Kamweit ong me Loal Ohla kan
1 Sohte ehu ahnsou nan poadopoad en aramas me anahnepen kihda kamweit inenen laud duwehte nan ahnsouwet. Pwehn idawehn kahlemeng en atail Nanmwarki, Krais Sises, kitail pil kin nantihong pwe kitail en “kansenamwahwihala me nan kapehd toutoulahr akan.”—Ais. 61:1.
2 Elen Wia Met: Pwehn kihda kamweit ong aramas akan ahnsoun kalohk, kitail anahne wia padahk kan me kin kihda mehn kangoang. Ni atail sohte pahn kin nohn koasoakoasoiahte duwen soahng suwed kan me kin wiawi sampah oh sapwung en padahk likamw kan, ahpw ih me kitail pahn keieu koasoia laud nan atail padahk iei duwen padahk mehlel me kin kohsang iren Paipel kan oh duwen soangen koapworopwor kaselel kan me Koht ketin inoukihda. Met sohte wehwehki me kitail sohte pahn koasoia duwen Armakedon. Pahngok me kohwong kitail en kalohki iei duwen “ahnsou me KAUN-O pahn ketin komourala sapwellime aramas akan, oh ketin kalowehdi ar imwintihti kan,” oh en padahkiong aramas suwed men “en wekidala eh mour suwed.” Ahpw kitail en dehr mweidohng padahk en Armakedon oh kawehwehpen soahng kan me pahn sohrala en wia ire me keieu kesempwal nan atail padahk me pahn kahrehda madamadau en me rongorong kan en uhlahng ekei ire tohrohr kan likin oaralap me keieu kesempwal nan atail padahk me iei “rongamwahu en wehin Koht.”—Ais. 61:2; Esek. 3:18; Mad. 24:14.
3 Sang Ihmw Lel Ihmw: Kitail kin kalapw tuhwong aramas akan me kin inenen nsensuwed pwehki soumwahu, mehlahn kompoakparail men, kapwung sapahrek, de kahpwal en mwohni oh dipwisou kan. Nin duwen sounidawehn Krais kei, kitail kin “kupwurehla” oh kasalehda atail iang poakehla irail kan me kitail kin tuhwong nan atail wasahn kalohk. (Luk 7:13; Rom 12:15) Mehnda ma kitail wadekohng tohnihmwo ehu de riau iren Paipel kan me pid duwen arail kahpwalo, kitail anahne kasalehda me kitail kin “nan kapehd mwadang ong rong,” pwehn kak mweidohng aramaso en kak kasalehda eh pepehm kan. (Seims 1:19) Ni atail pahn rong mahs, kitail pahn kak onopada mwahu en kak kihda mehn kamweit.
4 Ni ahnsou me konehng, kitail kak nda, “I men ehukihong uhk ehu iren kangoang me kohsang nan Paipel.” Ke anahne wia tenek mwahu pwe ken dehr nantihong kapwungala iren madamadau sapwung kan koaros me aramaso ele pahn kasalehda. Ahpw ihme kitail pahn nantihong wia iei en kihda iren kangoang oh kamweit kan ni atail pahn kin doadoahngki iren Paipel kan pwehn kak lel nan arail mohngiong. Me pid met, ele e pahn mwahu ma ke doadoahngki Reasoning From the Scriptures (Kawehwe Sang Pwuhk Sarawi) pali 117-121 pahnangin oaralap “Mehn Kangoang.” De ke kak pil kihong tohnihmwo doaropwe me oaralape koasoia Kamweit ong me Pahtou oh kasalehda ekei iren kangoang kan me mih loale.
5 Rapahki Ahnsou Mwahu en Kamweit Meteikan: Mie mehn mpomw, tohndoadoahk, tohnsukuhl, de tohn ahmw peneinei me anahne ale iren kamweit? Dahme ke sou wiahki ahmw mehn akadei ke en pwarala rehn irail pwukat ni imwarail pwe ken kak ehukihong irail iren kamweit kan me kin dierek sang iren Paipel? Ni ahmw pahn wehwehki kahrepen arail anahne mehn kamweit, ke kak onopada ong soangen irairo. Pwehn kak kihda mehn kamweit, ekei kin ntingihda kisin likou kan de pil koasoi nan telephone. Limpoak mehlel ong mehn mpatail kan pahn kamwakid kitail en kasalehda atail pepehm en limpoak oh kihda iren kamweit me anahn akan me kin dierek nan iren Paipel kan.—Luk 10:25-38.
6 Ei, pahngok kohwong kitail en kamweitala irail akan me wie sengiseng, kaperenihada irail akan me nsensuwedla, oh kasalehiong irail duwen kamwahu kan me mih mwohtail. Iei soangen mehn kamweit pwukat me aramas akan nan sampah anahne. Atail pahn kin pereperen oh koasoakoasoia duwen soahng mwahu kan me Koht inoukihda kin wahdo kamweit oh koapworopwor ong me nan mohngiong mehlel kan. Kitail en ahnsou koaros tamataman duwen anahnepen “kansenamwahwihala me nan kapehd toutoulahr akan.”—Ais. 61:1.