Kapai Kan Me Kin Kohsang Alehda Rongamwahu

“Ngehnen Kauno ketier rehi. E ketin keieidier pwe I en lohkiong me opampap kan Rongamwahu, I en kansenamwahuwihala me nan kapehd toutoulahr akan,. . . oh kaloalamwahwihala koaros me kin pahtou kan.”​—AISEIA 61:1, 2, New World Translation.

1, 2. (a) Dahme Sises kasansalehda duwen pein ih, oh iaduwen e kin wia met? (b) Rongamwahu me Sises kalohkiseli kin kihong aramas kapai dah kei?

RAHNEN Sapad ehu, ni ahnsou me Sises tepin wia eh doadoahk en kalohk, e ketiket nan sinakoke ehu me mih nan Nasaret. Nin duwen me ntingihdi, “eri pwuhken soukohp Aiseia me re patohwanohng, oh e ahpw pahkpeseng pwuhko oh wadekada wasa me ketihtihki: ‘Ngehnen Kauno ketier rehi, e ketin keieiehdier pwe I en kapahrengkihong me opampap kan Rongamwahu.’ ” Sises eri pousehla wadek kokohp wet. E ahpw ketidiong nan mwoale oh mahsanih: “Rahnwet mahsen en Pwuhk Sarawi, duwen amwail karongeier, pweidahr mehlel rehtail.”​—Luk 4:16-​21.

² Sang ni e ketin wia met, Sises kasalehda me pein ih me mih nan kokohpo me wia sounkalohki Rongamwahu, oh ih me kin kamweitihala aramas pahtou kan. (Madiu 4:23) Sapwellimen Sises Rongamwahu me inenen mwahu! E padahkiong aramas akan me kin rong eh padahk kan: “Ngehi me marain en sampah. Mehmen me pahn idawehniehdo pahn ahneki marain en mour, oh sohte pahn weweid nan rotorot.” (Sohn 8:12) E pil mahsanihiong irail: “Ma kumwail pahn peikiong ei padahk kan, kumwail uhdahn pahn wiahla nei tohnpadahk mehlel.” (Sohn 8:31, 32) Ei, sapwellimen Sises mahsen kan “iei mahsen en mour soutuk.” (Sohn 6:68, 69) Marain, mour, saledek​—soahng pwukat kin wia kapai kan me kitail kin inenen kesempwaliki!

3. Rongamwahu dahieu me sapwellimen Sises tohnpadahk kan kin kalohkiseli?

³ Mwurin Pendekos 33 C.E., irail tohnpadahk ko pousehla wia sapwellimen Sises doadoahk en kalohk. Re kin kalohki “Rongamwahu en Wehio” ong rehn mehn Israel akan oh pil rehn aramas akan en nan wehi kan. (Madiu 24:14; Wiewia 15:7; Rom 1:16) Aramas akan me kin mwekidkihda rongamwahu wet kin sukuhliki oh esehla Siohwa Koht. Re saledeksang pelien lamalam kan me kin mwomwen kaliduwih irail oh irail uhd wiahla kisehn wehi kapw ni pali ngehn iei “Israel en Koht” oh arail towe kan kin ahneki koapworopwor en iang arail Kaun, Sises Krais kaunda sang nanleng kohkohlahte. (Kalesia 5:1; 6:16; Episos 3:5-7; Kolose 1:4, 5; Kaudiahl 22:5) Mehlel​—⁠mehpwukat kin wia kapai kan me kesempwal mehlel!

