Dahme Kahrehda Kitail Kin Pwurehng Pwurala
1. Soangen peidek dahieu me pwarada me pid atail doadoahk en kalohk?
1 Nan wasa tohto, kitail kin kalapw kohla kalohk ie. Kitail kin pwurehng pwurala ni ihmw akan, mendahki tohnihmwo mwein nda me e sohte men rong. Dahme kahrehda kitail pwuralahte rehn irail akan me sohte men rong rahn teio?
2. Ia kahrepe keieu kesempwal me kitail kin nsenohki doadoahk en kalohk?
2 Limpoak ong Siohwa oh meteikan: Kahrepe keieu kesempwal me kitail kin nsenohki atail doadoahk en kalohk iei atail limpoak ong Siohwa. Mohngiongatail me kamwekid kitail en pousehlahte koasokoasoing meteikan duwen atail Koht lapalap. (Luk 6:45) Atail limpoak ong Siohwa padahkiong kitail en peikiong sapwellime kosonned akan oh sewese meteikan en pil wia duwehte. (Lepin Padahk 27:11; 1 Sohn 5:3) Atail loalopwoat ong doadoahk wet sohte kin poahsoanda pohn ia mwomwen aramas kin mwekidki. Ni ahnsou me Kristian kan nan keieun senturi lelohng kalokolok, irail doulahte kalokalohk “sohte uhdi.” (Wiewia 5:42, NW) Ni ahnsou me aramas kahng rong, dehr mweidohng met en kaluwete kitail, ahpw kitail en kesihnenda teng, kasalehda ia uwen laud en atail limpoak oh loalopwoat ong Siohwa.
3. Iaduwen limpoak ong aramas akan pahn sewese kitail en wonoweite kalokalohk?
3 Kitail pil kin nannanti pwehki atail limpoak ong mehn mpatail kan. (Luk 10:27) Siohwa sohte mwahuki emen en lekdekla. (2 Piter 3:9) Pil nan wasa kan me kitail kin kalapw kalohk ie, kitail pil dihdiar irail kan me men papah Siohwa. Karasepe, nan Guadeloupe, wasa me emen aramas sang nanpwungen 56 wia Sounkadehdehn Siohwa kan, irail meh 214 me papidaisla nan pahr nekiero. Mpen aramas 20,000 me iang towehda Katamano, emen sang aramas 22 nan Guadeloupe!
4. Ni ahl dah kan me wasahn kalohk kan kin wekiwekla?
4 Wekidekla kan nan Wasahn kalohk: Mie soahngesoangen aramas akan nan atail wasahn kalohk. Ni atail pwurala wasa kan me sohte me men rong, emen tohnpeneineio—me mwein saikinte rong atail mehn kairo—mwein ritingada wenihmwo oh rong. De mwein ke kak diar emen me men rong. Seri kan me arail pahpa oh nohno uhwong kin laudla oh kohkohsang imwarail kan. Irail pwukat mwein pahn rong pakair en Wehio.
5. Dahme kak kahrehda aramas akan arail tepida men rong?
5 Aramas akan pil kin wekila. Wahnpoaron Pohl wia emen me kin “lahlahwe mahso, oh pil kaloke oh kauwe.” (1 Timoty 1:13) Pil duwehte, tohto me papah Siohwa nan rahnwet, sohte kin rong padahk mehlel mahso. Ekei mwein uhwong rongamwahu pak ehu. Ni irair en sampah eh kin wekiwekidek, me uhwong kan de irail akan me sohte kin katapanki mehkot mwein mwekidki en rong. Meteikan mwein men rong mwurin arail lelohng soangen kahpwal kan nan arail mour, me duwehte mehlahn emen tohnpeneinei, sohla doadoahk, kahpwal en mwohni, de me pid roson en paliwar.
6. Dahme kahrehda kitail en wonlahte kalohk ni ngoang?
6 Koasoandi en ahnsouwet pahn kereniong en imwisekla, ahpw atail doadoahk en kalohk oh katohnpadahk kin wie karuwaruhla. (Aiseia 60:22) Ihme kahrehda, kitail en wonlahte mwowe en kalohk ni ngoang oh kehlail pwehn kolokol madamadau pwung. Aramas me kitail pahn koasoiong mwuhr mwein pahn rong. Kitail anahne koasoakoasoi! ‘Pwe me kitail pahn wia met, kitail pahn doarehla pein kitail oh pil irail kan me kin rong kitail.’—1 Timoty 4:16.
[Peidek en Onop]