“Wahdo Rongamwahupen Mehkot Mwahu”

“Meid lingan oh kaselel atail udiahl meninkeder men ni eh kin kotehodo nahna kan . . . wahdo rongamwahupen mehkot mwahu.”​—AISEIA 52:7.

1, 2. (a) Soangen suwed dah kan me kin wiawi rahn koaros? (b) Iaduwen aramas tohto kin mwekidiki rohng suwed akan me kin kohda ahnsou koaros?

RAHNWET aramas nan sampah pwon kin pehm me rohng suwed inenen kadire wasa koaros. Irail kin kapirada neirail radio oh rong duwen ripoht kamasepwehk kan duwen soumwahu keper kan me kin kemehla aramas tohto nin sampah pwon. Irail kin kilang nuhs nan TV duwen seri kan me kin duhpek oh pekipek sawas. Irail kin pwekada nuhspepa kan oh wadek duwen pakudang kan me kaposehpesengier ihmw akan, oh kemehlahr aramas tohto.

² Ehi, soahng suwed pwukat kin wiawi rahn koaros. Sampah wet wie susuwedla. (1 Korint 7:31) Ehu makisihn en Iurop kasalehda me likamwete sampah pwon pahn “nektehn ohla.” E sansal me ih met me kahrehda tohtohla aramas me kin inenen pwunod! Emen aramas koasoia duwen eh pepehm nan ehu roporop me pid duwen nuhs en TV nan United States me pahrekiong pepehm en irail aramas rar kei ni eh koasoia: ‘Mwurin ai kin kilang nuhs kan, I kin inenen pwunodada. Rohng suwed tohr kin pwarpwarada. E kin inenen kansensuwed.’

Nuhs me Aramas Koaros Anahne Rong

3. (a) Soangen Rongamwahu dah me kin dierek nan Pwuhk Sarawi? (b) Dahme kahrehda ke kesempwaliki Rongamwahu en Wehio?

³ Iaduwen, rohng mwahu kak dierek nan sampah kapwunod wet? Ehi, e kak! E wia mehn kansenamwahu ehu en ese me Pwuhk Sarawi kin audaudki rohng mwahu. Iei rohng ieu me Wehin Koht pahn katokehdi soumwahu, duhpek, wiewiahn lemei, mahwen, oh soahng suwed koaros. (Melkahka 46:9; 72:12) Met soh wia rohng ehu me koaros anahne en rong? Sounkadehdehn Siohwa kan pehm me koaros anahne rong rohng wet. Kahrehda, aramas akan kin esehkin Sounkadehdehn Siohwa kan arail kin nantihong ehukihong aramas en wehi kan koaros duwen Rongamwahu en Wehin Koht.​—Madiu 24:14.

4. Soangen ire dah kan me pid atail kalohk me kitail pahn tehkpene nan artikel wet oh artikel en mwurin met?

⁴ Ahpw, dahme kitail kak wia pwe kitail en kak perenki oh kilang katepen atail iang kisehn kalohki Rongamwahu wet​—pil wasa kan me sohte kin men rong? (Luk 8:15) Soahng siluh me kitail anahne en tehk me pid atail doadoahk en kalohk pwehn kak sawas. Kitail kak tehk (1) poahsoanpe, de kahrepen kitail kalohk; (2) rohng, de dahme kitail kalohki; oh (3) wiepe kan, de iaduwen kitail kin kalohk. Ni atail kin kanahieng poahsoanpen atail kalohk en mwakelekel, atail padahk en sansal, oh wiepen atail kalohk en kak pweida mwahu, kitail pahn kak kihong soangen aramas tohto ahnsou mwahu en rong rohng mwahu​—Rongamwahu en Wehin Koht.a

Kahrepen Kitail kin Iang Kisehn Kalohki Rongamwahu

5. (a) Dahme kin keieu kamwekid kitail en iang kalohk? (b) Dahme kahrehda atail peikiong kosonned en Pwuhk Sarawi me pid kalohk wia kilelepen atail limpoak ong Koht?