Doadoahk en Kalohk Nan Rahn Pwukat

4. Iaduwen doadoahk en kalohkiseli Rongamwahu kin pwepweida nan rahnpwukat?

⁴ Rahnwet, irail Kristian me keidi kan kin pousehla kapwaiada kehkehlik en kokohp wet me kohsang rehn Sises, oh “pokon kalaimwun” en “sihpw teikan,” me wia tohtohla kin pil sewese irail wia doadoahk wet. (Kaudiahl 7:9; Sohn 10:16) Imwikihla met, doadoahk en rongamwahu wet kin wia me keieu kehlail nan rahnpwukat. Nan sahpw 235, Sounkadehdehn Siohwa kan kin “lohkiong me opampap kan rongamwahu . . . , kansenamwahuwihala me nan kapehd toutoulahr akan, lohkiong me sensel kan ar saledek oh saledek ong irail kan me mihmi nan imweteng, oh re kin lohkihda duwen ahnsou me Kauno kin ketin luhke aramas akan ong kupwure, oh ketin kalowehdi ar imwintihti kan, oh kin kaloalamwahwihala koaros me kin pahtou kan.” (Aiseia 61:1, 2, NW) Ihme kahrehda, doadoahk en kalohk en Kristian kin kapaiada aramas tohto oh kansenamwahuwihala “irail kan me kin mihla nan soangen apwal koaros.”​—2 Korint 1:3, 4.

5. Me kin pid kalohkiseli Rongamwahu, iaduwen Sounkadehdehn Siohwa kan kin weksang pelien lamalam akan en Kristendom?

⁵ Ni mehlel, ekei pelien lamalam en Kristendom kin wia pein arail doadoahk en kalohk kan. Tohtohn irail kin kadarala arail misineri kan nan sahpw teikan pwehn idingki aramas akan en wekidala arail pelien lamalam. Karasepe ieu, The Orthodox Christian Mission Center Magazine ripohtki duwen wiewia kan en arail misineri kan en sarawi en Orthodox nan sapwen Madagascar, southern Aperika, Tanzania, oh Zimbabwe. Ahpw, nan mwomwohdiso en Orthodox, oh pil duwehte pali laud en pelien lamalam teikan en Kristendom, pali moron en arail tohnmwomwohdiso kan sohte kin iang wia doadoahk en kalohk. Weksang irail, Sounkadehdehn Siohwa kan koaros me inoukihong Koht arail mour kin iang doadoahk en kalohk. Re wehwehki me arail kalohki Rongamwahu kin wia mehn kadehde me kin kasalehda uwen mehlel en arail pwoson. Pohl mahsanih: “Pwe atail pwoson kin tepisang nan kapehditail, oh ihme kitail kin pwungkihla rehn Koht; atail kadehde kin tepisang ni ewetail, oh ihme kitail kin mourkihla.” Pwoson me sohte kin kamwekid emen en wia mehkot, iei pwoson mehla ieu.​—Rom 10:10; Seims 2:17.

Rongamwahu me kin Kihong Aramas akan Kapai kan me Pahn Soutuk

6. Rongamwahu dahieu kin lohkiseli nan rahnpwukat?

⁶ Sounkadehdehn Siohwa kan kin kalohkiseli rohng me keieu mwahu. Re kin pahkpeseng neirail Paipel kan oh kasalehong aramas akan me kin perenki rong me Sises tohnmeteikihla eh mour pwe aramas akan pahn kak pwunglahr rehn Koht, ale mahkpen diparail kan, oh koapworopwor en mour soutuk. (Sohn 3:16; 2 Korint 5:18, 19) Re kin kalohki duwen Wehin Koht tepidahr kaunda nanleng oh Sises Krais me wia Nanmwarki me keidio, oh ni ahnsou keren, e pahn kihsang soahng suwed koaros sang sampah oh pahn apwalih doadoahk me pahn kahrehong sampah en wiahla paradais. (Kaudiahl 11:15; 21:3, 4) Kokohp en Aiseia kin pweida ni ahr kin kehsehkin mehn mparail kan me ni ahnsou wet iei “ahnsou me Kauno pahn ketin komourala sapwellime aramas akan” oh aramas akan pahn kak mwekidki rongamwahu. Re pil kin padahkiong aramas akan me ni ahnsou keren “rahn me Koht pahn ketin kalowehdi ar imwintihti kan” pahn wiawi oh Siohwa pahn kasorehla aramas dipan akan me sohte koluhlahr.​—Melkahka 37:9-​11.

7. Ekspiriens dahieu kin kasansalehda me Sounkadehdehn Siohwa kan kin miniminpene, oh dahme kahrehda irail kin perenki minimin wet?

