Kamweitala Irail Akan Me Kin Pahtoula

“Siohwa keieiedier pwe I en . . . kamweitala irail koaros me pahtoulahr.”​—AISEIA 61:1, 2, NW.

1, 2. Kitail anahne kamweitala ihs, oh pwekihda?

SIOHWA, Koht en soangen kamweit koaros, kin padahkiong kitail en kin nsenoh ni ahnsou me meteikan kin lelohng paiohla. E padahkiong kitail en “kamweitala irail me loal ohla kan” oh en kamweitala irail akan me kin mwahiei. (1 Deselonika 5:14) Ni ahnsou me soangen sawas wet kin mie anahnpe, kitail en kihong irail me iang kitail mih nan atail kaudok. Kitail pil pahn kasalehda limpoak ong irail oko likin tohn mwomwohdiso, pil iangahki irail akan me ele sohte kin kasalehda limpoak ong kitail mahso.​—Madiu 5:43-​48; Kalesia 6:10.

² Sises Krais kin wadek oh doadoahngki audepen mahsen en kokohp wet: “Ngenen Siohwa ketier rehi, pwe e ketin keieiedier pwe I en lohkiong me opampap kan rongamwahu. I en kansenamwahuwihala me nan kapehd toutoulahr akan, . . . oh I en kamweitala irail koaros me pahtoulahr.” (Aiseia 61:1, 2; Luk 4:16-​19) Sangete mahs, irail Kristian me keidi kan en atail ahnsou pohnese me audepen mahsen en kokohp wet pil kin dokedoke irail, oh pil “sihpw teikan” kin perenki iang irail nan doadoahk wet.​—Sohn 10:16.

3. Ni ahnsou me aramas kin idek, “Dahme kahrehda Koht kin ketin mweidohng kahpwal akan en wiwiawi?,” iaduwen kitail kak sewese irail?

³ Ahnsou me apwal kin lel oh aramas akan kin medekla, irail kin kalap idek, “Dahme kahrehda Koht kin ketin mweidohng kahpwal akan en wiwiawi?” Paipel kin sapeng ni sansal duwen peidek wet. Ahpw, ele ahnsou laud anahn pwe aramas emen me sohte kin sukuhliki Paipel en wehwehkihda ni unsek pasapengpen met. Sawas kak kohsang nan pwuhk kan me Sounkadehdehn Siohwa kan kin ntingihada.a Pwehn tepida ahneki kamweit, e kin dehde mwahu me ekei aramas kin kilangete ire kan nan Paipel me duwehte Aiseia 61:1, 2, oh irail ahnekihda kamweitpen loale, pwehki ire wet kin kasalehda sapwellimen Koht kupwur pwe aramas akan en ale kamweitpen loalerail.

4. Iaduwen Sounkadehde men nan Poland a sewese serepein tohnsukuhl men me kin pahtoula, oh iaduwen ekspiriens wet kak sewese iuk en ese sewese meteikan?

⁴ Aramas pwulopwul akan, oh pil iangahki irail me mah kan, anahne kamweit. Serepein pwulopwul men nan Poland lelohng irair en pwunod laud, ih eri peki kaweid sang rehn ienge men. Kompoakepah menet, emen Sounkadehdehn Siohwa kan, eri ni limpoak wia peidek kei pwehn wehwehkihla mwahu ahn serepeino irair me e mihlahr loale, oh e diarada me serepein menet ahneki peidek oh sohte wehwehki mwahu soahng tohto, me duwehte: “Dahme kahrehda suwed ah nohn parala? Dahme kahrehda aramas akan kin ahnekihdi apwal? Dahme kahrehda riei serepein mwoatoro ahneki weikek? Dahme kahrehda mohngiongiet soumwahu? Ahi Sarawi nda me Koht kupwurki met en wiawi. Ahpw, ma iei met me mehlel, I pahn sohla kamehlele Ih!” Sounkadehde menet kapakap ong Siohwa ni mwenginingin oh eri nda: “I perenki omw idek rehi duwen ire wet. I pahn song en sewesehkin uhk.” Serepeino me Sounkadehde nda me mie ah sawehwe kan sangete ni ah seri oh me Sounkadehdehn Siohwa kan me kin sewese ih. E doula oh kawehwehda: “I sukuhliki me Koht sohte kin kaloke aramas akan. E kin poakohng irail, oh kupwurki dahme pahn mwahu ong irail, oh E pahn ketikihdo wekidekla laud ohng sampah ni ahnsou keren. Soumwahu, kahpwal en mahla, oh mehla pahn solahr mie oh aramas peik kan pahn kousoan loale pohn sampah kohkohlahte.” Ih eri kasalehiong serepeino nan Kaudiahl 21:3, 4; Sohp 33:25; Aiseia 35:5-7 oh 65:21-​25. Mwurin koasoakoasoipene werei ieu, serepeino ahpw nda, ni ngilen nsenamwahu: “Met I esehier duwen kahrepen ahi wie momour. I kak pwurodo oh pil tuhwong uhk mwuhr?” Ira eri koasoanehdi ira en onop Paipel pak riau nan ehu wihk.