⁵ Kitail tehkpene irair keieu​—poahsoanpen atail kalohk. Dahme kahrehda kitail kin kalohki Rongamwahu? Iei kahrepe ohte me Sises kalohki. E mahsanih: “I poakohng Semei.” (Sohn 14:31; Melkahka 40:8) Me keieu kamwekid kitail iei atail limpoak ong Koht. (Madiu 22:37, 38) Pwuhk Sarawi kin kadokehpene limpoak ong Koht oh doadoahk en kalohk ni e ntingihdi: “Pwe iet duwen wehwehn poakohng Koht: kitail en peikiong sapwellime kosonned akan.” (1 Sohn 5:3; Sohn 14:21) Iaduwen, sapwellimen Koht kosonned akan pil pidada en ‘kohwei oh katohnpadahk’? (Madiu 28:19) Ehi. Mehlel me Sises me mahsanih met ahpw mahsen pwukat kohsang rehn Siohwa. Iaduwen? Sises kawehwehda: “Eri, kumwail ahpw ese me I sohte wiahki mehkot pein ngehi; ahpw ihte me I kin koasoia: mehkan me Sahmo ketin padahkihongieier.” (Sohn 8:28; Madiu 17:5) Kahrehda ni atail kapwaiada kaweid de kosonned me pid duwen kalohk, kitail kin kasalehiong Siohwa me kitail poakohng ih.

6. Ni soangen ahl dah kan me limpoak ong Koht kin kamwekid kitail en kalohk?

⁶ Pil kapatahieng met, limpoak ohng Siohwa kin kamwekid kitail en kalohk pwehki kitail men kapwungala likamw me Sehdan wiahkihda duwen ih. (2 Korint 4:4) Sehdan peidengki sapwellimen Koht pwung en kaunda. (Senesis 3:1-5) Nin duwen Sounkadehdehn Siohwa kan, kitail men kasalehda en Sehdan likamw oh kasarawihla mwaren Koht ong aramas. (Aiseia 43:10-​12) Pil patehng met, kitail kin iang kalohk pwehki kitail ese duwen sapwellimen Siohwa irair kan oh ahl kan. Kitail kin karanih ih oh inengieng en padahkiong mehteikan duwen atail Koht. Ni mehlel, sapwellimen Siohwa kadek oh ele kan me pwung kin kahrehda kitail en peren oh sohte kak uhdihsang koasoakoasoia duwen ih. (Melkahka 145:7-​12) Kitail pehm me kitail anahne kapinga ih ong meteikan oh koasoia duwen sapwellime “lapalap” ong irail akan me pahn rong.​—1 Piter 2:9; Aiseia 43:21.

7. Likin poakohng Koht, ia pil ekei kahrepe kan me kitail kin iang doadoahk en kalohk?

⁷ Mie pil ehu kahrepe kesempwal me kitail en iangete kisehn doadoahk en kalohk: Kitail men kamweitala irail akan me kin nsensuwedkihla rohng suwed akan oh irail akan me kin lokolongki kahrepe teikan. Nan doadoahk en kamaiou wet, kitail kin men kahlemengih Sises. Karasepe ehu, kitail kilang dahme kileledi nan Mark irelaud 6.

8. Dahme Mark irelaud 6 kasalehda me pid pepehm en Sises ong aramas akan?

⁸ Wahnpoaron ko pwurasang ahr doadoahk en kalohk oh irail padahkiong Sises duwen soahng koaros me re wia oh padahngki. Sises mwahngih me sapwellime wahnpoaron ko pwangadahr, ih eri mahsanihong irail en patohdo reh oh “kommoal.” Irail eri ketidahng pohn pwoht pwe re en kohla kalapwukala wasa kis. Aramas ako pil pwakih irail pidakih keilen pihlo oh lella rehrail. Dahme Sises wia? “E ahpw mahsanihda lapalahn pokon ehu, e ahpw ketin kupwurohkinirailla, pwe re rasehng pelin sihpw ehu me sohte silepe. Ih eri ketin tapihada kawehwehiong irail soahng tohto.” (Mark 6:31-​34) Ni eh kupwurohkinirailla, e mwekidki en nannantihte oh kalohki Rongamwahu mendahki eh pwangadahr. E sansal me Sises kin poakehla mehlel aramas akan.

