Nantihong Kalohk oh Dehr Uhdi
1 Ekei pak, kitail kakete ahneki pepehm me kitail kin pwurepwurehng kalohk nan ehu wasa ahpw aramas malaulaute kin perenki rong. Ahpw, mie kahrepe kesempwal kan me kahrehiong kitail en anahne nantihong pwurepwurehng kalohk.—Mad. 28:19, 20.
2 En Wia Mehn Kadehde: Sises kohpada me kalohki rongamwahu en Wehio pahn wia kisehn kilel en “imwin koasoandi wet” oh met pahn wiawi “pwe kadehde en mie ong aramas koaros.” (Mad. 24:3, 14) Ni ahnsou me aramas akan kin kilang kitail iang wia doadoahk en kalohki rongamwahu en Wehio, mehn kadehde kehlail ehu kin kohwong irail. Mwurin atail kin kohkohlahsang wasahn kalohko, ekei aramas akan mwein kin koasoia duwen atail kohla wasao erein awa kei de pil rahn kei, mehnda ma irail sohte rong dahme kitail kolahng kalohki. En wehwehki kahrepen atail kalohk pahn sewese kitail en nannanti erein atail mour mendahki kahpwal de uhwong kan. Kitail kin kaperenda mohngiong en Siohwa ni atail kin iang kapwaiada pweidahn kokohp en Paipel sang ni atail kalohk oh kairehkin meteikan duwen kasohrlahn koasoandi suwed wet.—2 Des. 1:6-9.
3 Anahnepen Nannanti: Pwehki soangen mehn kerempwa tohto kan oh soahng tohto me aramas anahne wia ki arail ahnsou, atail nannanti anahne en laud pwe kitail en kak wia uwen me kitail kak pwehn doulahte kalaudehla arail men rong. Sounkadehde kan kin kalapw kalohkla ni imwen emen lih nan wihk koaros. Mwurin sounpar ehu liho ahpw lemehda luke irail Sounkadehde kan nan imwe pwehn tepida koasoia Paipel. E perenki mehlel dahme e rong kahrehda e pwungki en tepida onop Paipel, e tepida iang towehda mihding kan, oh mwuri men papidaisla.
4 Irair en sampah wet kin mwadang wekidekla, oh met pil duwehte aramas akan. Tohto irail akan me mahs sohte kin men rong ahpw met uhd perenki alehda koapworopwor wet me kitail kin ehukihong meteikan. Mehnda ma aramas tehmen me rong oh kapwaiada rongamwahu en Wehio, atail nannanti pahn uhdahn mie katepe.
5 Nan sampah pwon, e wie tohtohla aramas akan me kin “pahtoulahr oh milahr nan apwal pwehki soahng saut kan me kin wiewiawi.” (Esek. 9:4) Tohtohlahn sounkalohki Wehio kan kin kasalehda me irail akan me ahneki mohngiong pwung kin rong oh kapwaiada rohng en Wehio. (Ais. 2:2, 3) Eri, kitail en doulahte nan atail doadoahk en kalohk oh dehr uhdihsang atail en nannanti “wa kohdo rongamwahu, rongamwahu en popohl.”—Ais. 52:7; Wiewia 5:42.