Kamweit me Koht Kin Ketikihda

5. Ni atail kin kasalehda me kitail iang pahtoukihla kahpwal en meteikan, dahme pahn kak kihda mehn kamweit me mehlel?

⁵ Ni aht kin rapahki kamweitpen meteikan, lokaiahn poakehla me konehng. Kitail kin songen kasalehda atail iang pahtoukihla oh eri kasalehda ni koasoi oh ni ngilen atail koasoia me kitail poakehla irair me aramaso lelohng. Met sohte kin kohsang ni koasoi mwahl. Paipel mahsanih ong kitail me “sang ni atail kanengamah oh sang ni kamweit en mahsen en Pwuhk Sarawi kitail kak ahneki koapworopwor.” (Rom 15:4) Ni atail kin medemedewe mwahu ire wet, kitail kak eri kawehwehda ni ahnsou me konehng duwen Wehin Koht, oh kitail kak kasalehda sang nan Paipel iaduwen Wehin Koht ah pahn kak kamwahuwihala kahpwal akan me kin wiawi ahnsou wet. Ni ahl wet, kitail pahn kak kihda kamweit.

6. Dahme kitail kak sewese aramas en wehwehki pwe irail kak ale kapai kan sang mehn kamweit me kin kohsang Pwuhk Sarawi?

⁶ Pwe aramas emen en kak ale kapai sang kamweit me pwarada wasaht, e anahne en ese Koht mehlelo, soangen Koht dah Ih, oh ia uwen mehlel en sapwellime inou kan. Ni atail kin rapahki en sewese arams emen me saikinte wia sounkaudok en Siohwa men, e pahn mwahu en kawehwehda ire pwukat: (1) Kamweit me kohsang nan Paipel iei sapwellimen Siohwa, me iei Koht mehlel. (2) Siohwa me lapalap sang mehkoaros, Sounkapikpen lahng oh sampah. Ih me Koht en limpoak oh diren limpoak-kadek oh mehlel. (3) Kitail kak ale kakehl pwe kitail en powehdi irair apwal akan me kitail pahn karanih Koht ki atail sukuhliki loalokong pwung sang Mahsen en Koht. (4) Paipel audaudki iren pwuhk kan me kin pid soangsoangen apwal akan me aramas akan kin lelohng.

7. (a) Soangen kamwahu dah me pahn kohsang ni atail pahn kawehwehda me kamweit sang Koht kin “pwilisang rehn Krais”? (b) Iaduwen ke kak kamweitala aramas emen me pepehm me ah apwal akan kin kohsang wiewia suwed akan me e wiadahr?

⁷ Ekei kin kihong irail kan me ese Paipel kamweit ni ahnsou me irail pahtou ni arail kin wadek ong irail 2 Korint 1:3-7. Ni arail kin kasalehda ire pwukat, irail kin kasalehda mahsen oko: “kamweit me kitail kin ale me kin pwilisang rehn Krais.” Iren Paipel wet kak sewese aramas en dehdehkihla me Paipel wia utupen kamweit me kitail kak koapworopworki audepe. E kak wia utupen atail koasoakoasoi, ni ahnsou mwahu kan koaros. Ma aramas emen pepehm me ah apwal akan kin kohsang wiewia suwed akan me e wiadahr, eri kitail kak ndaiong ih me e pahn wia mehn kamweit ieu en ese dahme ntingdi nan 1 Sohn 2:1, 2 oh Melkahka 103:11-​14. Ni ahl wet, kitail kak kihda mehn kamweit me uhdahn kohsang rehn Koht.

