Ia Kih ong Pweida Mwahu?
PWUTAK pwulopwul riemen kin ni keneinei kaukaunop misihn ehu me mwohmw kapwuriamwei pwe ren kilang ma misihno kak pihr. Mwadangete, kisinieng kis ahpw ipido kapihrada kisin misihno nan wehwe, oh mwuri, misihno me mwomwen luwet ahpw pwupwudiong nan pwehl ni ngilen me e ohla. Pwutak riemeno ahpw mworuskihla oh sohte mweseisei. Ara doadoahk me re wiahda ni keneinei oh doadoahk laud wiahlar koasokoasok en tuhke kei oh mete kei.
Ong Orville oh Wilbur Wright, dahme wiawi rahno, October nan 1900, kaidehn ehdin e sapwungala ara nannanti en wiahda misihn en pihr ehu me pahn toutousang kisinieng. Re doadoahngkihlahr sounpar tohto oh mwohni laud songosong en wiahda soangen misihn wet.
Ahpw, mwuri, ara ngidingid nannanti pweida. Ni December 17, 1903, ni Kitty Hawk, North Carolina, U.S.A, pirien wet wiahda mwomwen tepin sompihr me kin tangki misihn (motor) me pihrki sekond 12—mwotomwotsang tangatang en sompihr en ahnsouwet, ahpw dahme wiawi rahno wekidala sampah kohkohlahte!
Nannanti kan me kin pweida mwahu kin pak tohto kohsang kanengamah dadaurete. Mendahki ma emen nantihong samanihla ehu lokaia tohrohr, de sukuhliki ehu doadoahk, de pil kekeirada ehu nanpwungen rehn emen, pali laud en mehkan me kesempwal kin pweida mwahu ihte sang en emen nannanti. Sounnting Charles Templeton koasoia: “Pahn pak duwau sang nanpwungen eisek, pweida mwahu en mehkot kin keieu kohsang doadoahk laud.” Sunnting en nuhs Leonard Pitts, Jr., koasoia: “Kitail kin kosoia duwen koahiok, kitail kin pohnese duwen depweila mwahu, ahpw pak tohto, kitail kin pohnsowehla mehkan me keieu kesempwal. Doadoahk laud oh sapwungala tohto kan me kitail wiahda. Omw kin mwadangala doadoahk oh wie doadoahkte daulihla kuloak en nek doadoahk.”
Met kin kadehdehda dahme Paipel mahsanih mahso: “Doadoahk laud pahn kahrehiong uhk omw pahn ahneki manaman.” (Lepin Padahk 12:24) Pwerisek kin wehwehki me kitail kin dadaurete nan atail nannanti. Met me konehng ma kitail men alehda dahme kitail koasoanehdi en wia.
[Credit Line]
U.S. National Archives photo