⁷ Nan sampah wet me kin dirkihla kahpwal akan, ihte rongamwahu wet me kak kihong aramas kapai kan me pahn soutuk. Aramas akan me kin kamehlele rongamwahu wet pahn kin kisehn pirien en Kristian akan me kin miniminpene wasa koaros nan sampah oh irail sohte kin mweidong wekpeseng en arail wehi, keinek, de ma irail kepwehpwe de semwehmwe en kahrehong liaktohrohr en wiawi nanpwungarail. Irail kin ‘kapatahiong soahng pwukat limpoak, pwe ih me kin kapatapene oh oarepene mehkoaros pwe en wiahla ehu ni mehlel.’ (Kolose 3:14; Sohn 15:12) Nan pahr me ahpwtehn nek, nan ehu wehi nan Aperika, limpoak wet me inenen sansalda rehrail. Ni menseng ehu nan poahson kaun en sahpwo, pos me kohsang kesik kan kauwehla meleilei nan kanihmwo. Aramas akan tepida koasoanehdi pwihn ehu me pahn uhwong koperment. Ni ahnsou me irairo wekila oh aramas akan uhd tepida uhwong keinek kan, aramas teikan kin kauwe peneinei en Sounkadehde kan pwehki peneinei wet me apwalihada iengarail Sounkadehde kan me kohsang keinek tohrohr. Peneinei wet sapengki: “Ihte se apwalihada nan ihmwat ni ahnsou wet iei Sounkadehdehn Siohwa kan.” Ong irail, wekpeseng en keinek kan sohte kesempwal; limpoak en Kristian​—⁠sewese mehteikan me anahne sawas​—me kesempwal. Emen me sohte iang Sounkadehde kan ahpw e kin kisahneki peneinei en Sounkadehdehn Siohwa kan koasoia met: “Tohn mwomwohdiso kan en pelien lamalam koaros kin pangala iengarail tohn mwomwohdiso kan. Ihte Sounkadehdehn Siohwa kan sohte kin wia met.” Ripoht tohto sang sahpw akan me kin peipene nanpwungarail kin kasansalehda me Sounkadehdehn Siohwa kan kin ni mehlel “poakohng riarail Kristian kan.”​—1 Piter 2:17.

Rongamwahu kin Kawekila Mour en Aramas akan

8, 9. (a) Wekidekla dah kei kin wiawi rehn aramas akan me kin kamehlele Rongamwahu? (b) Ekspiriens dahieu kin kasansalehda duwen manaman en Rongamwahu?

⁸ Rongamwahu kin pid dahme Pohl mahsanih duwen “atail mour ahnsou wet, oh pil ahnsou kohkohdo.” (1 Timoty 4:8) E sohte kin ihte kihong kitail koapworopwor ong ni ahnsou kohkohdo ahpw pil e kin sewese kitail en kamwahuwiahla “atail mour en ni ahnsouwet.” Sounkadehdehn Siohwa kan kin mweidong sapwellimen Koht Mahsen en kahre irail oh sewese irail en kapwaiada sapwellimen Koht kupwur kan. (Melkahka 119:101) Pein arail irair akan pahn mwomwen kapwla ni ahnsou me re kin kekeirada loalarail kan irair akan duwehte pwung oh lelepek.​—Episos 4:24.