Kamweitala Irail me Lelohng Kahpwal Pwehki Wiewia Lemei oh Irail me Lelohng Kahpwal Pwehki Ohlahn Paien Wehi

8, 9. Iaduwen kitail kak kamweitala irail akan me lelohng kahpwal akan pwehki wiewia lemei?

⁸ Mour en aramas million kei kin ohkihla wiewia lemei​—⁠pwehki loallap ar kauwehla kosonned oh loallap nan mahwen. Iaduwen atail kak kamweitirailla?

⁹ Kristian mehlel akan kin kanahieng pwe koasoi de wiewia en dehr mwomwen me irail poupoariki pali ieu nanpwungen irail me kin uhpene kan nan sampah. (Sohn 17:16) Ahpw, ni me konehng, irail kin doadoahngki Paipel en kasalehda me wiewia lemei pwukat me wiawi ahnsou wet sohte pahn wiawi kohkohlahte. Irail kak wadek Melkahka 11:5 pwehn kasalehda iaduwen kupwuren Siohwa ong irail oko me kin perenki wiewia lemei de Melkahka 37:1-4 pwehn kasalehda sapwellimen Koht kaweid en dehr akdupuk mehkot ahpw en likih Koht. Mahsen en Melkahka 72:12-​14 kin kasalehda duwen Solomon Lapalap, Sises Krais, me ahnsou wet kakaun ni ah wia nanmwarki nanleng, oh sapwellime pepehm akan ong aramas me kin lelohng kahpwal sang meteikan me kin lamaih irail.

10. Ma ke kin kousoan wasahkis me wehi kan de keinek kan kin mahwenpene, iaduwen iren Pwuhk Sarawi kan kihda kamweit ong uhk?

¹⁰ Ekei aramas kin lelohng kahpwal tohto pwehki irail kin kousoan wasahkis me wehi kan de keinek kan kin mahwenpene. Irail kin wiahki me mahwen oh apwal akan me e kin kahrehda mwuri kin wia kisehn koasoandi en mour. Ieite koapworopwor me re kak kilang pwehn pitsang apwal pwukat iei en keseulahng ehu wasa tohrohr. Ahpw, pali moron en aramas akan sohte kak keseulahng ehu sahpw tohrohr, oh tohto irail akan me kin song en wia met kin imwikihla mehla. Irail oko me kin keseulahng ehu sahpw tohrohr diar me re kin pitsang soangen kahpwal ahpw uhd lelohng ehu soangen kahpwal tohrohr akan. Melkahka 146:3-6 kak doadoahk wasaht pwehn sewese soangen aramas pwukat pwe ren kihong arail koapworopwor ong mehkot me mwahu sang lippala ehu wasa tohrohr. Kokohp en Madiu 24:3, 7, 14 de 2 Timoty 3:1-5 kak sewese irail en kilangada uhdahn ia wehwehn oh kahrepen irair en kahpwal pwukat me kitail kin lelohng, oh diarada me kitail mihmihier ni kaimwiseklahn imwin koasoandi suwed wet. Soangen iren Pwuhk Sarawi me duwehte Melkahka 46:1-3, 8, 9 oh Aiseia 2:2-4 kak sewese irail en kak diarada me mie koapworopwor mehlel ieu me ahnsou kohkohdo pahn wia ahnsoun meleilei.

11. Mehnia iren Pwuhk Sarawi kan me kamweitala kapehd en lih emen nan West Africa, oh pwekihda?

¹¹ Ni erein ahnsou me mahwen wiewiawi nan West Africa, lih emen tangasang imwe oh dindil pahn leht en kesik kan. Ah mour direkihla masepwehk, nsensuwed oh pahtou laud. Mwuhr, ni ahnsou me ah peneinei mihlahr nan ehu sahpw tohrohr, ah pwoudo (ohlo) lemehda en isikala neira kisinlikou en kapwopwoud, oh ohlo pil kausala ih (liho​—⁠e liseian ahnsowo) oh iangahki neira pwutak emen me sounpahr eisek, pwe e men wiahla padre. Ni ahnsou me e wadekasang rehn aramas emen duwen Pilipai 4:6, 7 oh Melkahka 55:22, oh pil iangahki ekei artikel sang nan Watchtower oh Awake! makisihn kan, e ahpw diarada kamweitpen kapehde oh wehwehkihla ia kahrepen mour.

