Mie Pein Ahmw Wasahn Kalohk?
1. Dahkot pein wasahn kalohk?
1 Pein wasahn kalohk iei wasahn kalohk ieu me kohieng uhk ken pwukoahki. Mwein wasahn kalohko mih nan wasa me mengei ong uhk en mwadang lel oh pil kelehpw kalohk ie de emen sounkalohk pahn iang iuk. Mendahki e kin mwahu en utungada koasoandi en mwomwohdiso ohng pwihn en kalohk ni ahnsou me kitail kak, ahneki pein atail wasahn kalohk pwehn kalohk ie ni ahnsou teikan kak wia sawas pwehn uhdahn wia kadehde mwahu, ahpw keieu, nan mwomwohdiso kan me arail wasahn kalohk kan laud.—Wiewia 10:42.
2. Ia ekei kamwahupe kan en ahneki pein wasahn kalohk?
2 Kamwahupe kan: Ekei diarada me pil mie ekei kamwahupe kan en kalohk nan pein arail wasahn kalohk ni limwahn arail wasahn doadoahk ni ahnsoun arail mwengehn souwas de mwurin arail doadoahk. Meteikan kin perenki doadoahkpene nin duwen peneinei ehu nan wasa me mehn mparail kan kin mie awa ehu samwa mwohn Pwuhk Study en Mwomwohdiso. Pwehki met, return visit kan oh Paipel study kan me dierekda kin mih karanih arail wasa, kahrehda re kak kasohtikihala arail kehl, ahnsou, oh mwohni. Pwehki soahng tohto kak wiawi nan ahnsou mwotomwotte, mwein ahneki pein wasahn kalohk kak sewese ekei en wia auxiliary pioneer ekei ahnsou de en wiahla regular pioneer kan. Kapatahiong met, doadoahk nan pein wasahn kalohk oh esehla tohnihmw akan kak sewese kitail en ale arail likilik oh pahn kawekila atail padahk kan ohng dahme irail nsenohki, kahrehiong atail doadoahk en kalohk en pweida.
3. Ia ekspiriens en emen pioneer me alehdi pein ah wasahn kalohk?
3 Emen pioneer me alehda kangoang sang rehn sounapwalih en circuit en ale pein ah wasahn kalohk koasoia: “I kapwaiada kaweid wet oh I mwadang esehla oh karanihala tohnihmw kan nan ahi wasahn kalohk. I kawekila ahi ahnsou en mwemweit rehrail ohng ahnsou me pahn mwahu ong irail. Pwehki met, ahi return visit kan tohtohla sang 35 lel 80 nan ehu sounpwong, oh mie ahi Paipel study isimen.”
4. Iaduwen ke kak ale oh doadoahk nan pein ahmw wasahn kalohk?
4 Iaduwen Ke Kak Ale Pein Ahmw Wasahn Kalohk: Ma ke men peki pein ahmw wasahn kalohk, koasoiong brother men me kin apwalih wasahn kalohk. Ke kak luhke pil emen sounkalohk en iang iuk doadoahk, oh kolokol rekord en ihmw kan me sohte towe. Ke anahne song en kanekehla ahmw wasahn kalohk sounpwong pahieu de mwotomwot sang. Ma ke apwaliki wia met, ke kak idek rehn ahmw sounapwalih en Pwuhk Study en Mwomwohdiso de meteikan pwehn ale sawas. Ni kaimwiseklahn sounpwong pahieu, ke kak kapwurehla wasahn kalohk me ke kanekehla de peki pwehn pwurehng doadoahk nan wasao. Ahpw, e sohte konehng ken kolokol wasahn kalohko ahnsou koaros ahpw kapwurehla pwe mwein meteikan pil pahn peki wasahn kalohko. Ma ke kin iang mwomwohdiso me sohte itar wasahn kalohk oh apwal en ale pein wasahn kalohk, mwein ke kak peki ehu kisin wasa sang ehu wasahn kalohk sang rehn ahmw sounapwalih en pwuhk study.
5. Dahme anahn pwehn kapwaiada atail pwukoa en kalohk?
5 Atail pwukoa en kalohk nan “wasa koaros nin sampah” iei pwukoa ieu me mwomwen apwal. (Madiu 24:14) E kin anahne koasoandi mwahu en atail doadoahk. Kapatahiong kalohk en pwihn kan, kalohk nan pein wasahn kalohk kak sewese kitail en lel aramas tohto ki rongamwahu.