⁹ Medemedewe duwen Franco. E kin kalapw lingeringerda. Ni ahnsou mehkot sohte kin pweida, e kin lingeringerda oh kauwehla dipwisou kan. Eh pwoud kin onop Paipel rehn Sounkadehdehn Siohwa kan, oh arail mehn kahlemeng mwahu kin ekis ekis sewese Franco en wehwehki me pein ih anahne wekila. E tepida onop Paipel rehrail oh mwuhr e doadoahngki nan eh mour wahn ngehn sarawi duwehte popohl oh powehdi ineng suwed kan. (Kalesia 5:22, 23) Ih emen sang rehn aramas 492 me papidaisla nan Belgium nan pahr en kalohk 2001. Pil medemedewe duwen Alejandro. Mwahnakapw menet kin doadoahngki wini suwed ahnsou koaros lao lel irairen eh mour me inenen suwedla e tepida rapahki soangen dipwisou kan koaros nan wasahn kihd ehu pwe e kak netikihla dipwisou pwukat oh pwainda wini suwed. Ni ahnsou me e sounpar 22, Sounkadehdehn Siohwa kan luhke ih en onop Paipel rehrail oh e pwungki. E tepida wadek Paipel rahn koaros oh pil tepida iang towehda mihding en Kristian akan. E mwadang kapwungala ah mour oh ni erein ahnsou ehu me mwotomwot sang sounpwong weneu, e tepida iang doadoahk en kalohk​—ih emen sang aramas meh 10,115 me iang doadoahk en kalohk pahr samwalahro nan Panama.

Alehda Rongamwahu kin Kihong Aramas Opampap akan Kapai Tohto

10. Ihs me kin mwekidkihda Rongamwahu, oh iaduwen arail madamadau kan kin wekila?

¹⁰ Aiseia kohpadahr duwen me Rongamwahu pahn kalohkiseli ong aramas opampap akan. Eri, ihs irail aramas opampap pwukat? Pwuhk en Wiewia kan kin kawehwehda me aramas pwukat “me konehng ale mour soutuk.” (Wiewia 13:48) Aramas aktikitik kan kin kohsang wasa koaros nan sampah oh irail kin mwekidkihda padahk mehlel. Aramas pwukat kin sukuhliki me kapwaiada kupwuren Koht pahn wahdohng aramas akan kapai kan me kesempwal oh mwahusang dahme sampah wet kin kihda. (1 Sohn 2:15-​17) Ahpw, ni ahnsou me Sounkadehdehn Siohwa kan kin wia arail doadoahk en kalohk, dahme re kin wia pwehn kamwekidada mongiong en aramas akan?

11. Nin duwen dahme Pohl ntingihdi, iaduwen kitail pahn kalohkiseli Rongamwahu?

¹¹ Eri, medemedewe duwen mehn kahlemeng mwahu en wahnpoaron Pohl me ntingwong mehn Korint kan: “Riei ko, ni ei pwarowohng kumwail pwe I en kapahrengki ong kumwail kupwur rir en Koht duwen Krais, I sohte doadoahngki lokaia ile oh loalokong laud en aramas. Pwe, ni ei mihmi rehmwail, I lemehda I en manokehla mehkoaros, ahpw I en medemedewehte Sises Krais, ahpw mehlel ni eh pwoula nin tuhkeo.” (1 Korint 2:1, 2) Pohl sohte kin suweiki eh loalokong rehn aramas akan me kin rong eh padahk kan. E kin wia padahk mehlel kan me kin kohsang powe, oh padahk mehlel pwukat kin ntingdier nan Paipel. Pil tehk duwen dahme Pohl kangoange ienge sounkalohk Timoty: “Ke en kalohkiseli mahseno, ke en nantihong koasoakoasoia duwe.” (2 Timoty 4:⁠2) Timoty anahne kalohkiseli “mahseno,” iei sapwellimen Koht mahsen. Pohl pil ntingwong Timoty: “Wia uwen omw kak mwohn silangin Koht, pwe en ketin pwungkin uhk, nin duwen soundoadoahk men me sohte kin namenengki eh doadoahk, me kin padahkihong aramas akan mahsen en Koht ni mehlel.”​—2 Timoty 2:⁠15.