12. (a) Soangen kamweit dah me iren Pwuhk Sarawi kan kin kihong irail oko me kin ahneki apwal en mwohni? (b) Iaduwen Sounkadehde men nan Asia a kak sewese aramas emen wasao?

¹² Ohlahn paien wehi kin kahpwal mour en aramas tohtohie. Ekei pak, met kin kohsang ni mahwen oh pil apwal akan mwurin mahwen. Ahpw ekei ahnsou, e kin kohsang ni koukouda en kosonned en koperment suwed oh roporop oh likamw akan sang rehn irail akan me ahneki manaman arail kin songen miniminkihpene irail en doadoahngkihla mwohni kan me nein wehi oh pil kin kulihasang ahn aramas teikan pai. Ah ekei aramas uhdahn paisuwed sangete mahs lel met. Soangen aramas pwukat koaros kak diar kamweitpen loalerail ni arail pahn wehwehkihla me Koht inoukihong kitail ni mehlel me e pahn ketin kamweitala irail akan me kin likih Ih oh E ketin inoukihong irail sampah mwahu ieu me pahn wia wasa me aramas pahn perenki pein arail doadoahk. (Melkahka 146:6, 7; Aiseia 65:17, 21-​23; 2 Piter 3:13) Ni ahnsou me emen Sounkadehde nan ehu wasa nan Asia ah rong emen lih me pwapwain ah kepwe nan sidohwa a wie lipilipahnediki apwal en mwohni wasao, e kawehwehiong me met kisehn mehkot me wiewiawi wasa koaros nan sampah. Ira eri koasoia iren Madiu 24:3-​14 oh Melkahka 37:9-​11 oh imwikihla onop Paipel.

13. (a) Ni aramas akan ahr kin pahtoukihla aramas ahr kin inou likamw ong irail, iaduwen atail kak doadoahngki Paipel en sewese irail? (b) Ma aramas akan kin ahneki pepehm me irair suwed akan me re mihlahr loale kin kadehde me sohte Koht, iaduwen ke kak sewese irail?

¹³ Ni ahnsou me aramas akan milahr nan kahpwal erein pahr tohto de pil pwangahkihda rong inou likamw tohto, irail kakete duwehla mehn Israel akan nan Isip me “sang ni nsensuwed” sohla kin men rong mehteikan. (Eksodus 6:9) Ni soangen irair wet, e pahn mwahu en oaralapihada ahl akan me Paipel kak sewese irail en kak powehdi kahpwal akan nan rahnwet oh en pil tehk lidip akan me kin kauwehla irair en mour en aramas tohto. (1 Timoty 4:8b) Ekei kak wiahki irair apwal akan me re mihlahr loale kin kadehde me sohte Koht de Koht sohte katapankin irail. Ke ele kak kasalehiong irail iren Pwuhk Sarawi kan me pahn sewese irail en wehwehkihda me Koht ketikihda elen sawas ahpw me tohto sohte kin men alehda elen sawas pwukat.​—Aiseia 48:17, 18.

Kamweitala Irail me Lelohng Melimel de Rerrer en Sahpw

14, 15. Mwurin aramas mwersuwed akan kauwehla wasakis nan wehi ehu oh aramas tohto mihla nan irair en masepwehkada, iaduwen Sounkahdehdehn Siohwa kan kasalehda me re nsenohkin irail?

¹⁴ Apwal kak wiawi pwehki melimel, de rerrer en sahpw, de luldahn wasa, de pospeseng en wasa ieu. Paiohla kin mih wasa koaros. Dahme kak wiawi pwe en kamweitala kapehden irail me momourte kan?

¹⁵ Aramas anahne ese me mie me kin nsenohkin irail. Mwurin aramas mwersuwed akan kauwehla wasakis nan wehi ehu, aramas tohto mihla nan irair en masepwehkada. Me tohto arail peneinei mehla, aramas akan me kin wia epwelpen peneinei me pil mehla, kompoakparail akan, arail wasahn doadoahk ohla, de soahng kan me re kin kehliki nan arail mour ohsang irail. Sounkadehdehn Siohwa kan kin kihda arail sawas ohng kousoan akan, pil kin kamweit kapehden me pahtoulahr akan, oh kin kihda mahsen en kamweit sang nan Paipel. Me tohto kin inenen perenki oh kapingki madamadau en nsenoh me irail pwukat kin kasalehda.

