depit oh Sehoram kin karasahda mehlel en lepin padahk en Pwuhk Sarawio: “Katamanpen aramas mwahu kin wiahla mehn kapai, ahpw aramas suwed pahn mwadangete manokonokla.” (Lepin Padahk 10:⁠7) Ihme karehda emen emen kitail en ni keneinei medemedewe peideko, ‘Soangen ahd dah me I kin wia rehn Koht oh rehn aramas teikan?’