12. Iaduwen Sounkadehdehn Siohwa kan nan rahnwet kin kapwaiada mahsen en Pohl oh kahlemengih eh mehn kahlemeng mwahu?

¹² Sounkadehdehn Siohwa kan kin kahlemengih mehn kahlemeng mwahu en Pohl, oh pil dahme e mahsan ong Timoty. Re kin pohnese duwen manaman en sapwellimen Koht Mahsen oh irail kin doadoahngki mwahu Mahsen wet ni ahr kin kasalehiong mehn mparail kan mahsen konehng kan en kopworopwor oh kamweit. (Melkahka 119:52; 2 Timoty 3:16, 17; Ipru 4:12) Ni mehlel, re kin doadoahngki mwahu sawaspen Paipel kan pwen sewese aramas akan me kin perenki rong en kalaudehla ahr kin ale loalokong en Paipel ni pein arail ahnsou. Ahpw, irail kin ahnsou koaros kasalehong aramas akan iren Paipel kan. Re ese me sapwellimen Koht Mahsen pahn kamwekidada mohngiong en aramas aktikitik kan. Ni ahr kin doadoahngki Mahsen wet pil kin kakehlahda pein arail pwoson.

“Kaloalamwahwihala Koaros me kin Pahtou Kan”

13. Nan pahr 2001, wiewia dah kei me wiawi me kin kahrehong anahn laud ehu ong kihda sawas oh kamweit ong aramas pahtou kan?

¹³ Nan pahr 2001, kahpwal tohto wiawi, oh aramas tohto anahne kamweit oh sawas. Nan September 2001, nan United States, aramas mwersuwed kan me adaneki “terrorist” (lokaiahn wai) kauwehla ihmw kan me adaneki World Trade Center nan kanihmw en New York oh Pentagon me karanih Washington, D.C. Wehio pwon inenen pwuriamweikihla wiewia pwukat! Edetehn wiewia pwukat wiawi, Sounkadehdehn Siohwa kan kin nantihong kapwaiada ahr pwukoa en ‘kaloalamwahwihala koaros me kin pahtou kan.’ Ekei ekspiriens kan pahn kasalehda iaduwen re kin wia met.

14, 15. Ekspiriens riau dah kan kasalehda me Sounkadehde kan kin koahiek ni arail doadoahngki Pwuhk Sarawi pwehn kaloalamwahwihala me kin pahtou kan?

¹⁴ Emen Sounkadehde me kin kaukaule iang doadoahk en kalohk tuhwong lih emen nanial oh idek reh duwen eh madamadau duwen dahme terrorist kan wia. Lih menet tepida sengiseng. E kasalehda me e inenen nsensuwedla oh koasoia me e mentehno en kak sawas. Sounkadehde menet eri padahkiong liho me Koht kin uhdahn nsenohkin kitail koaros, oh e wadek pwuhken Aiseia 61:1, 2. Lih menet kin pwungkihla mahsen pwukat me kin kohsang rehn Koht, oh e pil koasoia me aramas koaros kin pahtoukihla dahme wiawi. E ale doaropwe ehu oh peki rehn Sounkadehde menet en mwemweitla reh.

¹⁵ Sounkadehde riemen iang doadoahk en kalohk, oh ira tuhwong emen ohl me wie doadoahk nan eh sohko. Ira idek rehn ohl menet ma ira kak kasalehong ih mahsen en kamweit kan me kohsang Pwuhk Sarawi kan pwehki kahpwal me ahpwtehn wiawier ni World Trade Center. Ohlo pwungki oh re tepida wadek 2 Korint 1:3-7, oh mahsen pwukat pil audaudkihda iren Paipel wet: “Sawas laud . . . kin sang rehn Krais.” Ohlo kin kalahnganki mehn mpe Sounkadehde kan kin ehukihong aramas teikan sawas pwukat oh e koasoia met: “Koht ketin kapaiada doadoahk kaselel me kumwa kin wia.”

16, 17. Ekspiriens riau dah kei kin kasansalehda duwen manaman en Paipel ong sewese aramas akan me kin pahtoukihla kahpwal akan me wiawi?