16. Ni ahnsou me kahpwal laud lelohng wasahkis nan El Salvador, dahme kahrehong kalohk en Sounkadehde kan en pweida mwahu wasao?

¹⁶ Nan El Salvador, rerrer en sahpw laud ehu wiawi nan pahr 2001 oh iangahki engken pwehl oh kemehla aramas tohto. Nein Sounkadehde men nah pwutak me sounpahr 25 oh serepein riemen me wia rien serepein me pwutako inou en pwopwoudiong iang mehla. Ahn pwutako ah nohno oh ahn pwutako inou en pwopwoud mwadangete kihong ara ahnsou en wia doadoahk en kalohki Rongamwahu. Aramas tohto ndaiong ira me Koht me kihsang mour en irail oko me mehla de ekei nda me kupwuren Koht met. Sounkadehde ko eri wadekasang nan Lepin Padahk 10:22 pwehn kasalehda me Koht sohte kin kupwurki aramas en medekla. Irail pil wadek nan Rom 5:12 pwehn kasalehda me aramas akan kin mehla pwehki dihp me irail sohsohki, kaidehn met kupwuren Koht. Ira pil kasalehda mahsen en kamweit me dierek nan Melkahka 34:18, Melkahka 37:29, Aiseia 25:8, oh Kaudiahl 21:3, 4. Aramas akan kin rongorong kanahieng, ahpw mehlel pwehki lih riemen pwukat ara peneinei iang mehla nan irair apwal, oh aramas tohto tepida onop Paipel.

17. Ni irair apwal akan kin lelohng aramas akan, soangen sawas dah me mwahu kitail en kihong irail?

¹⁷ Ni irair apwal akan arail kin lelodo, ke kak tuhwong aramas emen me pahn anahne sawas en paliwar ahnsou karuwaru. Met pahn kak wehwehki ekerodo toahkte, de sewesehlahng ni imwen wini, de en sawaski mwenge de wasahn kousoan. Nan 1998, ni soangen apwal wet lelohng wehin Italy, sounwia nuhs men kasawihada me Sounkadehdehn Siohwa kan “kin mie arail koasoandi tohrohr, oh kin sewese irail akan me mih nan apwal akan, oh sohte kin lipilipilki mehnia pelien lamalam me aramas me mih nan apwal akan kin iang towetowe.” Nan ekei wasa pwukat, kokohp akan me pid imwin rahn akan kin kahrehdo apwal laud. Nan wasa pwukat, Sounkadehdehn Siohwa kan kin kadehdehda duwen pweidahn kokohp en Paipel pwukat, oh irail kin kihda kamweit ong aramas akan ki inou en Paipel me pid me Wehin Koht pahn wahdo popohl mehlel ong aramas akan.​—Lepin Padahk 1:33; Maika 4:4.

Kamweitala Irail akan me Emen Tohn Arail Peneinei Mehlahr

18-20. Ni ahnsou me mie mehla nan peneinei ieu, dahme ke kak wia de nda pwehn wahdo kamweit ong irail?

¹⁸ Rahn koaros, aramas kin sengisengki mehlahn aramas akan me re kin poakpoake. Ele ke kak tuhwongada soangen aramas pwukat ni ahnsou me ke iang kalohk, de ni ahmw wiewiaseli kedirepw teikan. Eri, dahme ke kak nda de wia pwehn kamweitala kapehderail akan?