9. Dahme kitail sukuhliki sang Mark irelaud 6 duwen irair pwung me pid duwen kalohk?

⁹ Dahme kitail sukuhliki sang met? Nin duwen Kristian kei, kitail pehm me atail pwukoa iei en kalohki Rongamwahu oh katohnpadahk. Kitail pohnese atail pwukoahn kalohki Rongamwahu, pwehki iei kupwuren Koht me “aramas koaros en ale komourparail.” (1 Timoty 2:4) Kitail kin kalohk kaidehn ihte pwehki kitail pwukoahki, ahpw pwehki limpoak. Ma kitail limpoakohng aramas akan duwehte Sises, mongiongatail kin kamwekid kitail en wia wen me kitail kak pwe kitail en kak pousehlahte oh ehukihong irail Rongamwahu. (Madiu 22:39) Ahneki soangen ineng wet kin kamwekid kitail en pousehlahte oh kalohki Rongamwahu oh sohte uhdihsang.

Rohng me Kitail Wah​—Rongamwahu en Wehin Koht

10, 11. (a) Iaduwen Aiseia kawehwehda duwen rohng me kitail kin kalohki? (b) Iaduwen Sises wahdo Rongamwahu duwen mehkot me mwahu sang, oh iaduwen irail sapwellimen Koht ladu kan en rahnpwukat kin kahlemengih mehn kahlemeng mwahu en Sises?

¹⁰ Ia kahrepe keriau me kitail kin kalohk? Dahme kitail kin kalohki? Soukohp Aiseia kawehwehda ni kaselel ire wet me kitail kin kalohki: “Meid lingan oh kaselel atail udiahl meninkeder men ni eh kin kotehdo nahna kan wa kohdo rongamwahu, rongamwahu en popohl! E pakairki duwen manaman en powehdi, oh ndaiong Saion, ‘Omwi nanmwarki, iei Koht!’ ”​—Aiseia 52:7.

¹¹ Ire kesempwal nan ireo, “Omwi nanmwarki, iei Koht,” katamankihong kitail me kitail anahne kalohki duwen Rongamwahu en Wehin Koht. (Mark 13:10) Kitail en tehk kanahieng me Koht kin kasalehda rohng mwahu duwen rohng me kitail kin kalohki. Aiseia doadoahngki lepin lokaia kan me duwehte “komourala,” “rongamwahu,” “popohl,” oh “mehkot me mwahusang.” Pahr epwiki kei mwurin Aiseia, nan senturi keieu C.E., Sises Krais kapwaiada kokohp wet ni eh wiahda mehn kahlemeng mwahu ni eh kin pwerisek ong kasalehda duwen rohng en mehkot me inenen mwahu​—ketidohn sapwellimen Koht Wehi. (Luk 4:43) Nan rahn pwukat, sangehr pahr 1919, Sounkadehdehn Siohwa kan kin idawehn mehn kahlemeng en Sises ni arail kin pwerisekiong kalohki duwen Wehin Koht me kokoudahr oh kapai kan me e pahn ketikihdo.

