Limpoak Kehlail Sang Limpoak en Nohno Men

NOHNO kan kin kesehla neirail seri kan me ahpwtehn ipwidi ni station en subway kan, nan wasahn kotala kan en wehipokon, de pil nanial akan me aramas kin kekeid ie ahnsou koaros. Ekei pak, irail sounrik kihd akan kin diarada nan wasahn kihd akan kisin seri pwelel men me kin sengisengki ahr nohno kan oh pwangada. Nin duwen me O Estado de S. Paulo kasalehda, “nempehn seri kan me lekdekla nanial akan kin wie tohtohla.” Ni mehlel, nohno pwulopwulo pahn koluhkihla met mwuhr. Ahpw e wiahte met, mendahki ma nah serio mehla.

Ele komw pahn wahpwonki, ‘Iaduwen nohno men kak lemehda en kesehla nah serio oh sohte ese dahme pahn wiawihong?’ Paipel kin doadoahngki soahngen irair kansensuwed wet pwehn karasahda duwen met ah weksang douluhl pepehm en atail Sounkapikadao ong sapwellime kan: “Kakete lih emen en manokehla uhdahn nah seri pwelel, oh sohte poakepoake wahnedio? Mehnda ma nohno men kak manokehla nah seri, ahpw ngehi, I sohte kak manokeiukala.”​—⁠Aiseia 49:15.

Mehlel, kehlail sang limpoak en emen nohno, Koht kin ketin poakepoake laud kitail oh kin pehmtikiohng atail anahn akan. Mendahki ma kowe emen me pwulopwul de emen me mah, mendahki soahngen kahpwal dah kan me ke ahneki, ke sohte kelehpw. Ahmw Sounkapikadao kupwurki en sewese komwi oh kin nsenohki kamwahupemw. Ni mahsen kan en sounmelkahka, “semei oh inei pil kak keseiehla, ahpw Kauno [“Siohwa,” NW] pahn ketin apwahpwalih ie.”​—⁠Melkahka 27:10.

Nan sampah pwon, makasihn en Watchtower oh Awake! kin ntingihda pwehn kihda loalokong en “Koht mehlelo,” Siohwa, oh sapwellime Ohlo, Sises Krais, me kak kihong irail kan me kin kalahnganki loalokong wet mour soutuk.​—⁠Sohn 17:⁠3.