¹⁹ Iaduwen​—⁠aramaso kin mihmihte nan eilepen ah pahtou? Aramas pahtou kan kin pokopokonte nan imwarail akan? Ele mwein soahng tohto me ke men koasoia, ahpw ese lamalam ong dahme ke pahn koasoia wia mehkot kesempwal. (Eklesiasdes 3:1, 7) Nan soangen ahnsou pwukat, e konehng en kasalehda ahmw iang pahtoukihla apwalo oh kihong irail kisin pwuhk de doaropwe (brochure, makisihn de tract) en kawehwe Paipel me konehng irairo, oh kahpw pwurodo mwurin rahn kei en diarada ma mie sawas me ke kak sawaski sang nan doaropweo de pwuhko. Ni ahnsou me konehng, idek ma ke kak ehukihong irail mahsen en kamweit sang nan Paipel. Met pahn kameleilei oh kamwahuwihala medek nan kapehderail. (Lepin Padahk 16:24; 25:11) Ke sohte kak kaiasada me melahro, duwehte me Sises wia. Ahpw, ke kak ehukihong aramaso dahme Paipel mahsanih me pid irair me irail me melahr akan mihmi loale, ahpw mehlel, mwein e sohte wia ahnsou mwahu en kapwungala arail madamadau sapwung kan ahnsowo. (Melkahka 146:4; Eklesiasdes 9:5, 10; Esekiel 18:4) Kumwa kak wadekpene inou kan en Paipel me pid duwen iasada. (Sohn 5:28, 29; Wiewia 24:15) Kumwa kak koasoakoasoia ia wehwehn ire pwukat, oh ele doadoahngki ripoht en ehu kaiasada me kileledi nan Paipel pwe en wia mehn kadehde. (Luk 8:49-​56; Sohn 11:39-​44) Oh pil, ke kak koasoia duwen irair kaselel kan en Koht limpoako me kin ketikihong kitail koapworopwor kaselel. (Sohp 14:14, 15; Sohn 3:16) Kawehwehda iaduwen padahk pwukat ahr kin kihong uhk kamweit oh kamwahu oh dahme kahrehda ke kamehlele inou pwukat.

²⁰ Luhke aramaso en iang towehda mihding nan Kingdom Hall oh wasao e kak tuhwong aramas akan me uhdahn poakohng mehn mparail akan ni mehlel oh kin ese kakehlaka emen emen. Lih emen nan Sweden diarada me ih met me e kin wie raparapahki erein eh mour.​—Sohn 13:35; 1 Deselonika 5:11.

21, 22. (a) Ma kitail men kamweitala aramas teikan, dahme kitail anahne wia? (b) Iaduwen omw pahn kihda kamweit ong aramas akan me esehier mwahu iren Pwuhk Sarawi kan?

²¹ Ni ahmw esehier me aramas emen ahneki pahtou, e sohte lipilipil ma ih tohn ahmw mwomwohdiso de e sohte kin iang sarawi, ke kin ekei pak sehse dahme ke pahn nda de wia? Lepin lokaiahn Krihk me kin wehwehki “kamweit” nan Paipel kin wehwehki “likwerihodo emen ong pali me ke mihmi ie.” Met wehwehki me ma ke men wia soun kamweit mehlel men, ken kihda pein kowe pwe aramas me pahtouo en mengeiong diar uhk oh ale ahmw sawas.​—Lepin Padahk 17:17.

²² Ah iaduwen ma aramas me ke men kihong kamweit esehier mwahu iren Pwuhk Sarawi kan duwen mehla, duwen tomw, oh duwen iasada? Ni mehlel, pwaralahngete rehn kompoakpahmw men me kumwa ahnekipene pwoson tehieu kin kak wia mehn kamweit. Ma e men koasoi, wia soun rongorong mwahu men. Ke dehr ahneki pepehm me ke anahne wia padahk. Ma iren Paipel kan kin wadawad, wiahki ire pwukat mahsen sang Koht me kin kakehlailih mohngiongamwa kan koaros. Kasalehda me kumwa koaros uhdahn kamehlele inou kan me mih nan iren Paipel pwukat. Ni ahmw pahn kasalehda limpoak oh ehukihong meteikan mahsen kesempwal akan me mih nan Mahsen en Koht, ke kak sewese irail akan me mih nan irair en pahtou en ale kamweit oh kehl sang “rehn Koht me utupen kamweit koaros,” Siohwa.​—2 Korint 1:3.

[Nting tikitik me mi pahs]

Ia Ahmw Pasapeng?

• Aramas tohto kin nda me ihs me kihdo kahpwal akan, oh iaduwen kitail kak sewese irail?

• Iaduwen atail kak sewese meteikan pwe irail en alehdi kapai unsek sang sawas en kamweit me Paipel kin kihda?

• Soangen irair dah kan me kin wahdo pahtou ong aramas tohto nan amwail wasa, oh iaduwen omw kak kihong irail kamweit?

[Credit Line]

Refugee camp: UN PHOTO 186811/J. Isaac

[Kilel nan Pali 30]

Ni ahnsou me aramas akan kin lelohng apwal, e pahn mwahu en kamweitala irail