“Kitail Kin Kalohk Nan Atail Wasahn Kalohk Pak Tohtohlahr!”
1 Ke kin pepehm me ke kin kalohk nan ahmw wasahn kalohk pak tohto oh likamwete solahr aramas me rasehng sihpw me kin mihmi mwo? Mwein mie pak me ke medemedewe: ‘I ese dahme aramas akan pahn nda. Dahme kahrehda I anahne pwurpwurehng kalohk ong irail ma re sohte perenki rong?’ Mehlel, kitail kin kalap kalohk nan ekei wasahn kalohk. Ahpw, kitail en ahneki lamalam en pweida mwahu, kaidehn ahneki lamalam me e sohte pahn pweida mwahu. Dahme kahrehda? Tehk duwen kahrepe pahieu me ntingdi pah.
2 Siohwa kin Ketin Sapeng Atail Kapakap akan: Sises mahsanih: “Rahket me inenen laud, a tohndoadoahk kan me malaulau; kumwail eri kapakap oh peki rehn kaunen rahket pwe en ketin kadarodohng tohndoadoahk tohto nan sapwellime rahk.” (Luk 10:2) Erein pahr tohto, kitail peki rehn Siohwa en kadarodo tohndoadoahk kan pwehn sewese kitail. Nan wasa tohto, met tohndoadoahk kan tohtohlahr, oh ihme kahrehda, kitail kin kalap kalohk nan atail wasahn kalohk. Kitail soh kin peren pwehki Siohwa kin ketin sapeng atail kapakap akan?
3 Nannanti Kin Kak Kahrehda Wah Mwahu: Mendahki kitail kin kalap kalohk nan atail wasahn kalohk, miehte aramas akan me kin mwekidki Rongamwahu en Wehin Koht oh men sukuhliki padahk mehlel. Ihme kahrehda, kitail anahne pwurpwurehng kalohk nan atail wasahn kalohk pwehn diarada irail me mohngiong mehlel kan. (Aiseia 6:8-11) Duwehte dahme sapwellimen Sises tohnpadahk kan en mahs kin wia, kitail en pil “pwurpwurehng kohwei” rehn aramas akan nan ahmw wasahn kalohk, oh kitail en wia uwen me kitail kak pwehn wia soangen padahk me pahn kahrehong irail en perenki rong duwen Wehin Koht.—Madiu 10:6, 7.
4 Nan sapwen Portugal mwomwohdiso tohto kin kalohk nan arail wasahn kalohk wihk koaros, ahpw re kin diaradahte irail aramas akan me kin rasehng sihpw. Emen sister kin ahneki lamalam en pweida mwahu. E koasoia: “Ni menseng koaros, mwohn I pahn kohla kalohk, I kin kapakap ong Siohwa pwehn sewese ie en diarada emen me men onop Paipel.” Ehu rahn, e koasoanehdi en tepida onop Paipel rehn tohndoadoahk kan me kin doadoahk nan wasahn seisei. Ahpw, mwuhr, emente me uhdahn iang towehda onopo. Aramaso me tepida onop koasoia: “Meteikan sohte men onop, ahpw ngehi—I men onop.” Mwurin eh onop sounpwong ehu, pein ih tepida onop rehn aramas riemen. Sohte pwand mwurin mwo, e papidaisla, oh mwuri, e iang doadoahk en Regular Pioneer!
5 Doadoahk en Kalohk Wiwiawi Wasa Koaros Nan Sampah: Sises kohpada me doadoahk en kalohki Rongamwahu en Wehin Koht pahn wiawi wasa koaros nan sampah oh kokohp wet wia pweipweida ahnsou wet. (Madiu 24:14) Pil nan wasa kan me aramas “sohte men rong [kitail],” re kak wehwehki me doadoahk en kalohk wiwiawi nan pein arail wasa. Kitail wehwehkiehr me ekei sohte pahn rong oh ekei pahn uhwong padahk mehlel. Ahpw, re wehwehkiehr me mie sounkalohk kan me pakairkiong irail duwen kadeik me pahn kohsang Siohwa ni ahnsou keren.—Esek. 2:4, 5; 3:7, 8, 19.