12. Iaduwen Rongamwahu en Wehio kin kamwekid irail akan me kin rong?

¹² Iaduwen Rongamwahu en Wehio kin kamwekid irail akan me kin men rong? Rahnwet duwehte ni mwehin Sises, Rongamwahu wet kin kihda koapworopwor oh kamweit. (Rom 12:12; 15:4) E kin kihong irail akan me nan mongiong mehlel koapworopwor pwehki mie kahrepen irail en kamehlele me mie soahng mwahu kan nan ahnsou kohkohdo. (Madiu 6:9, 10; 2 Piter 3:13) Soangen koapworopwor wet kin kahrehiong irail akan me lahn Koht en kak kilangwohng mehkot mwahu. Sounmelkahkaho ntingihdi me irail “sohte kin masak rong rohng suwed akan.”​—Melkahka 112:1, 7.

Rohng Ehu me Pahn “Kansenamwahuihala me nan Kapehd Toutoulahr akan”

13. Iaduwen soukohp Aiseia kin kawehwehda soangen kapai kan me kin kohieng irail akan me kin alehda Rongamwahu?

¹³ Rongamwahu me kitail kin kalohki kin wahdo kamweit oh kapai ong irail akan me kin rong. Iaduwe? Soukohp Aiseia kasalehda ekei kapai pwukat ni eh kohpada: “Ngenen Kauno [“Siohwa,” NW] ketier rehi. E ketin keieiedier pwe I en lohkiong me opampap kan Rongamwahu, pwe I en pirehdi loalen me loal ohlahr kan, I en lohkiong me sensel kan ar saledek oh saledek ong irail kan me mihmi nan imweteng. E ketin poaroneiehdo pwe I en lohkihda duwen ahnsou me Kauno pahn ketin komourala sapwellime aramas akan, oh ketin kalowehdi ar imwintihti kan. E ketin poaroneiehdo pwe I en kaloalamwahwihala koaros me kin pahtou kan.”​—Aiseia 61:1, 2, NW; Luk 4:16-​21.

14. (a) Dahme lepin mahsen “kansenamwahuiala me nan kapehd toutoulahr” kin kasalehda duwen Rongamwahu en Wehio? (b) Iaduwen atail kin kasalehda duwen sapwellimen Siohwa pepehm ong me nan kapehd toutoulahr akan?

¹⁴ Nin duwen me kokohpo kasalehda, ni eh kin kalohki Rongamwahuo, Sises kin “pirehdi loalen me loal ohlahr kan.” Ia uwen sansal kawehwe wet me Aiseia doadoahngki! Ehu dictionary en Pwuhk Sarawi kawehwehda me lepin lokaiahn Ipru me kawehwehda ‘pirehpene’ kin kalapw doadoahk ong mehn ‘pirehdi’ ohla me wini kin kohieng pwehn sewese kamwahuiala ohlao. Nurse emen me kin nsenohki soumwahu men kin pirehpene en soumwahu men eh ohla pwehn kak sewese ih. Ni ahlohte, ahnsou me emen sounkalohk me nsenohkin kalohk, e kin sewese irail me men rong kan me kin lokolok en ale kamweit. Oh ni ahr kin sewese me anahne sawas, irail kin kasalehda sapwellimen Siohwa nsenoh. (Esekiel 34:15, 16) Sounmelkahkaho kasalehda duwen Koht: “E ketin kamwahwihalahr me nan kapehd ohlahr akan oh ketin kidimpenehr ar ohla kan.​—Melkahka 147:3.

Iaduwen Rongamwahu en Wehio kin Kamwekid Aramas akan

15, 16. Soangen karasepe dah kan me kasalehda iaduwen Rongamwahu en Wehio kin sewese oh kakehle irail akan me anahne sawas?