¹⁶ Emen Sounkadehde men pwurehng pwurala rehn emen lih me kin perenki rong ahpw e uhd tuhwong nein lih ohl oh brothero kawehwehda me e kin nsenohki mehn mpe kan mwurin kahpwal me ahpwtehn wiawi. Ohlo kin pwuriamweikihla me brothero kin tohnmeteikihla pein eh ahnsou pwehn mwemweitla rehn aramas akan oh tehk ma re anahne sawas. E koasoia me ni ahnsou kahpwal wet wiawi, e kin wia eh doadoahk karanih World Trade Center oh e kilangada dahme wiawi rahno. Ni ahnsou me e idek rehn brothero dahme kahrehda Koht kin mweidong lokolok en wiawi, e tepida wadek iretikitik kan sang Paipel, oh e pil wadek pwuhken Melkahka 37:39, me mahsanih: “Kauno kin ketin doarehla aramas pwung kan oh kin ketin apwalih irail ni ahnsou apwal.” Ohlo, ni kadek, idek rehn brothero duwen ia ire oh eh peneinei, oh e luhke ih en pwurodo reh oh kasalehda me e kalahnganki ah pwerek reh.

¹⁷ Sang rehn aramas kid kei me irail Sounkadehdehn Siohwa kan kin kaloalamwawiahla rahn akan mwurin terrorist kan wiahda kahpwal re tuhwong emen lih ahnsoun me re kohla kalohk ong mehn mparail kan. E inenen lingeringerda dahme wiawiehr oh irail rong kanahieng ni ahnsou me re wadek Melkahka 72:12-​14: “E kin ketin kapitala me semwehmwe kan me kin likweriong, oh pil irail kan me paisuwedlahr oh me lekdekla kan. E kin ketin kupwurkalahngan ong me luwet oh semwehmwe kan; e kin doarehla mouren me paisuwed kan. E kin ketin kapitirailla sang nan arail kehnaudek oh angkehlail kan; e kin ketin kesempwalki ar mour.” Mahsen pwukat kin kihda sawas laud! Liho idek rehn Sounkadehde menet en pwurehng wadek iretikitik pwukat oh e luhke ira nan imwe pwehn kak pousehla arail koasoi ong ih. Imwilahn ara koasoi, liho tepida onop Paipel.

18. Iaduwen emen Sounkadehde sewese aramas akan ni ahnsou me emen peki reh en kapakapkin irail?

¹⁸ Emen Sounkadehde kin doadoahk nan wasahn mwenge ehu me mih nan wasa me aramas tohto me kepwehpwe kin mihmi ie oh aramas pwukat kin kasalehda me re sohte kin perenki rong duwen Rongamwahu en Wehio. Mwurin terrorist kan wiahda kahpwalo, aramas pwukat nan kisin wasahn kousoan wet masapwehkada. Ni soutik en Ni Alem mwurin kahpwalo wiawi, manager en wasahn mwengeo kangoange aramas koaros en pedoila liki oh kolokol kandehla kan, oh ni minit ehu irail pahn nennenla oh medemedewe duwen irail akan me mehlahr. Sounkadehde menet kin kasalehda wahu ong arail pepehm akan, e pil pedoila liki oh nennenla kesinenda ni keilen ahl. Manager menet ese me ohl menet emen Sounkadehdehn Siohwa akan, eri mwurin ahnsoun nennenla nekier, e peki rehn brothero en wiliandi koaros ni kapakap. Sounkadehde menet pwungki wia met. Nan eh kapakap, e koasoia me wasa koaros aramas akan kin pahtoula, ahpw re sohte anahne nsensuwedki laud ni mwomwen sohte arail koapworopwor. E kapakapki duwen ahnsou ehu pahn wiawi me wiewia suwed pwukat sohlahr pahn wiawi oh aramas koaros pahn kak karanih Koht en kamweit ki loalokong pwung me kin kohsang rehn Paipel. Mwurin irail nda “Amen,” manager menet​—iangahki aramas 60 me mih likin wasahn mwenge​—kohla rehn Sounkadehde menet oh kasalehda eh kalahngan, poalehdi ih oh nda me kapakap wet me e rong me keieu mwahu.

Kapai Ehu ong Pwihn en Wasahn Kousoan Akan

19. Ekspiriens dahieu kin kasansalehda me ekei aramas akan kin pohnese duwen koasoandi ileile kan en Sounkadehdehn Siohwa kan?