6 Kitail Saikinte Nek: Kitail sohte kak pilada iahd doadoahk wet pahn imwisekla. Siohwa pahn ketin pilada iahd me doadoahk wet pahn imwisekla. Siohwa kin ketin mwahngih ma miehte aramas akan me pahn mwekidki Rongamwahu en Wehin Koht de soh. Rahnwet, ekei aramas kin nda me re sohte men rong, ahpw, ma mie mehkot me kin wiawi nan arail mour—duwehte solahr arail doadoahk en mwohni, soumwahu laud, emen nan arail peneinei mehla—soahng pwukat kakete kahrehda re pahn kak rong ehu rahn. Ekei pak, pwehki aramas kin rong aramas teikan kauwe Sounkadehdehn Siohwa kan de pwehki aramas kin kedirepw, re sohte kin rong dahme kitail pahn koasoia ahnsoun kalohk. Ahpw, ma kitail pahn pwurpwurehng kohla rehrail oh kitail kin kadek ong irail, re kakete rong ehu rahn.
7 Ni ahnsou wet, ekei aramas laudla oh mie pein arail peneinei oh met re kin wia soangen peidek kan me ihte Pwuhk Sarawi kak sapeng. Emen nohno pwulopwul luhke sister riemen nan imweo oh koasoia: “Ni ahnsou me I kin wia kisin serepein, I kin pwonopwonki dahme kahrehda ahi nohno sohte kin rong Sounkadehdehn Siohwa kan pwe I ese me re kin koasoiahte duwen Pwuhk Sarawi. Eri, ahnsowo, I koasoanehdi nan kapehdei me ahnsou me I pahn laudla, pwopwoudla, oh mie pein imwei, I pahn luhke Sounkadehdehn Siohwa kan nan pein imwei oh mweidong irail en kawehwe ong ie duwen Pwuhk Sarawi.” Ihme e wia, oh irail sister kan me kohla reh inenen perenki kalohk ong ih.
8 Ke Kak Ahneki Lamalam en Pweida Mwahu? Ekei pak, kaidehn aramas me kitail kin koasoiong me kin kahrehda kalohk nan ekei wasahn kalohk kan kin mwomwen apwal. Ekei pak, pwehki pein atail lamalam kan oh madamadau kan kin kahrehda e kin apwal. Kitail kin ahneki lamalam me kitail sohte pahn pweida? Ma iei, met kin kahrehda kitail sohte pahn peren ahnsoun kalohk oh e pahn sansal sang ngilatail oh mesatail. Kasalehda me ke ahneki lamalam me ke pahn pweida mwahu oh kasalehda met sang ahmw mesen peren. Oh pil, songen wia padahk me weksang dahme ke kin kalap wia. Doadoahngki soangsoangen oaralap kan nan ahmw padahk kan oh nantihong kamwahuwihala ahmw padahk kan. Mwein ke kak kawikila tepin peidek me ke kin doadoahngki de ke kak doadoahngki iren Paipel kan me ke sohte kin kalap doadoahngki. Idek rehn brother oh sister teikan dahme re diarada kin pweida mwahu ni ahnsou me re kin kalohk. Iang brother oh sister tohto ahnsoun kalohk, irail me sounkalohk kan oh iangahki irail me pioneer kan, oh tehk iaduwen re kin koasoi ong aramas akan oh dahme re kin koasoia me kin pweida mwahu.
9 E sansal me Siohwa kin kupwurki kitail en kalohk oh E kin ketin kapaiada doadoahk en kalohk oh ma kitail pahn kalohk, met kin kasalehda atail limpoak ong Ih oh mehn mpatail kan. (Madiu 22:37-39) Eri, kitail en wia uwen me kitail kak pwe kitail en kalohk lao lel doadoahk en kalohk imwiseklahr, oh kitail en dehr pwangahkihda atail kalohk nan atail wasahn kalohk mendahki ma kitail kin kalohk wasa kohte pak tohto.