¹⁵ Mehn karasepe tohto kin kasalehda iaduwen Rongamwahu en Wehio eh kin sewese oh kakehla irail akan me kin nsensuwedla. Medewehla Oreanna, emen lih mah nan South Amerika, me solahr inengieng en mour. Emen lih Sounkadehdehn Siohwa tepidahr pwarek Oreanna oh wadekohng ih Pwuhk Sarawi oh sawasepen Pwuhk Sarawi me oaralap koasoia Nei Pwuhk en Poadoapoad kan en Paipel.b Nin tepio, lih nsensuwedo kin kihpenehte meseho oh wonohn nan eh peht oh kin kalapw esingek suwedki eh nsensuwed. Ahnsoukis mwuri, e kakehr mwohdada nan dewe ahnsoun wadawad. Ahnsoukis mwurin mwo, e kin tepiadahr mwohdada pohn sehr nan imweo pwehn awih sounkasukuhl en Pwuhk Sarawi. Mwuri, liho tepidahr iang mihding en Kristian akan nan Kingdom Hall. Ni eh mwekidkihdahr dahme e sukuhlkihdi nan mihding pwukat, e tepiadahr kihseli makisihn kan ong sohte lipilipil me kin keid limwahn imweo. Eri, ni eh mahkiher sounpar 93, Oreanna papdaislahr nin duwen Sounkadehdehn Siohwa men. Rohngen Wehio sewese ih en pil ehu men mour.​—Lepin Padahk 15:30; 16:24.

¹⁶ Rohng en Wehio kin pil inenen sewese irail akan me esehier me ahr mour mwotomwotalahr pwehki soumwahu. Karasepe mwahu iei duwen Maria sang palimese en Iurop. E kin kohwahki soumwahu laud oh sohlahr ah koapworopwor. Ahnsou me Sounkadehdehn Siohwa kan tuhwong ih, e kin inenen nsensuwed laud. Ahpw, ahnsou me e sukuhlikier duwen kupwuren Koht akan, e pehmier me mie katepen eh mour. E papidaislahr oh kin inenen pwerisek nan doadoahk en kalohk. Kaimwiseklahn sounpar riau me e kin momourki, pohn mese kin kasalehda duwen eh koapworopwor oh peren. Maria mehla ni eh ahneki koapworopwor kehlail en pwurehng kaiasada.​—Rom 8:38, 39.

17. (a) Iaduwen rohngen Wehio kin wekidala mour en irail akan me alehda? (b) Nan soangen ahl dah kan me pein kowe kin pehm en Siohwa “kin ketin pwekada irail akan me kin pwupwudi”?

¹⁷ Soangen ripoht pwukat kasalehda soangsoangen ahl akan me rohngen Wehio kin sewese irail akan me kin inengien sukuhliki padahk mehlel en Pwuhk Sarawi. Irail akan me kin pahtoukihlahr melahn kompoakeparail akan kin kehlailkihda ahr wehwehkilahr duwen koapworopwor en kaiasada. (1 Deselonika 4:13) Irail akan me semwehmwe oh kin apwalki kamwenge ahr peneinei kin ahneki wahu oh kehl ni ahr kin sukuhliki me Siohwa sohte pahn ketin melieirailla ma irail pahn lelepek ong Ih. (Melkahka 37:28) Ki sapwellimen Siohwa sawas, irail akan me kin pahtoula kin pwurehng kehlailda oh pil ahneki kehl en powehdi ahr soumwahu. (Melkahka 40:1, 2) Ihme pwehki kehl me kin kohsang sapwellime Mahsen, ahnsouwet Siohwa “kin ketin pwekada irail akan me pwupwudi.” (Melkahka 145:14) Ni atail kin kilang duwen Rongamwahu en Wehio eh kin sewese me pahtoulahr akan me mih nan atail wasahn kalohk oh pil mwomwohdisohn Kristian akan, e kin pwurehng katamankihong kitail me kitail kin wah rohng me keieu kaselel nan rahn pwukat!​—Melkahka 51:17.