¹⁹ Nan rahnpwukat, nan wasahn kousoan akan me Sounkadehdehn Siohwa kan kin kousoanla, aramas teikan me kin pil kousoanla wasao kin paiekihda sang rehrail​—nin duwen aramas tohto kin ndinda. Eri, pwihn ehu me kin kasalehda popohl, oh kin mehlel, oh tiahk mwakelekel uhdahn pahn kak wahdohng aramas teikan kapai kan. Nan ehu wehi en Central Eisia, Sounkadehde kan tuhwong emen opiser me kommoal sang eh doadoahk en state security agency. E koasoia me ehu ahnsou e ale pwukoa ehu en tehk ekei pelian lamalam akan. Ni ahnsou e tehk pwihn en Sounkadehdehn Siohwa kan, e inenen pwuriamwekihla duwen ahr kin mehlel oh tiahk mwahu. E kin wadeki ahr pwoson oh arail padahk kan me kin poahsoanda pohn Pwuhk Sarawi kan. Ohl menet pwungki en onop Paipel.

20. (a) Dahme ripoht en wiewia kan en Sounkadehdehn Siohwa kan nan pahr me ahpwtehn nek kasalehda? (b) Dahme kin kasansalehda me mie doadoahk laud ehu me kitail anahne wia, oh iaduwen kitail kin kilangwong atail pwais en doadoahk en kalohk?

²⁰ Kitail kak koasoia duwen ekspiriens kid kei, ahpw sang ekei ekspiriens pwukat me ntingihdi nan artikel wet, e inenen sansal me Sounkadehdehn Siohwa kan me inenen soupisek nan erein sounpar en kalohk 2001.a Re kin koasoiong aramas rar kei, kaloalamwahwiahla irail akan me kin pahtou, oh arail doadoahk en kalohk kin inenen pweida mehlel. Mie aramas 263,431 me inoukihong Koht arail mour oh papidaisla. Nan sampah pwon, nempe en irail sounkalohk kan me kekeirada persent 1.7. Oh pwehki aramas meh 15,374,986 iang towehda Katamanpen Kamatalahn Sises kin kasansalehda me mie doadoahk laud ehu me kitail anahne en wia. (1 Korint 11:23-​26) Eri, kitail en nantihong rapahki irail me opampap akan me kin mwekidkihda Rongamwahu. Pwehki sapwellimen Siohwa ahnsou luhk ong aramas wia langalangte, kitail en pousehla oh kaloalamwahwiahla aramas me “pahtou kan.” Ia uwen katapan mehlel atail doadoahk! Ni mehlel, kitail koaros kin pwungkihla mahsen en Aiseia: “I pahn uhdahn kapinga Siohwa. Ai mour pahn peren pwehki ai Koht.” (Aiseia 61:10) Koht pahn ketin doadoahngki kitail nin duwen e ketin kapwaiada mahsen en kokohp pwukat: “Kauno, Wasa Lapalap, pahn ketin komourala sapwellime aramas akan, duwehte sahpw me kin kawosehda oh kakairada werentuhke kan, oh wehi koaros pahn kapinga ih.”​—Aiseia 61:11.

[Nting tikitik me mi pahs]

Ke Kin Tamataman?

• Iaduwen aramas opampap akan kin kak ale kapai kan me kin kohsang alehda Rongamwahu me Sises kin kalohki?

• Aramas akan kak ale kapai dah kan ma re kin mwekidki doadoahk en kalohk me sapwellimen Sises tohnpadahk kan nan keieun senturi kin wia?

• Iaduwen irail me kin perenki rong kin kak ale kapai kan me kin kohsang alehda Rongamwahu?

• Iaduwen kitail kin kilangwong atail pwais kesempwal en wiahla sounkalohk kan?

[Chart nan Pali 17-20]

2001 SERVICEYEAR REPORT OF JEHOVAH’S WITNESSES WORLDWIDE

(See bound volume)

[Kilels nan Pali 13]

Sounkadehdehn Siohwa kan kin ahnsou koaros tamataman duwen ahr pwukoa en kalohk

[Kilels nan Pali 15]

Aramas akan me kin mwekidki Rongamwahu kin wiahla kisehn pirien en pali ngehn me kin miniminpene wasa koaros nan sampah