“Ei Ngidingid Kapakap ohng Koht Pwehki Irail”

18. Iaduwen Pohl mwekidki en irail mehn Suhs akan me sohte men alehda Rongamwahu, oh pwekida?

¹⁸ Mendahki kitail kin wah rohng me keieu kaselel, me tohto kin soikala. Iaduwen met en kamwekid kitail? Soangen ahlohte me wahnpoaron Pohl mwekidki. E kin kalapw kalohk ong mehn Suhs akan, ahpw pali laud en irail kin sohte men rong mahsen en kamour wet. Arail sohte men rong kin inenen kamwekid Pohl. E wehkada: “Ia uwen medek poatopoat me mi nan mohngiongiet.” (Rom 9:2) Pohl kin poakpoake irail mehn Suhs akan me e kin kalohk ong. E kin nsensuwedkihla ahr sohte kin men rong Rongamwahu.

19. (a) Dahme kahrehda e wehwe kahrepen atail kin nsensuwedla ekei pak? (b) Dahme sewese Pohl en kak pousehweite nan doadoahk en kalohk?

¹⁹ Kitail pil kin kalohki Rongamwahuo pwehki atail limpoak. Kahrehda, e kin wehwe kahrepen atail kin nsensuwedla ahnsou me aramas akan kin soikala rongen Wehio. Soangen pepehm wet kin kasalehda me kitail uhdahn nsenohki pali ngehn en irail akan me kitail kin kalohk ong. Ahpw, kitail anahne tamataman mehn kahlemeng mwahu en wahnpoaron Pohl. Dahme sewese ih en kak pousehla nan doadoahk en kalohk? Mendahki mehn Suhs akan sohte men rong oh kahrehiong en nsensuwed oh medek, met sohte kihsang en Pohl koapworopworki me e pahn kak sewese irail. E koapworopworkihte me miehte irail akan me kak pwosonla Krais. Ihme kahrehda, Pohl ntingihdi duwen eh pepehm ong mehn Suhs akan: “Eri, riei ko, ia uwen ei ngoangki sang nan mohngiongi unsek pwe riei mehn Suhs akan en mourla! Ia uwen ei ngidingid oh kin kapakapkin irail rehn Koht!”​—Rom 10:1.

20, 21. (a) Me pid duwen atail doadoahk en kalohk, iaduwen kitail kak kahlemengih mehn kahlemeng mwahu en Pohl? (b) Soangen ire dah me pid atail kalohk me kitail pahn tehkpene nan artikel en mwurin met?

²⁰ Tehk soahng riau me Pohl kasalehda wasaht. Pohl kin ngoangki sang nan mohngiong unsek me ekei irail pahn kak komourala oh e kin ngidingidki kapakapkin irail rehn Koht. Rahnpwukat, kitail pil kin kahlemengih mehn kahlemeng mwahu en Pohl. Kitail kin ngoangki sang nan mohngiongatail me miehte irail akan me pahn kak mwekidki Rongamwahuo. Oh kitail kin kaukaule kapakapkihong Siohwa kitail en kak diar irail aramas akan oh sewese irail en kak idawehn ahl me kak kahluwalahng kamour.​—Lepin Padahk 11:30; Esekiel 33:11; Sohn 6:44.

²¹ Ahpw, pwe kitail en kak kalohk ong uwen me kitail kak koaros duwen Rongamwahu en Wehio, kitail anahne tehk kanahieng kaidehn ihte kahrepe oh dahme kitail kin kalohki ahpw pil iaduwen kitail kin kalohk. Kitail pahn tehkpene ire wet nan artikel en mwurin met.

[Nting tikitik me mi pahs]

Dahme Ke Sukuhlkier?

• Ia kahrepe kan me kitail kin iang kalohk?

• Ia rohng me keieu kesempwal me kitail kin kalohki?

• Soangen kapai dah kan me irail akan me kin alehda Rongamwahu en Wehio kin alehdi?

• Dahme pahn sewese kitail en pousehlahte nan atail doadoahk en kalohk?

[Kilel nan Pali 12]

Rohng en Wehio kin kakehle me nan kapehd toutoulahr akan

[Kilel nan Pali 13]

Kapakap kin sewese kitail en dadaurete nan atail doadoahk en kalohk